Sendiherra Svía á Íslandi spáir endalokum lýðræðis í Svíþjóð

Er Ísland staður fyrir óþægilega sænska stjórnmálamenn sem sænskir sósíaldemókratar vita ekki almennilega, hvað þeir eiga að gera við?

Håkan Juholt, sendiherra Svía á Íslandi er í löngu viðtali við Svenska dagbladet laugardag 14. október og segir vægast sagt áhugaverða og óvenjulega hluti af sendiherra að vera.

Hann spáir endalokum lýðræðis í Svíþjóð innan 100 ára og hann mun ekki fara til Svíþjóðar þau ár sem hann verður sendiherra á Íslandi. Í staðinn mun hann hitta vini og ættingja í París eða á sólarströndum Spánar.  

Hann segir við blaðamann Sænska dagblaðsins:

”Fjögurra ára sonur þinn mun ekki lifa í lýðræði þegar hann verður gamall heldur í teknokratí eða einræðisríki. Þetta er alveg svakalega sorglegt. Mér þykir fyrir því að segja þetta en ég er 100% viss. Við erum að útrýma lýðræðinu”, segir fyrrverandi leiðtogi stærsta stjórnmálaflokks Svíþjóðar.

Håkan Juholt fæddist 1962 í Oskarshamn og varð snemma meðlimur í félagi ungra jafnaðarmanna. 1994 var hann kosinn á þing og vann mikð að varnarmálum Svíþjóðar. Hann var kosinn formaður Sósíaldemókrata eftir að Móna Sahlin hætti því starfi 2011 en hrakinn úr embættinu 10 mánuðum síðar 2012. Eftir það var hann í limbó á þingi með fá frumvörp og engan ræðutíma. Honum leiddist lífið og ferðaðist um Svíþjóð og hélt 470 ræður sem nokkurs konar langdregna kveðju frá stjórnmálunum. Fjórum árum síðar fékk hann boð um nýja stöðu sem sendiherra Svíþjóðar á Íslandi.

Håkan sagði já þegar í stað og er yfir sig spenntur að vinna starfið: ”Ég er 55 ára gamall og get byrjað nýtt líf með eiginkonunni í nýju landi. Ég hef alla tíð haft þá reglu að maður á ekki að verða eftir á lestarpallinum, þegar lestin fer af stað, aðeins vegna þess að maður er ekki öruggur um hvert lestin er að fara”.

Um afnám lýðræðisins segir Juholt: ”Ég held ekki að hættan sé einræðiríki með akandi skriðdrekum á Sergels torgi (í Stokkhólmi) heldur sérfræðingastjórn sem ekki hleypir afstöðu meðborgaranna að stjórn landsins. Lýðræðið rennur úr greipum okkar. Færri munu vilja láta kjósa sig, flokkarnir munu draga úr hugmyndafræðinni. Klárt mál að ég sé hættu vegna tilkomu einræðis með tímanun”, segir hann af alvöruþunga.

Áhugi sænska utanríkisráðuneytisins á skýrslum frá Íslandi er vægast sagt hóflegur og ekki er mikill þrýstingur frá viðskiptalífinu (Ísland er aðeins 0,3% af útflutningi Svía). Það þýðir að enginn skiptir sér mikið af því, hvað Juholt gerir sem sendiherra. Á hinn bóginn fær Juholt loksins frjálsar hendur eftir að hafa verið skorðaður sem leiðtogi sósíaldemókrata. Og hann nýtur hverrar mínútu af frelsinu.

”Eftir fjögur ár verð ég 59 ára gamall og byrja þá mögulega eftirlaunatímann og stend í hvítum jakkafötum með hvítan stráhatt á gistiheimili með Riojavín í glasinu. Varla slæmur draumur er það?"

Stærsta fjármálablaðran springur í ár eða á næsta ári

Fjárfestirinn Jim Rogers settist með framkvæmdastjóra Business Insider Henry Blodget í viðtalsþættinum ”The Bottom Line” og ræddu þeir efnahagsástandið. Ég læt fylgja með í lauslegri þýðingu það helsta sem fram kom í máli þeirra. 

Rogers: Ég lærði það snemma á fjárfestingarferli mínum að ég ætti ekki að fjárfesta í því sem mig langaði til. Betra er að fjárfesta í því sem er að gerast í heiminum. Annars væri ég gjaldþrota - algjörlega rúinn. Þetta heldur sem sé áfram. Sum hlutabréf í Bandaríkjunum eru komin í bólu. Blaðran er á leiðinni. Síðan springur hún og allir ættu að hafa miklar áhyggjur af því. En það er gott fyrir þig Henrý vegna þess að einhver verður að segja frá þessu. Þú færð vinnuöryggi. Þú ert heppin sál. 

Hvenær springur blaðran?

Seinna í ár eða næsta ár, skrifaðu það niður. 

Og hvað kemur þessu í gang?

Það er áhugavert að hlutirnir fara alltaf í gang á öðrum stað en við beinum sjónum að. Árið 2007 fór Ísland á hausinn. Fólk sagði ”Ísland”? Er það land? Eru þeir með markað? Síðan fór Írland á hausinn. Og Bear Sterns fór á hausinn. Og Lehman Brothers fóru á hausinn. Keðjan var þannig. Gerist alltaf á þeim stöðum sem við erum ekki með augun á.

Ég veit það ekki. Það gæti orðið lífeyrissjóðsáætlun Ameríku sem fer á hausinn, margir sjóðir eru gjaldþrota eins og þú veist. Það gæti orðið eitthvað land sem við höfum ekki augun á. það gæti orðið stríð - ólíklegt þó en eitthvað verður það…..

Hversu stórum skelli getum við búist við?

Þeim versta á ævinni. Það verður sá stærsti á minni ævi og ég er eldri en þú. Þetta verður grafalvarlegt mál. 

Við höfum haft efnahagsörðugleika í Bandaríkjunum, við getum notað Bandaríkin sem dæmi, á fjögurra til sjö ára millibili frá stofnun lýðveldisins. Jæja, það eru yfir 8 ár síðan síðast. Skuldastaðan þá var ekki neitt miðað við það sem er að gerast í dag.

2008 átti Kína heilmikið af peningum fyrir slæmu dagana. Svo fór að rigna. Þeir byrjuðu að eyða peningum. Núna eru Kínverjar líka skuldugir og er sú skuld miklu stærri. Veltureikningur Seðlabanka Bandaríkjanna hefur aukist allt að fimm sinnum frá 2008.

Þetta verður versti hvellurinn á ævi þinni - líka minni. Höfum því áhyggjur.

Getur einhver bjargað okkur?

Þeir munu reyna það. Það sem gerist er að vextir munu hækka eitthvað. Svo þegar ástandið verður orðið mjög slæmt þá hringir fólk og segir ”Þið verðið að bjarga mér. Vestræni heimurinn, hann er að hrynja”. Og Seðlabankinn sem búinn var til af stjórnmálamönnum og búrókrötum mun sega ”Klárt að við verðum að gera eitthvað”. Og þeir munu reyna en það mun ekki virka. Það mun orsaka einhverjar sveiflur en ekki virka í þetta sinn.

Við erum í þeirri stöðu að svo virðist vera mögulegt að hinn Vestræni heimur geti hrunið, þrátt fyrir að markaðir séu upp á við allan tímann. Oft þegar stórslys gerast í efnahagskerfinu, þá verður umrót í stjórnmálakerfinu. Hvað gerist í pólitíkinni ef þetta gerist?

Það er nú þess vegna sem ég flutti til Asíu. Börnin mín tala mandarísku vegna þess sem í vændum er. 

Ríkisstjórnir munu falla. Lönd munu einnig falla. Ísland féll síðast. Önnur lönd munu falla. Við fáum að sjá meira af slíku.

Stjórnmálaflokkar munu hverfa. Við munum sjá stofnanir sem hafa verið í gangi í langan tíma hverfa - Lehman Brothers voru meira en 150 ára þegar þeir hurfu. Varla til í minningu flestra. Við munum sjá miklu meira af slíku í næsta skipti, hvort svo sem um er ræða söfn, spítala, háskóla eða fjármálafyrirtæki.

 

Brexit ekki lengur vandamálið. Sjálfstæð Katalónía markar endalok ESB.

Brezki þingmaðurinn Daniel Hannan segir að sjálfstæð Katalóníu muni rífa evrukreppuna í gang að nýju. "Brexit gæti orðið minnsta vandamál ESB" sagði Hannan. Fjárfestingar eru þegar frystar í Katalóníu. Hannan telur að innanríkisástand Spánar geti hæglega leitt til gríðalegra fjárhagsvandræða á Spáni sem ógna muni öllu ESB.

Katalónía stendur fyrir 20% af þjóðarframleiðslu Spánar og aðskilnaður ríkisins frá Spáni gæti kveikt meiriháttar fjármálakreppu. Hannan skrifar í grein í Spectator að "ofbeldið á sunnudaginn muni kynda undir sjálfstæðisbaráttu Katalóníu. Skoðun fólks í öðrum hlutum Spánar mun ekki frekar en lagabókstafurinn gera Madríd kleyft að leika næsta leik.

Hvað gerist þegar ósigrandi afl mætir óhreyfanlegun hlut?

Spánn mun skera niður fjárframlög til Katalóníu ef hún lýsir yfir sjálfstæði. Ríkisstjórn Katalóníu mun þá í hraði koma á eigin skattakerfi og fjármálamarkaðir Spánar hrynja í kjölfarið.

Evrukreppan kemur til baka af fullum þunga og Brexit verður aukavandamál ESB".

Dómstóll frestar fundi katalónska þingsins

Spánarkonungur hvetur til blóðugrar innanríkisstyrjaldar

Með Evrópusambandið að baki sér og eftir ræðu Felipe Spánarkonungs er ekkert til fyrirstöðu að ríkisstjórn Spánar beiti Katalóníubúum ofbeldi með tilheyrandi blóðbaði ef stjórn þeirra dirfist að lýsa yfir sjálfstæði Katalóníu.

Carles Puigdemont leiðtogi Katalóníu sagði í viðtali við BBC að stjórn Katalóníu myndi fljótlega lýsa yfir sjálfstæði landsins, trúlega í vikulokin eða í byrjun næstu viku.

Spánarkonungur Felipe sagði í sjónvarpsræðu sinni að þjóðaratkvæðagreiðslan í Katalóníu væri "vottur um gengdarlausan trúnaðarbrest". Sagði hann að "efnahagslíf Spánar hafi verið sett í uppnám og að Katalóníubúar hafi tekið sér stöðu langt fyrir utan lög og lýðræði".

"Það er hlutverk löglegra yfirvalda að tryggja stjórnskrárbundið skipulag" sagði konungur.

Þar með er frítt fram fyrir ríkisstjórn Spánar að kæfa niður sjálfstæðishreyfingu Katalóníubúa á miskunnarlausan hátt og kasta Evrópu enn á ný inn í blóðuga afgrund.

Mannréttindi ESB þýða afdráttarlausa hlýðni við ESB. Þau eru "innanríkismál" hjá þeim sem beita vopnum gegn lýðræði en "sambandsmál" hjá þeim sem gagnrýna Brussel.

ESB litast blóði. Með stækkandi blóðpolli má búast við því að þekkt úrræði verði notuð til að útrýma fólki með óþægilegar skoðanir.

Sagan endurtekur sig.

Spánarkóngur fordæmdi sjálfstæðisbaráttuna

Góður boðskapur forsætisráðherra Íslands

Orð forsætisráðherra eru öllum þörf. Þau taka saman reynslu Íslendinga af fjármálakreppunni 2008, þegar stærstu bankar landsins lögðust á hliðina. Kjarni málsins er - nákvæmlega eins og Bjarni Benediktsson segir í viðtali við Sky News, að græðgi leiðir til mistaka sem rangt er að skattgreiðendur greiði fyrir. 

Það vekur athygli langt út fyrir landssteinana, að Ísland með sérstakan saksóknara að vopni stakk bankasvindlurum í fangelsi. Ólafur Þór Hauksson lýsti því vel, að lögin gilda fyrir alla, háa sem lága.

Þessi íslenska stefna - að gera bankastjóra ábyrga gerða sinna - er að vinna sér hljóm út um heiminn. Og ekki vanþörf á, þegar litið er til allra þeirra byrða sem skattgreiðendur annars staðar hafa verið látnir taka á sig vegna óreiðuviðskipta fjárglæframanna. 

Ísland er brautryðjandi í mótun heilbrigðrar fjármálastefnu. Sífelldar fjármálakreppur benda til mikilla vankanta á kerfinu. Skýringin er ekki sú sem Sigurður Einarsson segir á hrokafullan hátt "Við brutum engin lög." Sagði Sigurður að lögum hafi verið breytt eftirá til að finna sökudólga til að friðþægja hefndarþrá landsmanna.

Miðað við þessi ummæli finnst manni fimm ár í fangelsi vera fimm sinnum of skammur tími fyrir þennan mann. Það er einmitt hér sem hnífurinn stendur í kúnni. Sigurður skilur eftir fleiri hundruða milljarða króna gat sem - ef hann hefði fengið að ráða - hefði verið velt yfir á herðar skattgreiðenda sem á engan hátt komu nálægt bankabrölti hans. 

Forsætisráðherrann mælir eins og góður víkingur, þegar hann segir að endurtekin mistök muni leiða til nýrrar fjármálakreppu. Vonandi mun landsfundur Sjálfstæðismanna taka einarða afstöðu með íslensku krónunni og móta heilbrigðari peningastefnu á grundvelli þessarar mikilvægu reynslu. 

Það verður önnur bankakreppa

Fellibylurinn TRUMP – Hvað gerðist?

 

 

 

 

 

 

 

 

 

Í bókinni "Það sem gerðist" reynir Hillary Clinton að svara  spurningunni hvað gerðist? Lýsir Hillary Clinton hvernig henni leið á kosninganóttinni og leitar svara við því, hvers vegna hún sé svo fyrirlitin.

Bill Clinton gekk fram og tilbaka á kosninganóttinni og "tuggaði á ókveiktum vindli" skrifar Hillary Clinton.

Á meðan atkvæðin streymdu inn lagði Hillary sig og þegar hún vaknaði var ástandið hryllilegt.

Viðtalið við Trump er "vafalaust eitt af merkilegustu augnablikum í lífi mínu" skrifar Hillary. Hún óskaði honum til hamingju með sigurinn og undraðist hversu eðlilegt samtalið var, þrátt fyrir að hún væri lömuð, "þetta var svo hryllilegt allt saman".

CNN komst yfir eintak bókarinnar fyrir útgáfuna og segir að bókin sé gegnumsýrð af fyrirlitningu á Donald Trump. Hillary kennir því um að margir hati sig fyrir að vera kona og hluta af tapinu kennir hún Bernie Sanders um.

Skv. NBC News nýtur Hillary trausts einungis um 30% kjósenda. "Margir vilja að ég hverfi af braut" skrifar Hillary. "En ég er hér". Það óttast demókratar mest.

 

Hvað er eiginlega að Þýzkalandi?

Robert Curry spyr hvað sé að Þýzkalandi í nýrri grein um Þjóðverja og þá áráttu þeirra að verða alltaf vandræðabarn Evrópu. Núna - ekki með því að senda unga menn í herbúningi til að leggja Evrópu undir sig, - heldur með því að nota yfirburða efnahagsstöðu sína til að fá unga múslímska menn til að flykkjast í miklum mæli yfir landamærin til Evrópu. Í seinni heimsstyrjöldinni skildu Þjóðverjar álfuna eftir í rúst - fyrst með sigri og síðar með ósigri. Í dag virðast Þjóðverjar ætla að eyðileggja Evrópu með yfirtöku annarra í stað eigin yfirtöku.

Fyrst Keisarinn, síðan Hitler og núna Angela Merkel. Aftur og enn en á mismunandi hátt hefur þýzki hrokinn fundið leiðir til að setja Evrópu á kné. Hvernig í ósköpunum erum við komin á þennan stað aftur?

Fortíð Þýzkalands sem óvinur Breta, Frakka og Bandaríkjamanna í tveimur mannskæðustu styrjöldum sögunnar varpar ljósi á mismunandi menningarþróun ríkjanna. Stjórnmálabyltingar upplýsinganna í Bretlandi, Bandaríkjunum og Frakklandi höfðu víðtæk áhrif á hugsunarhátt þeirra. Þýzkaland hafnaði upplýsingunni og fór í gagnstæða átt með rómantíkinni sem hafnaði upplýsingum staðreynda. 

Prófessor Isaiah Berlin við Oxford háskóla lýsir einkennum rómantísku stefnunnar:

"..almenn skynsemi og hófsemi voru langt frá hugmyndum þeirra...það var mikið sótt í tilfinningar...hafsjór af óskum eftir eilífðarlausnum...aðdáun á ofursnillingum, útlögum, hetjum, fagurfræði, sjálfseyðingarhvöt." 

Þráin eftir rómantísku hetjunni vakti ímynd Satans sem gerði uppreisn gegn himnum og lýsir vel Hitler. Hitler hrærði upp sært stolt Þjóðverja eftir ósigurinn í fyrstu heimsstyrjöldinni og leiddi Þýzkaland út í sjálfseyðingarferð sem endaði með eyðileggingu Þýzkalands og sjálfsmorði Hitlers. 

Einungis með því að skilja höfnun Þjóðverja á upplýsingunni sem önnur lönd fylgdu og eigin vegferð Þjóðverja í dýrkun ofurmenna og sjálseyðingarhvöt er hægt að skilja þann mikla menningarmun sem aðgreinir Þjóðverja frá öðrum. 

Ef vestræn ríki vilja komast hjá endurtekinni eyðileggingu og hörmungum síðustu aldar, færi vel að byggja áfram á uplýsingunni og ýta burtu hugsunarhætti þýzkra rómantískra einstaklinga eins og Merkel, sem heldur í hugmyndalegar hefðir sem geta ekki sýnt neinn sögulegan jákvæðan árangur.

Merkel klettur í hafsjó vitleysinga

Yfir 130 þúsund manns krefjast þess að George Soros verði klassaður sem hryðjuverkamaður

Yfir 130 þúsund nafnundirskriftir hafa borist í áskorun til Bandaríkjaforseta á vef Hvíta Hússins um að Bandaríkjaforseti klassi fjármálarisann George Soros sem hryðjuverkamann. Jafnframt er þess krafist að bandaríska ríkið geri upptækar allar eigur Soros. 

Nafnundirskriftir hófust 20. ágúst og eru þegar yfir 100 þúsund sem þarf til að forsetinn verði formlega að taka málið fyrir og gefa umsögn. 

Frumkvöðlar áskorunarinnar segja að Soros hafi óeðlilega mikil völd á Demókrataflokknum og miklum hluta Bandaríkjastjórnar. Telja þeir einnig að Soros reyni á meðvitaðan hátt að grafa undan öryggi Bandaríkjanna með stofnun ýmissa samtaka sem reyni með hryðjuverkaaðferðum að "eyðileggja stjórn Bandaríkjanna". Þess er krafist, að dómsmálaráðuneytið "lýsi George Soros, öll samtök hans og starfsmenn þeirra tafarlaust sem innlenda hryðjuverkamenn og fjárnám verði tekið í öllum persónulegum eigum Soros og samtaka hans". 

George Soros hefur víða komið við þar sem órói hefur skapast gegn ráðandi valdhöfum. T.d. gekk ungverska ríkisstjórnin fram fyrr í ár og ásakaði Soros fyrir að reyna að drekkja landinu með innflytjendum frá þriðja heiminum. Soros sló tilbaka og sagði að ungverska ríkisstjórnin stundaði antisemitískan áróður sem flytti hugann að "myrkustu stundum Evrópu". 

Soros hefur verið viðriðinn að reyna að hafa áhrif á kosningar í Evrópu. Fyrir síðustu þingkosningar í Svíþjóð 2014 studdu samtök hans Open Society vinstrihópinn Expo með hundruðum þúsunda sænskra króna. Sagt var að peningarnir rynnu til "námskeiða fyrir meðlimi ýmissa antirasískra samtaka". Open Society borgaði milljónir dollara til ólíkra samtaka fyrir "kosningar í Evrópu 2014" og fóru peningarnir til að styrkja vinstri aktívista til að reyna að hafa áhrif á úrslit kosninga það árið. Samtökin Open Society hafa dælt yfir 5,5 milljónum SEK til vinstrihópsins Black Lives Matter. 

Open Society fjármagnar einnig s.k."Alþjóðleg samtök rannsóknarblaðamanna - ICIJ". Þau "samtök" birtu "afhjúpanir" á Panamaskjölum þegar m.a. var ráðist á lýðveldið Ísland og réttkjörnum embættismönnum bolað úr embætti. Soros hefur gríðarleg áhrif gegnum keypta stjórnmálamenn bæði innan sem utan ESB. Samtök hans eru einnig ásökuð um að hafa greitt fé til flóttamanna frá Miðausturlöndum til að komast til Evrópu og skip á þeirra vegum hafa sótt flóttamenn úr höndum mannsmyglara við strendur Líbíu.

Svíþjóð hefur breyst úr friðsömu sam­fé­lagi í land skotárása, morða, nauðgana og ótta

Það hefur ýmislegt verið rætt í Svíþjóð um aukningu morða með skotvopnum og þau svæði sem lögreglan lýsir yfir að hún geti ekki lengur haldið uppi lögum og reglum. Menn geta reynt að geta sér til hvað kemur í stað sænskra laga þegar ekki er hægt að fylgja þeim eftir lengur. Sumir segja Sharía lög, aðrir glæpalög eiturlyfjahópa o.s.frv. Ef maður víkur þeirri umræðu augnablik til hliðar og ímyndar sér margra áratuga samfellda þróun Svíþjóðarparadísar með drjúpandi smjöri á hverju strái og englabörn á skýjum, þá bergmálar neyðaróp sænska lögreglustjórans Dan Elíassonar í skærri mótsögn við hina himnesku mynd. Spurningin er, ef nú allt er svona fínt og flott í Svíþjóð eins og ráðamenn segja, hvers vegna var hátt launaður embættismaður að senda út neyðarkall um að ekki sé lengur hægt að halda uppi lögum og reglum á fjölmörgum stöðum í Svíþjóð í júní 2017?

Svíþjóð sker sig alfarið frá öðrum Norðurlöndum hvað varðar morð með skotvopnum á hverja 100 þúsund íbúa ár 2015:

Fjöldi myrtra með skotvopnum á 100 000 íbúa

Ár	Svíþjóð	Finnland	Danmörk	Noregur
2005	0,12	0,21	0,17	0,11
2006	0,14	0,32	0,22	0,21
2007	0,23	0,43	0,15	0,04
2008	0,15	0,56	0,11	0,06
2009	0,24	0,41	0,20	0,19
2010	0,19	0,26	0,20	0,04
2011	0,20	0,33	0,23	1,43 (Utöya)
2012	0,17	0,30	0,09	0,10
2013	0,23	0,28	0,09	0,06
2014	0,20	0,20	0,12	0,10
2015	0,31	0,18	0,18	0,06
MEÐAL	0,20	0,32	0,16	0,22

Heimildir: SCB, Danmarks statistik (DST), Statistisk sentralbyrå (SSB), Tilastokeskus, SvD ásamt dánarorsakaskráningu sérhvers lands. Sjálfsmorð og dauði í kjölfar lögregluskota ekki meðtalinn.  

 Vandamálin blásin út

Einn skotinn ekki frétt – en tíu kannski?

Fyrirsögnin ofan er sótt í grein eftir sænska lögreglumanninn Tommy Hansson í vefriti lögreglunnar í Stokkhólmi Bláljós (blaljus.nu) Tommy er reyndur lögreglumaður sem í mörg ár hefur unnið að málefnum sænsku lögreglunnar og skrifar reglulega um þau og það sem betur má fara. Með fyrirsögninni ofan vakti hann athygli á viðtali sænska útvarpsins við afbrotasérfræðinginn Sven Granath vegna allra skotárása í Svíþjóð að undanförnu.

Í annarri grein með fyrirsögninni "55 no go-zoner" sem birt var 6. nóvember 2014 gerði Tommy að umtalsefni skýrslu lögreglunnar um áhrif glæpastarfssemi í Svíþjóð á líf venjulegs fólks en þar er talað um 55 svæði staðbundinna glæpahringja með neikvæð áhrif á samfélagið. Í dag eru svæðin orðin 68 og sérlega erfið svæði eru 23.

Vegna umræðunnar um "no go-zones", þá hringdi ég til Tommy Hansson og spurði hvort sænska lögreglan notaði "no-go-zones" í lýsingum sínum á sérstöku svæðunum. Svar Tommy var að svo væri ekki heldur hefði hann í greininni verið að vísa m.a. til greinar Per Gudmundson ritstjóra Sænska Dagblaðsins sem spyr, hvort nokkur betri lýsing en "no go-zone" sé til yfir svæði sem almenningur telur stjórnað af glæpamönnum. 

Umræðan um "no go" eða "go go" eða hvorugt er óæðri stefnu sitjandi ríkisstjórnar Svíþjóðar sem hrúgar fólki inn í Svíþjóð án þess að til staðar sé geta né vilji að taka á móti öllum saman. Hvort svo sem Sylvi Listhaug er í kosningaferð eða ekki, þá er sú spurning óæðri spurningunni um valdbeitingu sænsku ríkisstjórnarinnar til að þagga niður umræður um málið. Fréttamiðlar hafa eftir sænskum embættismönnum "að ónafngreindir hátt settir embættismenn í utanríkisráðuneyti Noregs" hafi "varað við" tilgangi norska ráðherrans að sverta ímynd Svíþjóðar.

Sænskir kratar þola lítið gagnrýni og halda á lofti fölnaðri bleikri mynd sem sífellt færri Svíar koma auga á jafnvel þótt ítrasta vilja sé beitt. Pukurstjórn krata og vinstri manna í Svíþjóð sem lekur hernaðarleyndarmálum til Serbíu og Kína er hættulegri Svíum en Silvi Listhaug sem einungis vill læra af mistökum Svía til að koma í veg fyrir að eigin landsmenn falli í sömu gryfju.

Íslendingar ættu að gera það líka og senda einhvern ráðherrann til draumalands jafnaðarstefnunnar og rannsaka málið. 

Norskur ráðherra veldur usla í Svíþjóð