Krataeðlið nakið - ólýðræðislegt, svikult, undirförult og læðist aftan að fólki

Sósíaldemókratar á Norðurlöndum og víðar eru á flótta frá almenningi sem snýr við þeim baki vegna blekkinga, svikinna loforða, eiginhagsmunastefnu og ekki síst náinna tengsla við alls konar fjárglæfra- og glæpamenn sem vinna með þeim í fimmtu herdeildinni til að ná markmiðum sínum. Á Íslandi með því að traðka niður nafn landsins og allra heiðarlegra Íslendinga með svindlandi þjófnaði sem næstum kostaði landsmenn sjálfstæðið. Ísland er enn í efnahagslegum fjötrum og samfélagið enn í sárum en sem betur fór tókst landsmönnum að stöðva skuldsetningu margra kynslóða fram í tímann og algjöra samfélagslega eyðileggingu.

Alls staðar þar sem sósíaldemókratar fara með völd skilja þeir eftir sviðna jörð,  atvinnuleysisbál, tæmda sjóði almennings og lýðræðisafhroð, þar sem spilling ræður ríkjum í stað eðlilegs og réttskipaðs stjórnarfars. Dugir þar að benda á stjórn Reykjavíkurborgar sem gerir allt til að feta í fótspor stórabróðurs í fyrrverandi ríkisstjórn. Verða Reykvíkingar að taka höndum saman í borginni eins og landsmenn gerðu í Icesave og fleygja þessum ónytjungum úr stjórnarstólunum áður en Reykvíkingar verða skuldsettir margar kynslóðir fram í tímann.

Í ESB undirbúa kratar með fulltingi aðlþjóðlegs fjármagns og kröfuhafa að svipta lýðræðislega kjörna fulltrúa Grikkja valdi með nýskipan tæknikratanefndar sem á að stýra Grikklandi í gjaldþrot án þess þó að þeim verði vísað af evrusvæðinu. Ef Grikkir sætta sig ekki við það og óeirðir brjótast út verður slíkt kæft með hervaldi og mögulega ný herforingjastjórn skipuð, sem er hliðholl Trojkunni.

Í Finnlandi hafa sósíaldemókratar ekki unnið kosningar samfellt átta sinnum í röð. Ríkir fullkominn stjórnarkreppa í röðum þeirra og vita þeir ekki sitt rjúkandi ráð, þegar grundvöllur þeirra er horfinn. Stór hluti vinnandi fólks kýs SannFinna sem vilja vinna gegn spillingu og alríki ESB.  

Í Svíþjóð birtust í dag niðurstöður kannana sem sýna, að Svíar eru að átta sig á kosningasvikum og ósannindum sósíaldemókrata, sem hækka allar álögur á almenningi til að fá sjálfir meira í sinn hlut. Flest allir uppgjafa sósíaldemókratar eins og Göran Persson fyrrv. forsætisráðherra vinna í stjórnum stórbanka og tryggingarfélaga eða í bankasamtökum og er eini munurinn á þeim og hjónabandi Jóhönnu Sigurðardóttur og Baugsforingjans Jóns Ásgeirs Jóhannessonar sá, að á Íslandi og ekki í Svíþjóð eru rekin dómsmál gegn Baugsmafíunni og siðlausri glæpastarfsemi fjármálaklíkunnar sem rústaði efnahagslífi Íslands árið 2008. Þótt sænskum krötum hafi tekist að fá örbrot af kjósendum til baka í síðustu kosningum er flótti frá sænskum krötum núna í svo stríðum straumi, að orðið hrun öðlast merkingu. Vex Svíþjóðardemókrötum jafnt og þétt fylgi og gætu þeir orðið næststærsti stjórnmálaflokkurinn í næstu þingkosningum í Svíþjóð.

Kratar eru stjórnmálahreyfing siðblindra peningaafla og hika ekki við að skapa glundroða í samfélaginu til að skara eld að eigin köku. Lýðræði, stjórnarfar og lög þýða afskapalega lítið og léttvaltað yfir allt saman. Oftar en ekki er braut öfgaofbeldisafla rudd með skelfilegum afleiðingum fyrir fólk.

Þetta sést einna best á bónför einsatkvæða formanns Samfylkingarinnar til Brussels, þar sem hann skiptir út Alþingi og þingskaparheitinu, stjórnarskrá og lýðræði lýðveldisins fyrir fáein tíst með krötum á Evrópuþinginu til að fara fram á erlenda aðstoð til að troða Íslandi inn í Evrópusambandið. 

Er Árni Páll hræddur við það, að ef Ísland hverfi af lista umsóknarríkja ESB, að þá hverfi Samfylkingin og hann sjálfur í leiðinni? 

Leitar liðsinnis innan ESB

Frítt fram fyrir hervæðingu Írana

Varla var blekið þornað á pappírnum fyrr en fyrsti áþreifanlegi árangurinn af "sögulegum samningi" Írana og Vesturvelda sýnir sig: Pútín afléttir einhliða vopnasölubanni til Íran. Er þetta aðeins byrjunin á nýrri hervæðingu Írans sem mun kynda undir nýja stríðsógn í Miðausturlöndum nákvæmlega eins og forsætisráðherra Ísraels, Benjamin Netanyahu, hefur varað við. Flugskeyti Pútíns eru mikilvæg fyrir Íran til að verjasta flugárásum á kjarnorkuver sem geta framleitt kjarnorkusprengjur. Verður nær ómögulegt að granda þeim með hefðbundnum flugárásum, þar sem flugskeyti Rússa eru meðal þeirra fullkomnustu sem völ er á í heiminum í dag.

Það er mikil ógæfa fyrir heimsbyggðina, að samið er um liðkun samskipta og viðskipta við prestastjórn í Teheran sem mörgum sinnum hefur lýsti því yfir gegnum árin, að markmið þeirra er að útplána Ísrael. Obama Bandaríkjaforseti hefur bæði sniðgengið sitt eigið þing og mikilvægan bandamann, Ísrael, með samkomulagi sem hann sjálfur trúir ekki á sbr. yfirlýsingar um að "ef Íran svindlar, þá stoppum við allt saman aftur". 

Rússar eru í herskáa gírnum og skv. eigin hersérfræðingum leggja þeir grunn að árásarstríði til norðurs og í Úkraínu. Einkum eru gömul yfirráðasvæði Sovéts með rússneskum meðborgurum eins og í Baltísku löndunum  illa sett. Harðari orðahnýtingar rússneskra yfirmanna við kollega sína á Norðurlöndum og Eystrarsaltsríkjunum ásamt sífellt fleiri "næstum því slysum" sprengjuflugvéla, kafbáta og annarra hertækja boða ekki gott. Taugarnar verða spenntar til hins ítrasta á heræfingu Norðurlanda með þáttöku amerískra herþotna á Eystrasalti í maí. 

Flugskeytaflutningsbann afnumið

Ísland: Afhendið fiskimiðin! Bretland: Þið sleppið ekki úr netinu!

Umræður eru um þjóðaratkvæðagreiðslur bæði á Íslandi og í Bretlandi. Á Íslandi heldur landsölufólkið áfram þeirri slóttugu iðju að blekkja landsmenn til að hætta við kröfur Alþingis um óskoruð yfirráð Íslendinga yfir fiskimiðunum. Það sem kallað er atkvæðagreiðsla um "áframhaldandi viðræður" er ekkert annað en atkvæðagreiðsla um að landið afsali sér fullveldi sínu yfir sjávarlögsögunni. Á þessu atriði strönduðu viðræðurnar og í staðinn fyrir "kíkja í pakkann" lygar er nú komið með "áframhaldandi viðræður" lygar.

Í nágrannalandi okkar Bretlandi eru einnig umræður um þjóðaratkvæðagreiðslu, nefnilega loforð David Camerons um að ef hann fái traust kjósenda til áframhaldandi stjórnarmyndunar, þá munu Bretar fá að kjósa um hvort þeir vilja halda áfram að vera með í ESB eða ekki. Tony Blair fer nú hamförum í Bretlandi og útmálar Bretlandi sem Kúbu andskotans verði Bretum gefinn þessi kostur. Hann hefur fyrir löngu síðan selt sálu sína og veit að landsöluhópur hans er í hverfandi minnihluta.

Læt fylgja með skjáskot af teiknimynd Steve Bell í The Guardian um ESB prédikarann Tony Blair sem hótar eldi og brennisteini ef Bretar sjá ekki sæluna í ESB.

 

Fækkar sem vilja þjóðaratkvæði

Jarðvegurinn þroskast fyrir afturköllun umsóknar

Það var afar ánægjulegt að lesa alveg prýðilegt viðtal við fjármálaráðherra Íslands, Bjarna Benediktssonar í Frjálsri Verslun varðandi aðildarumsókn Íslands að ESB. Það var löngu tímabært, að Bjarni tæki blaðið frá munninum og gæfi afdráttarlausa afstöðu hans sjálfs sem formanns Sjálfstæðisflokksins í einu af stóru málum þjóðarinnar. 

Bjarni hefur alveg hárrétt fyrir sér í því, að ríkisstjórnarflokkunum ber engin skylda til að halda þjóðaratkvæðagreiðslu um strandað mál fyrri ríkisstjórnar. Kjósendur gáfu henni eitt lengsta nef kosningasögunnar í síðustu alþingiskosningum. Það er enginn grundvöllur að þvinga upp á ríkisstjórnina eftirákosningu, þótt ýmis orð hafi fallið í aðdraganda kosninganna. Bellibrögð síðustu ríkisstjórnar varðandi "kíkja í pakkann" dæmið eru engin vinnubrögð að taka eftir og hreinskilin umræða byggð á staðreyndum besta leiðin til að skýra málin.

Bjarni skýrir öll helstu rök fyrir afturköllun umsóknarinnar t.d. eins og að það sé í raun og veru ekki svo mikið mál eins og aðildarsinnar reyna að blása upp, þar sem "Komi fram vilji til að halda viðræðunum áfram erum við hvort sem er á byrjunarreit. Það að draga umsóknina til baka er því ekki jafnstór ákvörðun og menn láta í veðri vaka. Það er miklu frekar formsatriði og afdráttarlaus yfirlýsing ríkisstjórnarinnar um stöðu málsins; að við séum ekki lengur umsóknarríki."

Bjarni bendir enn frekar á að hann hafi greitt atkvæði gegn tillögunni um að ganga í Evrópusambandið og er full þörf á að minna á það, þar sem fyrri ríkisstjórn meinaði þjóðaratkvæðagreiðslu um málið en lætur í veðri vaka í stjórnarandstöðu að "kasta beri eldi og brennisteini" að þeim sem ekki vilja fylgja stefnu sinni.

Margt hefur einnig komið fram hjá Samfylkingarmönnum eins og Jóni Baldvini Hannibalssyni sem loksins virðist farinn að gera sér grein fyrir ástandinu hjá ESB, bankastefnunni og hvernig evran hefur leikið lönd eins og Grikkland grátt.

Formaður Samfylkingarinnar Árni Páll Árnason hefur einnig lýst nagandi efasemdum um ESB og allt er það blessað og gott að þeir blindu nú byrja að öðlast sýn og er það góðra gjalda vert.

Staðan varðandi ESB-umsókn fyrri ríkisstjórnar, sem þjóðinni var sagt ósatt um að væri ekki alvöru umsókn, þar sem bara væri verið að "kíkja í pakkann og sjá, hvað hægt væri að velja um" má líkja við eftirfarandi:

Fjallkonan var kefluð þegar hún var þunguð af ESB-umsókninni. Henni var bannað að segja sitt álit og ekki gefið tækifæri á að ráða hvað hún vildi gera sjálf. Eftir nokkurn tíma varð fóstrið andvana og aðstandendur þess vilja ekki fjarlægja það heldur eyða tímanum í að fá hana til að samþykkja framlengdan meðgöngutíma sem setur líf hennar í hættu.

Þegar fólk ber að garði sem bendir á þá einföldu staðreynd að aðskilnaður andvana fósturs og móðurinnar er grundvöllur áframhaldandi lífs móðurinnar, þá er þeim og fjallkonunni hótað með eldi og brennisteini. (Virðist greinilega vera í tísku hjá stjórnarandstöðunni sem svar við öllu núorðið. Af hverju fer stjórnarandstaðan ekki bara til Bárðarbúngu? Nóg er að taka af þar).

Málið er viðkvæmt. Dagur breytinga er kominn. 

Fjallkonan verður að fá að lifa.

 

Breskur NATO-hershöfðingi varar við allsherjarstríði við Rússa

Í ræðu í fyrri viku sagði Sir Adrian Bradshaw, hershöfðingi frá Bretlandi, að ógn Rússa væri "afgerandi ógn gegn allri tilveru okkar." Að sögn Daily Express varaði hann við, að Pútín gæti ráðist á NATO-ríki eins og Baltísku löndin til að breyta landamærum Evrópu.

"Við sjáuum hefðbundinn herafla Rússlands upptekinn við að aðstoða aðskilnaðarsinna að hertaka landssvæði í Austur-Úkraínu, þrátt fyrir blygðunarlausa afneitun í Kreml."

"Ógn Rússlands og hættan á mistökum sem hún hefur í för með sér geta leitt til allsherjarstríðs burtséð frá því, hversu ólíklegt við teljum að slíkt geti gerst; þetta er afgerandi ógn við gjörvalla tilveru okkar."

Þessi varnaðarorð koma tveimur dögum eftir að varnarmálaráðherra Breta, Michael Fallon, talaði í sömu veru og sagði Rússa vera "skýra, yfirstandandi ógn."

Ivan Ivanovic

Ég tók viðtal í dag við 95 ára gamlan Úkraínumann, sem búið hefur í Stokkhólmi frá stríðslokum seinni heimsstyrjaldar. Hann telur það útilokað mál að semja við Pútín og í reynd glataðan tíma. Ivan telur eina málið, sem Pútín hlustar á vera stríðsógn.  

"Pútín er enginn geðsjúklingur, hann kemur frá KGB og er njósnari. Markmið hans er að endurreisa landamæri Sovéts og hann hlustar ekki á neitt nema stríðsógn. Úkraína þarf á vopnum að halda til að mæta nútímavopnum Rússa í austurhlutanum. Ég trúi ekki á þvingun í herinn, meira á taktík eins og Víetnamstríðið."

Viðtalið verður flutt í Útvarpi Sögu fimmtudagsmorgun milli 7 og 8.

20 skriðdrekar og 10 flugskeytapallar frá Rússlandi í dag til nágrennis Mariopol

Rússar sendu a.m.k. 20 skriðdreka og 10 færanlega flugskeytapalla yfir landamærin til nágrennis hafnarborgarinnar Maríopól í Austur-Úkraínu í dag. Einnig hefur sést til rútulestar fullri af rússneskum hermönnum fara yfir landamærin á leiðinni þangað. 

ESB-nefnd efri deildar brezka þingsins lýsti yfir í dag, að ESB hefði gengið í svefni, þegar kreppan í Úkraínu hófst og gróflega mistúlkað stemninguna í Kreml í aðdraganda innrásar Rússa í Úkraínu, er þeir hernámu Krím-skagann.

Vopnahléið er varla vikugamalt, þegar Úkraína og USA ásaka aðskilnaðarsinna um að hafa rofið það a.m.k. 250 sinnum. 

Sænska sjónvarpið sýndi beint frá því, þegar hermenn komu heim eftir að hafa verið hraktir á flótta frá Debaltseve. Nokkrir hermenn mótmæltu því harðlega, að um skipulagt fráhvarf hafi verið að ræða og kröfðust þess við heimkomuna, að Porósjenkó Úkraínuforseti bæðist þjóðina afsökunar á röngum upplýsingum um flóttann. Jafnframt sögðu þeir að langtum fleiri hermenn hefðu dáið en ríkisstjórnin hefði gefið upp.

Það var þéttstaðið á brautarstöðinni, ættingjar og vinir tóku á móti hermönnum og hylltu þá fyrir að vilja fórna lífum sínum fyrir Úkraínu. Eitt ár er liðið frá átökunum á Sjálfstæðistorginu í Kíev, þegar fyrrum Rússahollur forseti Úkraínu hrökklaðist frá völdum.

Þýzkaland mun fleygja kústsköftunum og hefja vopnaframleiðslu fyrir þýzka herinn, þegar öllum má ljóst vera, að Pútín meinar alvöru með að endurreisa gömul landamæri Sovétríkisins. Margir í baltísku löndunum búast við svipuðu ástandi meðal rússneskt mælandi eins og gerðist í Austur Úkraínu í aðdraganda hernáms Krímskagans. Pútín virðist halda að hann komist upp með hvað sem er og allur átakaferillinn stefnir því miður í blóðug stórátök milli Natóríkja og Rússlands.

Fer fram sem vindur getur pandóruaskja helvítis opnast enn á ný í Evrópu: Styrjöld með öfgaöflum múslíma er kenna sig við kalífatið IS í suðri með árásum inni í Evrópu og Vesturveldin með Bandaríkin, Breta og Þýzkaland sem fremstu bandamenn í stórstyrjöld gegn heimsyfirráðum Rússa.  

Með kústsköft í stað vélbyssa

Neyðarkall frá Úkraínu

Í fréttatíma sænska sjónvarpsins í kvöld sagði fréttakonan Elin Jönsson að flótti Úkraínuhers frá Debaltseve væri á vörum allra, sem hún hefði talað við í dag í Úkraínu. Þúsund kílómetra frá víglínunni liggur borgin Lviv en vegalengdin frá stríðinu nær ekki að koma í veg fyrir hræðsluna sem nú breiðist út meðal íbúa Úkraínu jafnvel í vestur hlutanum. 

Friðarvonin er langt í burtu segja margir staðarbúar.

"Ég er mjög hrædd. Þetta er óhugnanlegt. Ég vona að bardagarnir komi ekki hingað. Ég held ekki að það verði friðsamleg lausn," segir María sem ekki vill gefa upp eftirnafnið.

"Ég trúi ekki á neina lausn stríðsins í bráð. Margir fleiri munu deyja. Aðeins Guð og Pútín vita, hvernig þetta endar," segir annar íbúi, Anatol.

"Brot gegn friðarsamningnum er notað sem afsökun til að hervæðast, þrátt fyrir að Pútín tali um frið" segir Elin Jönsson. 

"Pútín mun ekki láta sér nægja Krím og núna austurhluta landsins. Hann gæti farið alla leiðina til Varsjár" segja raddir á götunni. 

Fólk er reitt og þreytt á Pórósjenkó, sem reyndi að láta líta svo út að flóttinn hafi verið skipulagður og yfirvegaður. Frásagnir hermanna og íbúa vitna um annað og fjöldi fallinna hermanna og særðra er sagður miklu meiri en opinberlega er gefið upp. Hermennirnir voru innikróaðir af her aðskilnaðarsinna og Rússa og mannfall hefði orðið miklu meira ef ekki hefði verið flúið af hólmi.

Hermaðurinn Rostislav telur að rangir hlutir hafi verið í fókus í friðarsamningnum. Hann telur að leggja hefði átt áherslu á að loka landamærunum að Rússlandi til að koma í veg fyrir hernaðargögn og aðstoð Rússa við aðskilnaðarsinna.

"Ef landamærunum væri lokað lyki stríðinu á tveimur vikum. Í hvert skipti sem Rússar senda "mannúðarsendingar" setjum við á okkur hjálmana. Við vitum hvað bíður okkar," segir Rostislav.

Pórósjenkó sendi neyðarkall till Bandaríkjamanna og Evrópusambandsins og bað um aðstoð í dag. 

Úkraínskar hersveitir hörfa

Áróðursbréf rússnesku Dúmunnar hótar stríði í allri Evrópu

EUbloggen upplýsir um bréf sem forseti rússnesku dúmunnar (þingsins) S.J. Naryshkin skrifaði dags. 23. jan. m.a. til þingmanna Evrópuþingsins og þingmanna allra Evrópuríkja með ákalli þingmanna rússnesku dúmunnar um að stöðva þá kreppu sem "þegar hefur orsakað harmleik og eyðileggingu í Suðaustur-Úkraínu og setur möguleika á lífi í friði í hættu fyrir 800 miljónir Evrópubúa." Að sögn EUbloggen barst bréfið til Svíþjóðar frá rússneska sendiráðinu í Stokkhólmi og er liður í áróðursherferð Rússa út um allan hinn vestræna heim.

Bréfið lýsir fyrri stórverkum Sovéttímans og afmælis sigurs Bandamanna yfir nazismanum og Hitler í seinni heimsstyrjöldinni og dregur upp mynd Rússa af yfirvofandi stórstyrjöld í náinni framtíð og ákalli um "samstöðu": " Við hvetjum ykkur heiðvirtu samstarfsmenn að skilja í hvaða stöðu heimurinn er kominn á sjötugasta afmælisdegi Sigursins og gera allt sem er mögulegt til að 2015 verði ekki ár af átökum og aðskilnaði heldur enduruppbyggingu trausts og sameiginlegs átaks fyrir sameinaða andfasíska og örugga Evrópu."

Kerstin Lundgren talsmaður Miðflokks Svíþjóðar í utanríkismálum segir um bréfið að það sýni hversu fastir þingmenn Dúmunnar sitja í Pútínbólunni. "Það óhuggulega er, þegar þeir byrja að trúa eigin áróðri og sjá drauga sem ekki eru til." 

Bréfið á sænsku: Rysslands Statsdumas Vädjan februari 2015

Allt Vesturlöndum að kenna segir Pútín

Vopnahlé eða heimsstyrjöld?

Skilaboð dagsins er, að nýr fundur Angelu Merkel kanslara Þýzkalands, Francois Hollande Frakklandsforseta og Petró Pórósjenkó forseta Úkraínu með Vladimir Pútín forseta Rússlands verði haldinn í borginni Minsk í Hvíta Rússlandi á miðvikudag. Þar verður gerð úrslitatilraun til að fá forseta Rússlands til að fallast á friðarumleitanir aðallega Þýzkalands og Frakklands. Á sama tíma auka aðskilnaðarsinnar bardaga og sækja fram í Úkraínu. Í sjónvarpsviðtali eftir fundinn í dag sagði Valdimir Pútín, að fundurinn í Minsk verði einungis haldinn ef Vesturveldin samþykki fimm liða kröfur sem Rússland vill fá samþykktar til að mæta á fundinn. Pútin útskýrði ekki hverjar kröfurnar væru en sagði að þær hefðu verið mikið ræddar síðustu daga.

Philip Breedlove æðsti yfirmaður NATO sagði á laugardag að hernaðarbandalagið íhugi "hernaðarlega valkosti" til að leysa Úkraínukreppuna. Hann forkastaði friðartillögum Vladimir Pútins sem "algjörlega ósamþykkjanlegum."

Angela Merkel kanslari Þýzkalands flaug eftir fundinn með Pútín til Bandaríkjanna til viðtals við Obama Bandaríkjaforseta. Utanríkisráðherra Breta Philip Hammond sagði, að fundurinn í Minsk væri síðasti möguleiki Vladímír Pútíns forseta Rússlands til að komast hjá fleiri viðskiptaþvingunum. Hann var harðorður í garð Pútíns í sjónvarpsræðu í dag og ásakar Pútín fyrir að færa heiminn aldir aftur í tímann með hertöku á landssvæði sjálfstæðs ríkis á tuttugustu og fyrstu öldinni."Svona höguðu einræðisherrar sér á miðri tuttugustu öldinni."

Gudrun Persson Rússlandssérfræðingur hjá rannsóknardeild Varnarmálastofnunar sænska hersins segir, að ástandið í Evrópu sé orðið afar eldfimt og það að fólk byrji að spyrja spurningar um nýja heimsstyrjöld sýni hversu hættuleg staðan sé orðin. Gudrun segir, að afstaða Rússa sé að Úkraína tilheyri Rússlandi og þeir setji fram kröfu um að endurrita landamærin á kortum sem er brot á gildandi öryggisreglum í Evrópu. Rússland hefur byr undir báða vængi eftir innlimun Krímskagans og margir í vestri trúa að viðskiptaþvinganir Vesturvelda hafi haft áhrif.

Rússnesk yfirvöld segja við Rússa að Vesturveldin ráðist á Rússland og Rússar þurfi að verjast. Það er stefnan sem ræður og Rússar eru stilltir inn á að sameinast á erfiðri stundu til að verjast árás óvinarins. "Við vitnum ástand, þar sem innri skerðing tjáningarfrelsis og takmörkun leyfa til kröfugangna ásamt auknu ríkiseftirliti með Internet og fjölmiðlum í árásargjarnari ferli, allt stigmagnar þetta hvert annað og eykur styrkleikann. Þess vegna er ástandið svo hættulegt." 

Þýzka blaðið Frankfurter Allgemeiner hefur í dag eftir þýzkri öryggisstofnun, að allt að 50 þúsund manns hafi látið lífið í Úkraínustríðinu. Opinberar tölur tala um að 1200 hermenn og 5400 óbreyttra borgara hafi misst lífið. Síðustu tölur frá Sameinuðu þjóðunum eru 5.358 persónur. En skv. þýzkri öryggisstofnun má margfalda töluna með tíu.

 

Hittast í Minsk á miðvikudag

VIÐVÖRUN Frakklandsforseta: Ef okkur mistekst er staðan STRÍÐ

 

 

 

 

 

 

 

 

 

 

Mörg stórveldi Vesturlanda með Þýzkalandi og Frakklandi í fararbroddi reyna nú til hins ítrasta að fá Pútín til að semja um frið í Úkraínu. En aðilar standa langt hver frá öðrum og eru duglegri í að flækja málin sem að endingu mun skapa stríð í fullum skala. Það eina sem heldur aftur af öðrum Vesturvöldum að senda vopn til Úkraínu er að fulltrúar Þýzkalands og Frakklands gera í dag trúlega síðustu tilraun til að binda endi á Úkraínustríðið.

Rússar fullyrða, að Nató hafi hermenn í Úkraínu og vitað er að Rússar sendu hermenn frá fyrstu stundu, þegar þeir tóku Krím, þótt reynt hafi verið að dylja í upphafi hverrar þjóðar hermennirnir voru. Sagan mun sýna, hvort þriðja heimsstyrjöldin hófst með innrás Rússa í Úkraínu og hertöku Krímar en ljóst er að sú aðgerð hefur kastað heiminum inn í þau átök sem nú er glímt við með svo dökkum framtíðarhorfum.

Í dag sunnudag mun endahnúturinn á núverandi samtölum með Pútín eiga sér stað með samtölum Angelu Merkels kanslara Þýzkalands, Francois Hollande Frakklandsforseta, Vladimír Pútíns forseta Rússlands och Petró Pórósjenkó forseta Úkraínu.

Hollande varaði við því í gær, "að ef okkur mistekst að ná varanlegu friðarsamkomulagi, þá vitum við vel hver staðan verður, hún hefur nafn, það kallast stríð" sagði Frakklandsforseti.

Fyrrverandi utanríkisráðherra Svíþjóðar Carl Bildt segir í viðtali við Frankfurter Allgeimeine Zeitung að ekki sé lengur hægt að útiloka stórstyrjöld milli Vesturvelda og Rússlands.

Carolina Vendil Pallin yfirmaður Rússlandsmála hjá Varnarmálanefnd sænska hersins segir það "verða erfitt fyrir Pútín að bakka frá þeim loforðum sem hann hefur gefið fólkinu. Hann hefur sagt að hann muni aldrei afhenda Krím, sem er liður í að sameina rússneska fólkið og hann hefur lofað að vernda Rússa erlendis. Ekki meðborgara heldur Rússa.

Það er alvarlegt að vísa til sögulegrar nærveru sem ástæðu til að hertaka Krím, það oppnar leiðir fyrir önnur lönd með söguleg tengsl. Það er box sem enginn vill opna."

 

 

 

„Tíminn að hlaupa frá okkur“