Sendum reikninginn til Kína

Árið 2020 fer til sögunnar sem árið, þegar kommúnistarnir í Kína slepptu heimagerðum sýkli á alla mannsbyggðina. Vopnið hefur sýnt sig afskaplega árangursríkt og hefur lagt allan hinn vestræna heim í sár sem viðvaningar í stjórnmálum hafa síðan bætt um betur með efnahagslegu sjálfsmorði. Því hvað annað er hægt að kalla ákvarðanir um að banna starfsmönnum fyrirtækja að vinna störf sín?

Við fengum öll að kynnast markmiðinu „fletjum kúfinn" til að koma í veg fyrir að heilbrigðiskerfið leggist á hliðina vegna ofhleðslu sjúklinga á gjörgæsludeildir og í öndunarvélar. Í Svíþjóð var sú ákvörðun tekin að láta þá eldri víkja fyrir þeim sem yngri eru, þegar sjúklingar voru fleiri en öndunarvélarnar. Var starfsfólki elliheimila skipað að gefa sjúkum gamalmennum höfuðverkjatöflu og morfín í stað hjúkrunar sem lögin segja að allir eiga rétt til. Svíþjóð hefur þar tekist einstaklega vel og slær margfaldlega öll dánarmet annarra Norðurlanda samanlagt. 

Útrás kínverskra kommúnista

Árið 2020 markar þannig upphafið af útrás kínverska kommúnisimans um heiminn. Eftir fyrstu árásina hafa kommúnistar á einu ári unnið efnahagslegt a.m.k. fimm ára forskot á Vesturlönd og stytt tímann til að verða stærra efnahagsveldi en Bandaríkin. Kínverskir kommúnistar stefna að heimsyfirráðum og hafa ýmsa volduga bandamenn sér við hlið ásamt vopnabúri. Útrásarvíkingar Wall Street og netrisarnir munu vinna fyrir markmið kommúnismans svo lengi sem þeir fá borgað fyrir það.

Kommúnistarnir telja Kína vera í umsátri kapítalismans. Fyrir kommúnistana gildir bara kommúnisminn, þeir viðurkenna ekki neitt annað. Það er makalaust að vitna hvernig Kommúnistaflokkur Kína hefur staðsett næstum tvær milljónir flokksmanna í viðskiptakerfi kapítalismans út um gjörvallan heim. Eru kommúnistar í alþjóðlegum fjármálafyrirtækjum, hjá helstu framleiðendum hins vestræna heims, stjórnarstofnunum, alþjóðastofnunum...bráðum verður ekki sá blettur sem dagsljós nær til, þar sem ekki verður hægt að þverfóta fyrir kínverskum njósnurum. 

Hvar er nýji botninn?

Margir stjórnmálamenn hafa hoppað um eins og höfuðlausar hænur þetta ár, lítið á þrotabú Reykjavíkur með kínversku strætóáætlun Dags og Össurar! Lítið á ríkisstjórn Íslands sem eytt hefur árinu í að rægja besta vin Íslendinga, Bandaríkjamenn, á meðan beðið er eftir því að Merkel skrifi fyrir hönd ESB undir samning,  sem ríkisstjórn Íslands er aðili að, við kínverska kommúnistaflokkinn. Íslenska ríkisstjórnin hefur keypt aflátsbréf af Birni Bjarnasyni um að innleiða lög ESB í íslensku stjórnarskrána sem færa mun Íslendinga aftur til tímabils dönsku einokunarverslunarinnar. Hvílík smán góðu landsmenn, sem þessi ríkisstjórn er fyrir allt hugsandi fólk og þeirra sem vilja ráða örlögum sínum sjálfir. Hvílík smán að þessi ríkisstjórn skuli hafa afhent orkuauðæfi landsins undir lögstjórn Evrópusambandins sem núna lítur á raforku Íslands sem hluta af sameiginlegri auðlind ESB. 

Verðið á íslenskum stjórnmálamönnum hefur svo oft verið gjaldfellt að sífellt meiri furðu sætir hvar botninn er eiginlega. Hvar svo sem hann er þá er Borgarfjörður fyrir löngu grafinn og marklaus sem viðmiðun.

Kveðjum árið með fögnuði og tökum stríðið við kommúnismann

Það verður fögnuður mikill að skilja við árið 2020 og upp á það skal haldið. Nýja árið mun ég og fjölskyldan fylgja eigin innblástri í stað þess að einblína á misvitur ráð, boð, reglur og skyldur jafn misviturra stjórnmálamanna sem taka sjálfir hvort sem er ekkert mark á þeim reglum sem þeir ákveða fyrir aðra. 

Árið 2021 verður árið þar sem fólk rís upp og kæfir kófið með því að byrja að faðma ættingjana aftur. 2021 verður árið þar sem við vöknum öll af þeim vonda draumi að vera tuskubrúður í höndum kínverska kommúnismans sem bæði hefur fengið og tekið til sín framleiðslu á helstu nauðsynjavörum eins og lyfjum fyrir aðra í heiminum. 

Eitt getum við þakkað George Soros fyrir: Hann hefur vakið okkur og innsæi okkar frá svefni prjáls og glyss og baráttan gegn honum og kommúnismanum að austan mun vaxa og eflast 2021. Endurræsingunni miklu mun ekki takast að koma böndum kommúnismans á vestræn þjóðríki, við erum mörg sem viljum viðhalda frelsinu eins og vinir vorir Bretar sýna í verki.

Gleðilegt ár og farsælt komandi ár 2021!

 

Athugasemdir

[Jóhann Elíasson, 31.12.2020 kl. 12:33]

Mjög góður pistill Gústaf og ég óska þér sömuleiðis gleðilegs árs með kærum þökkum fyrir árið sem er að líða og þá vil ég fyrst og fremst þakka þér fyrir stórgóða pistla þína á mánudögum á útvari Sögu.  Ég er reyndar sannfærður um að Kínverjar hafi "ræktað" þessa veiru og samhliða því hafi þeir þróað bóluefni gegn henni.  Að þessu loknu hafi þeir bólusett helstu frammámenn landsins, heilbrigðisstarfsmenn, lögreglu og æðstu menn hersins OG SÍÐAN SLEPPT VEIRUNNI LAUSRI og til þess að lýta "trúverðugir" út í augum heimsins hafi nokkur þúsund manns verið "LÁTNIR" deyja af völdum veirunnar.  Ég tek undir allt í  þessu pistli hjá þér og ef eitthvað er tekur þú of vægt til orða....

[Ingólfur Sigurðsson, 31.12.2020 kl. 13:53]

Takk fyrir góðan pistil. Ég vona innilega að Svíar nái að rísa upp gegn þeirri röngu stefnu sem þar hefur ríkt lengi. Svíþjóðardemókratar er sá flokkur sem gefur von um stefnubreytingu. Svíar eru stærsta norðurlandaþjóðin, og var fyrirmynd annarra landa hvað varðar velferðarkerfið áður en fjölmenningin setti þar allt á hliðina. 

Ungt fólk verður að skilja að öfgarnar eru ekki hjá þjóðernissinnum heldur hjá fjölmenningarliðinu sem selur allt sem heilagt og dýrmætt er, skemmir það og ógildir. Að fyllast af þakklæti í garð gömlu kynslóðanna sem byggðu allt upp er góður grunnur. Gleðilegt nýtt ár og takk fyrir það gamla. 

[Gústaf Adolf Skúlason, 31.12.2020 kl. 14:36]

Sælir heiðursmenn Jóhann og Ingólfur og þakka góð skrif og hugsanir. Er fyllilega sammála þér Jóhann, Sósíaldemókratar stæra sig gjarnan af því að hafa byggt upp „alþýðuheimilið" og eru í dag sjálfir að eyðileggja það. Útilokunarstefna tilheyrir þeim sem málefnalausir eru og hefur verið vonbrigði að upplifa í Svíþjóð að t.o.m. Moderatarnir eru enn í álagafjötrum krata. Eini raunhæfi valkosturinn til að bjarga Svíþjóð er að Svíþjóðardemókratar fari í ríkisstjórn. Samstarf t.d. í fjárlögum við M og Kd lofar góðu. En bæði M og Kd verða segjast vilja mynda ríkisstjórn með Sd. Ég vona að það komi fyrir kosningarnar 2022. 

[Ómar Ragnarsson, 31.12.2020 kl. 22:25]

1917 barst ný "heimagerð" veira frá Bandaríkjunum til Evrópu og um allan heim. Kölluð spánska veikin.  Í kjölfar þátttöku Bandaríkjanna í Heimstyrjöldinni þetta ár urðu Bandaríkin öflugasta efnahagsveldi heims í heila öld. 

Er rétt að orða þetta svona, Gústaf? 

[Gústaf Adolf Skúlason, 1.1.2021 kl. 08:01]

Gleðilegt ár Ómar og þakka innlit. Varla væri spánska veikin nefnd slík ef upprunnin væri í Bandaríkjunum. Kommúnistaflokkur Kína matar landsmenn á þeim lygaáróðri, að veiran frá Wuhan, sem búin var til á lífefnatilraunastofu Alþýðuhersins, sé frá Bandaríkjunum komin...trúir þú því?

Bandaríkjamenn færðu einar mestu fórnir Bandamanna í seinni heimsstyrjöldinni, þannig að samanburður á efnahagslegum ávinningi kínverskra kommúnista í kjölfar efnhagslegrar stöðvunar Vesturlanda vegna veirunnar er út í hött. Ég trúi því ekki að óreyndu að þér líki við framkomu kommúnista Kína sem létu WHO fresta tilkynningu um farsótt svo þeir gætu notað tímann og keypt upp allar fáanlegar öndunarvélar á sjúkrahúsum Vesturlanda.

Nær væri að líkja kommúnistaflokki Kína við flokk nasista og Xi Jinping við Foringjann, báðir dyggilega studdir af fjárstinnum aðilum á Wall Street sem aðstoðuðu og aðstoða á ný við uppbyggingu vítisvélar sem beitt er gegn Vestrænum ríkjum. 

[Jónatan Karlsson, 1.1.2021 kl. 09:16]

Ég veit ekki hvort ég á að hlæja eða gráta yfir söguskýringum síðuhafa, en Ómari tekst að skjóta laglegu skoti á hann, sem mér sýnist hann þó því miður ekki hafa áttað sig á, eða skilið.