Krefjast á afsagnar borgarstjórans og boða til aukakosninga í Reykjavík

Það er augljóst á síðustu fréttum um ákvörðun meirihluta borgarstjórnar Reykjavíkur um að sniðganga ísraelskar vörur til stuðnings Palestínumönnum, að sú ákvörðun hefur þegar skaðað vörumerkið Ísland verulega. Fréttir berast um afbókanir ferða til Íslands og eins og forsætisráðherrann segir í viðtali við Morgunblaðið: „Við höf­um fengið upp­lýs­ing­ar um að þessi ákvörðun kunni þegar að hafa valdið tals­verðu tjóni. Fyr­ir­tæki og ein­stak­ling­ar hafi ákveðið að hætta viðskipt­um við Ísland og hætta að kaupa og selja ís­lensk­ar vör­ur. Það ligg­ur enn­frem­ur fyr­ir eft­ir vinnu dags­ins að þess­ar aðgerðir Reykja­vík­ur­borg­ar eiga sér ekki stoð í lög­um, ganga raun­ar gegn lög­um og gegn alþjóðsamn­ing­um sem við Íslend­ing­ar eig­um aðild að."

Sköðuð ímynd Íslands tekur áratugi að laga. Sú ímynd byggðist heldur ekki upp á einum degi, sem veitt hefur Íslendingum grundvöll farsælla viðskipta við umheiminn og útflutning á afurðum landsmanna. Þar hafa margir lagt hendur á plóginn, útflytjendur sjálfir, samtök atvinnulífsins, útflutningsráð, sameiginleg markaðsverkefni framleiðenda og samtaka þeirra í samstarfi við yfirvöld til að gera hróður Íslands sem mestan og afurðir okkar að góðri söluvöru erlendis. Miklum fjármunum hefur verið varið til að byggja upp vörumerkið Ísland og þá gæðaímynd, sem tengist Íslandi og afurðum okkar. Þetta starf er einkar þýðingarmikið, þar sem Ísland er svo lítil þjóð og alfarið háð útflutningi til að afla gjaldeyristekna svo hægt sé að standa undir innflutningi nauðsynja eins og olíu, stáls, véla og byggingarefnis svo dæmi séu tekin. 

Það er einmitt þessu góða samstarfi að þakka, að Íslendingar hafa náð stigi lífskjara sem gefa ekkert eftir iðnvæddari og ríkari þjóðum heims.

Það er algjörlega ónauðsynlegt að meirihluti Reykjavíkurborgar eyðileggi þennan grundvöll að velferð landsmanna einungis til þess að fullnægja einkaþörf pólitískra afglapa sem vilja njóta 15 mínútna fjölmiðlafrægðar í nafni Hamas og Palestínufólks. Fjórflokkur Samfylkingarfólks, Bjartrar framtíðar, Pírata og Vinstri grænna styður hryðjuverkasamtök, sem hafa það á stefnuskrá sinni að afmá Ísrael af landakortinu.

Þetta var liður nr 2 í mikilvægi borgarstjórnarfundarins 15. sept. skv fundargerð: 

"2. Lögð fram svohljóðandi tillaga Bjarkar Vilhelmsdóttur borgarfulltrúa: 

 

Borgarstjórn samþykkir að fela skrifstofu borgarstjóra í samvinnu við innkaupadeild Reykjavíkurborgar að undirbúa og útfæra sniðgöngu Reykjavíkurborgar á ísraelskum vörum meðan hernám Ísraelsríkis á landsvæði Palestínumanna varir.

 

Greinargerð fylgir tillögunni. 

 

Samþykkt með 9 atkvæðum borgarfulltrúa Samfylkingarinnar, Bjartrar framtíðar, Vinstri grænna og Pírata gegn 6 atkvæðum borgarfulltrúa Sjálfstæðisflokksins og Framsóknar og flugvallarvina."

 

Eru þessi 9 borgarfulltrúar borgunarmenn fyrir þeim skaða á hagsmunum landsmanna, sem þessi samþykkt hefur í för með sér? Geta þessir níumenningar borgað þann skaða sem vörumerkið Ísland og ímynd landsins okkar hefur orðið fyrir vegna þessarrar bókunar? Geta þessir níumenningar bætt vörumerkinu Ísland þann álitshnekki, sem ákvörðun þeirra hefur valdið á alþjóðavísu?

 

Að sjálfsögðu ekki. Þetta fólk tekur enga ábyrgð á gerðum sínum. Það notar valdastöðu og umboð kjósenda til að fullnægja eigin hégóma til að komast sjálft í kastljósið. Hvað það kostar okkur hin skiptir engu máli. Það ætti öllum líka að vera ljóst eftir áralangt botnlaust sukk í fjármálum borgarinnar sem vinstra liðið notar í eigin dekurverkefni á meðan heilsugæsla, skólamál, gatnagerðarmál m.fl. er látið sitja á hakanum.

 

Engan þarf að undra að þetta fólk brjóti stjórnarskrá og önnur lög. Mestu skrumskælingjar nútímans með Pírötum sem þykjast vera lýðræðissinnar en selja hugsjónina fyrir flatbotnað pláss í valdaklíku Samfylkingar og Bjartrar með Vinstri græna í bandi. 

 

Ef Reykjavíkurbúar vilja ekki fara undir með vinstra liðinu sem í leiðinni ætlar að eyðileggja mikilvægan útflutning landsins sem stendur undir velferð landsmanna, þá er bara eitt verk sem allir ættu að taka höndum saman um að vinna:

 

Krefjast tafarlausar afsagnar borgarstjórans og boða til aukakosninga um nýja borgarstjórn. 

 

Hvað útflutningsskaðann varðar, þarf ríkisstjórnin að gefa út stutta og skýra yfirlýsingu sem tekur af allan vafa um að handvömm meirihlutans í Reykjavík er hvorki í samræmi við stefnu landsmanna né fari eftir stjórnarskránni. Yfirlýsinguna þarf að senda til sendiráða og til allra erlendra aðila í viðskiptum við landið og svo þarf yfirlýsingin að vera aðgengileg á a.m.k. ensku fyrir útflytjendur svo þeir geti sent hana til viðskiptavina sinna.

Hvað útfærslu vitleysunnar um að kaupa ekki vörur frá Ísrael varðar, sagði borgarstjórinn að þetta sé spurning um mannréttindi líka. Hefur meirihlutinn gert lista yfir lönd sem brjóta mannréttindi í heiminum? Hefur meirihlutinn gert lista yfir þær vörur sem innkaupadeild Reykjavíkur á að sniðganga?

 

Eða er það kanski háð duttlungum innkaupastjórans hverju sinni?

 

Nýjar kosningar einar geta forðað landinu frá frekari tjóni þessarrar Hamassjálfsmorðssveitar Samfylkingarmanna, Bjarts framtíðarfólks, Pírata og Vinstrigrænna.  

Reynt að lágmarka tjónið

BIG BANG í fyrstu viku október 2015 segir Martin Armstrong

Verðfall Dow Jones um 3,5% í gær í USA þýddi að 811 miljarðir dollarar hurfu upp í reyk. Eða eigum við að segja að pínulítið loft hafi farið úr tunnunni? Sumir telja að verðbréfamarkaðir Bandaríkjanna séu ofmetnir allt að 80% og ef það er rétt, þá er 3,5% engin alvöru leiðrétting. Margir segja, að sú leiðrétting sé væntanleg eftir rúman mánuð t.d. Martin Armstrong sem spáir BIG BANG í fyrstu viku október 2015 (viðtalið var tekið 25. janúar í ár). Það verður þá sprenging skuldasöfnunarbólu vestrænna ríkja undanfarin ár frekar en dræmur hagvöxtur í Kína. Sænska sjónvarpið sýndi nýverið heimildarmyndina The Forecaster, þar sem sagt er frá kóda sem Armstrong þróaði eftir að hafa rannsakað efnahagshreyfingar í sögunni frá upphafi mannkyns. Margir hafa reynt að komast yfir kódann sem segir fyrir um fjárhagshreyfingar með ísmeygilegri nákvæmni, t.d. fannst listi yfir komandi atburði í tölvu hans eftir að hann var settur í fangelsi fyrir fjárhagsafbrot ár 2000. Allir hlutir á listanum hafa ræst upp á dag og eini atburðurinn sem eftir á að gerast er BIG BANG í fyrstu viku október 2015.  

Í Bretlandi hurfu 70 miljarðir punda þennan svarta mánudag bara í fyrirtækjageiranum. Fyrrum ráðgjafi Gordon Brown hvetur Breta að koma sér upp mánaðar birgðum af vatni og dósamat, vegna þess að kínverski váboðinn muni skapa efnahagslegt blóðbað í heiminum. Í fjölda tísta undirbýr Damian McBride fólk fyrir verra hruni en 2008 núna þegar markaðir halda áfram að falla. Hann ráðleggur fólki að setja fé sitt á öruggan stað, safna vatnsbirgðum og dósamat og ákveða fundarstað með ástvinum sínum ef öll fjarskipti stöðvast í Bretlandi. Ráð nr. 1: taktu út alla peningana þína, ef bankar og hraðbankar loka eða bankakort hætta að virka.

Markaðir réttu sig aðeins fyrir lokun í gær en þar sem tölvur stýra ferðinni, þá verða niðursveiflurnar stórar, þegar allir vilja selja en engir kaupa á miljónhluta sekúndu. Þeir sem veðjuðu á hrun og gjaldeyrislækkun kínverska gjaldmiðilsins eru orðnir afar loðnir um lófana vegna gróða, því hægt er að veðja um úrslitin svona rétt eins og svart eða rautt á spilaborðinu áður en hjólið er látið snúast.

Kauphallir og verðbréfamarkaðir eru eins og peningakerfið - allt orðið að snarbrjáluðu spilavíti og venjulegt fólk og framleiðsla og venjulegir viðskiptamátar koma þessu ekkert lengur við. Útrásavíkingar og Jónar út um allt með mútuðum Hönnum og Grímum í eftirdangli en fólk og venjuleg fyrirtæki látin lönd og leið. Ísland var bara æfingin og sjá, það mátti komast út úr reyknum. Því miður gildir það sama ekki fyrir önnur lönd sem tæmt hafa ríkissjóði og lánað upp fyrir haus og allt rekið á mínus. Ekkert skjól finnst lengur fyrir vannærð verðhallardýr til að fela beinin og éta upp síðustu leifarnar. Þá verður ráðist á innistæður bankaeiganda og byrjað á stórum lífeyrissjóðum eins og ESB hefur æft sig í. Eftir það koma eiguleg fyrirtæki og þeir sem hafa unnið heiðarlega alla sína ævi. Þeirra hag verður rústað á altari Mammons, sem taka mun heilu samfélögin með sér í skuldadjúpið. Alþjóðabankinn, Alþjóðagjaldeyrissjóðurinn, samfélag seðlabanka eru öll í höndum fjárglæframanna sem best væru geymdir á bak við lás og slá.  Stjórnmálamenn margir þora ekki að taka slaginn við bankafólkið en þann slag verður að taka og ef ekki þeir kjörnu þá fótgönguliðið. 

Tjaldið hefur verið dregið frá síðastu senunni í skuldabólukapphlaupi hins vestræna heims. Og endirinn verður mikill.

 

Lækkuðu mikið í viðskiptum dagsins

Með Pútín verður föstudagur alla daga

Stundum eru mál það mikilvæg, að það sem skrifað er á föstudegi stendur gjarnan daginn eftir sem og aðra daga. Þannig er það með grein Björns Bjarnasonar um Rússaviðskipti, sem birtist í miðopnu Morgunblaðsins á föstudegi og var endurtekin á laugardegi alla vega í netupplagi blaðsins. Stundum ber svo við, að mál verða svo yfirþyrmileg að dagarnir allir, mánuðir og jafnvel heilu árin fara í að breyta stöðunni svo venjulegir vikudagar hverfa allir í eitt mál og önnur bíða á meðan. Þannig er það með styrjaldir og er hið nýja kalda stríð engin undantekning. Pútín hefur stolið friðardögum heimsins og sýnir alla tilburði til að þróa hið nýja kalda stríð yfir í stórstyrjöld. 

Morgunblaðið hefur áður vakið athygli fyrir nýstárlegar aðferðir, t.d. þegar blaðið skipti endum, sem bar með sér boðskapinn "í uppahafi skal endirinn skoðaður". Passar það framar öllu við starfsstíl opinberra embættismanna, sem til þess eru kosnir að fara með stefnu Íslendinga í utanríkis- sem og öðrum málum að gera áhættugreiningu áður en ákvörðun er tekin. Bæði Björn Bjarnason og Morgunblaðið vekja athygli á skorti á minnisblöðum, sem sýnir að lítið sjálfstætt mat á eðli viðskiptabanns Bandaríkjamanna og ESB við Rússa og þróun þess hafi átt sér stað. Skal Morgunblaðið hafa þakkir fyrir hafa riðið á vaðið einn íslenskra fjölmiðla með skilgreiningu á viðskiptabanninu og einfaldri samlíkingu við teygjubyssuframleiðslu, sem varpar skýru ljósi á eðli þess. Björn Bjarnason segir í grein sinni föstudaginn 21. ágúst, sem endurtekin var laugardaginn 22. ágúst, að "Viðskiptaþvinganir ESB/EES-ríkjanna sem boðaðar voru eftir innlimun Krímskaga snérust um þáttöku Rússa í G8-samstarfinu, ferðabann á nokkra tugi lykilmanna í Rússlandi, bann við nánar skilgreindum fjármálasamskiptum og sölu á vopnabúnaði til Rússlands. Allt er þetta utan við hefðbundin viðskipti Íslendinga og Rússa." 

Það eru Rússar, sem eru að beita Íslandi viðskiptaþvingunum til að hafa áhrif á Íslendinga og rjúfa samstöðu þeirra með lýðræðislegum öflum sem sætta sig ekki við rof Pútíns á heimsfriðinum. Er Rússum eflaust skemmt að sjá vel heppnaða aðgerð gegn Íslandi sem leiðir til náðarbónar forseta Íslands fyrir makrílútflytjendur við sendiherra Rússa. Það eru að sjálfsögðu Rússar en ekki Íslendingar sem ákveða, hvort matvæli skulu flutt inn til Rússlands. Viðskiptabannið gagnvart Rússum er eins og Morgunblaðið og Björn Bjarnason benda á "utanvið hefðbundin viðskipti Íslendinga og Rússa" og því eru Rússar hér einungis að sýna mátt sinn og marka skref í baráttunni um Norðurslóðir.

Það er mjög gott að þessi umræða á sér stað. Við þurfum að hjálpa embættismönnum okkar að hafa fæturna á jörðinni. Vonandi verða vinnubrögðin endurskoðuð svo stjórnsýslan verði virkari og við komumst í framtíðinni hjá neyðarlegum eftiráviðbrögðum sem ekki leysa eitt eða neitt. 

Eðli málsins krefst þess. Burtséð frá hættunni á að stórstyrjöld brjótist út, þá verða Íslendingar að hafa á hreinu, hvernig hagsmunum landsins skuli stýrt. Það er svo miklu meira sem hægt er að fleygja í hafið en 35 makrílmiljörðum. Ungu forystumennirnir okkar Sigmundur Davið Gunnlaugsson forsætisráðherra og Bjarni Benediktsson fjármálaráðherra hafa á skömmum tíma náð góðum árangri á sviði ríkisfjármála og eru nú að sjóast sem forystumenn í þjóðmálum. Ég trúi ekki öðru en að ríkisstjórnin taki á utanríkismálunum með festu eftir þetta og þá mun makrílmissirinn þrátt fyrir allt koma einhverju góðu til leiðar.

 

Landfræðileg staða Íslands aftur í fókus í átakaferli stórveldanna

Reykjavíkurbréf Morgunblaðsins 15. ágúst sýnir á einkar skýran hátt, hvernig stjórnkerfið hefur brugðist skyldum sínum við mótun og vinnu sjálfstæðrar utanríkisstefnu Íslendinga. Engu er líkar en að stjórnkerfið hafi farið úr böndunum með hrunstjórn Jóhönnu Sigurðardóttur enda markvisst unnið að eyðileggingu þess af fyrri ríkisstjórn. Núverandi ríkisstjórn hefur einhverra hluta vegna ekki enn náð að tryggja að nýju haldbær vinnubrögð fyrir sjálfstæða stefnumótun í utanríkismálum Íslands. Vegna þessa "var heldur ekki athugað og kynnt viðeigandi aðilum hvert eðli viðskiptabanns á Rússa er" (Reykjavíkurbréf MBL). Er allt viðskiptabannsmálið hið neyðarlegasta fyrir Íslendinga með mögulegum kostnaði yfir 30 miljarðum króna. Það jákvæða við þessu dýru mistök er, að Íslendingar geta breytt heimatilbúnum forsendum þeirra og lagað stjórnsýsluna að sjálfstæðri stefnumyndun landsins. Mikið hefur áunnist eftir þjóðarbaráttuna gegn Icesave en betur má ef duga skal.

Það sorglegasta í þessu dæmi er sjálf orsökin að hinu gallaða, umdeilda viðskiptabanni Bandaríkjamanna og ESB gagnvart Rússum. Það skiptir engu máli, hvaða rök eru notuð til að réttlæta Rússa, þeir hafa rofið friðarsáttmálann eftir seinni heimsstyrjöldina um að ríki breyti ekki landamærum sínum með hervaldi. Skiptir engu máli, hversu oft Rússar neita að kannast við "grænu mennina" og haldi því fram, að þeir eigi engan þátt í Úkraínustríðinu eða hertöku Krímskagans eða þá að aðrir hafi skotið niður farþegaflugvélina yfir Úkraínu. Sönnunargögnin gegn Rússlandi eru fleiri en nóg og í raun yfirþyrmandi. Gagnvart Úkraínu keyra Rússar með gömul slagorð fósturlandsstríðsins mikla og kalla alla fasista og nazista sem sækjast eftir sjálfstæðri Úkraínu og ríkisstjórn hliðhollari Úkraínumönnum í stað Rússa. Pútín hefur með athöfnum sínum steypt heiminum út í nýtt kallt stríð, sem er stærri ógn við heimsfriðinn en það fyrra og mátti þá stundum muna afar mjóu að ekki yrði úr alvöru stríð.

Fyrir íbúa Eystrarsaltsríkjanna og Finnlands, Svíþjóðar, Noregs, Danmörk, Póllands og annarra nærliggjandi ríkja er stríðsáminningin raunveruleg á hverjum degi. Það er líka skýring á inngöngu fleiri ríkja í Nató og ósk um aukna hernærveru til að vera við því versta búin: árás Rússlands á viðkomandi ríki. Í Rússlandi hefur áróðursmaskína Pútíns kynnt svo undir hræðslu við yfirvofandi kjarnorkuárás Vesturlanda, aðallega Bandaríkjanna, að íbúar ýmissa bæja í Rússlandi senda síðustu kveðjur til skyldmenna ef þeir sjá sérstaka skýjamyndanir á himni sem minna á sveppaský kjarnorkusprengju. 

Spurningin er, hvort Vesturveldin hafi ekki í raun og veru vaknað of seint. Pútín er að byggja upp eina stærstu stríðsvél veraldar og endurnýjar herbúnað allan t.d. með byggingu tíu nýrra kafbáta sem skotið geta kjarnorkusprengjum á hvaða land sem er í heiminum. Einnig á að framleiða 2300 skriðdreka af nýrri gerð sem nýlega var sýnd á hersýningu í Rússlandi. Þar voru nýju skriðdrekarnir látnir "dansa" í opnunaratriði sem samið var af einum meistara Bolshoi ballettsins. Gömlum Mig herþotum hefur verið skipt út fyrir nýjar Stealthþotur og hafa tvær þeirra m.a. æft sprengjuárásir bæði á Stokkhólm og Gotland. Í Kalíngrad hefur verið komið fyrir birgðum meðaldrægra kjarnorkusprengjueldflauga sem margfalt duga fyrir tortímingu Evrópu. Einnig hafa Rússar þróað háþróað loftvarnakerfi á færanlegum vögnum gegn innkomandi eldflaugum og sprengjum. En það er nýjasta vopnið í höndum Rússa, sem setur reynda Nató-hershöfðingja hljóða. Varnarkerfi sem slær út alla möguleika á fjarskiptum og gerir nútíma vopn ónothæf. T.d. er óvíst hvort hin nýja herþota Bandaríkjamanna F-35 hafi neitt að gera gegn hinni nýju tækni Rússanna. Jafnvel þótt Frakkar hafi rift sölusamningi á flugmóðurskipunum tveimur til Rússa og annar herbúnaður stöðvaður til Rússa, er stóra spurningin engu að síður sú, hvort það skipti Rússa nokkru máli úr því sem komið er. Pútín hefur lagt allt sitt undir nýtt herveldi sem honum hefur að hluta til tekist að byggja upp á meðan Vesturlöndin hafa verið sofandi eða ekki viljað sjá, hvað hann hefur haft fyrir stafni.

Hið nýja vopn Rússa hefur verið reynt í Úkraínu og þar slegið út öll tæknileg samskipti Úkraínuhers og eyðilagt samskipti við herbúnað sem styðst við GPS. Að sögn sænska dagblaðsins segir Pelle Ydstebö á norska Varnarmálaskólanum, að Rússar hafi endurnýjað stríðsbúnað sinn á öflugan hátt eftir Georgíustríðið 2008. Hann bendir einnig á að nútíma hertækni og nákvæmisvopn reiði sig á GPS. "Ef þú hefur andstæðing sem getur slegið út GPS sendiboð og þig skortir vörn gegn slíku, þá verður allt ónýtt" segir Ydstebö.

Það er einkum hið nýja vopnakerfi "Borisoglebsk 2" sem leitar uppi sambönd við gervihnetti og símasamskipti og stöðvar slík samskipti, sem sýnir hversu langt Rússar eru komnir í vopnaþróuninni. Þetta vopn hafa Rússar notað í Úkraínu með svo góðum árangri, að Úkraínuherinn hefur látið herþotur sínar vera á jörðinni, þar sem þær reynast gagnlausar.

Það er ofurtrú á möguleikum embættismanna á Íslandi t.d. forsetans og utanríkisráðherrans að halda, að þeir geti breytt útspilum stórveldanna í átökum sín á milli. Eina þýðingin sem Ísland hefur er landfræðileg staða landsins og mun sá aðili sem hefur möguleika á að notast við Ísland í baráttunni um norðurslóðir njóta þeirrar stöðu.  

Íslendingar verða sem fyrr að miða sína utanríkisstefnu við hagsmuni landsmanna byggða á þeirri staðreynd að landið er herlaust og auðveldur biti fyrir næstum því hvaða herveldi sem er. Það er sjálfsögð krafa, að embættismenn vinni sína heimavinnu og móti stefnu byggða á staðreyndum mála og ætti landið að forðast í lengstu lög að verða að einhverju bitbeini í stórveldaátökunum eins og nú hefur orðið með viðskiptabanni stórveldanna.

Það góða í málinu er að vonandi verður umræðan til þess, að ríkisstjórnin taki af skarið á þessu sviði eins og hún hefur gert í öðrum málum t.d. gert varðandi skuldaleiðréttingu heimilanna. Annars verður eins og höfundur Reykjavíkurbréfs skrifar "eins gott að henda þessum 35 miljörðum króna í hafið án frekari viðhafnar." 

Mikið misræmi í áhrifum refsiaðgerða

Ísland eina lýðræðisríkið

Í fyrri viku náði ég tali við Dr. Paul Craig Roberts fyrrum aðstoðarráðherra efnahagsmála í ríkisstjórn Ronald Reagans 1981 - 1982. Var efni samtalsins og hluti þess fluttur í morgunþætti útvarps SÖGU þriðjudagsmorgun 28. júli.

Dr. Paul Craig Roberts var viðkunnanlegur og svaraði góðfúslega spurningum mínum um ástandið í Grikklandi og Evrópu en hann hefur sent frá sér mikið magn greina um þessi mál og er tíður gestur í útvarps- og sjónvarpsviðtölum um efnahagsmál og stjórnmál. Hann hefur hlotið fjölda viðurkenninga fyrir greinarskrif, var einn af ritstjórum Wall Street Journal um tíma, talinn einn af 7 færustu blaðamönnum Bandaríkjanna af Forbes á tímabili og hefur skrifað fjölda bóka um efnahags- og stjórnmál m.a. ”Einræði góðu markmiðanna” um skriffinnskuveldi sem tærir sundur lýðræðið og ”Afglöp Laissez Faire kapítalismans og efnahagsleg upplausn Vesturlanda” þar sem hann gagnrýnir útflutning starfa frá Bandaríkjunum sem hann telur að hafi eyðilagt tekjuaukningu neytenda heima fyrir. Nánari upplýsingar um Dr. Paul Craig Roberts má finna hér  Ég læt mestan hluta viðtalsins fylgja hér fyrir neðan.

Á Íslandi er mikil umræða í gangi um kreppuna í Evrópu og það sem er að gerast varðandi Grikkland sérstaklega. Hvert er álit þitt á þessum málum?

Þetta hefur ekkert að gera með með ríkisskuldir Grikklands. Ástæðan fyrir því, að Grikkir hafa svo miklar skuldir er vegna þess, að Grikkir eru aðilar að ESB og nota evruna. Það þýðir að þeir hafa ekki eigin gjaldmiðil né Seðlabanka sem getur fjármagnað þá sjálfa. Flest allir meðlimir ESB fyrir utan Breta og eitt eða tvö önnur ríki sem gengu í EU en héldu í gjaldmiðil sinn, töpuðu sjálfræði sínu við inngönguna í ESB. Ef þú hefur ekki eigin gjaldmiðil og seðlabanka mun ríkisstjórnin ekki geta fjármagnað sig og er háð einkabönkum. Þessi háttur er orsakavaldurinn að evrukreppinni og stórkostlegt fíaskó fyrir sjálft ESB.

Um hvað er gríska kreppan?

Hún fjallar raunverulega um tvo hluti:

1) Hún er notuð til að koma á fót þeirri skipan, að lánardrottnar verði ekki ábyrgir gjörða sinna, þegar þeir lánuðu ógætilega til annarra landa og þurfa ekki að standa skil á mistökum sínum. Í staðinn eru íbúar ríkjanna látnir standa skil og taka ábyrgð á gjörðum lánardrottnanna. Þetta er fyrsti hlutinn sem málið fjallar um.

2) Hinn hluturinn er að ESB notar kreppuna í Grikklandi til að staðfesta það skipulag, að skuldugu löndin séu ekki lengur í þeirri stöðu að geta ráðið peningamálum sínum sjálf. Peningamál þeirra, þ.e.a.s. skattar og útgjöld verða núna í höndum miðstýrðrar stjórnar ESB sjálfs í stað landanna. Eins og Jean-Claude Trichet, fyrrum seðlabankastjóri SE lýsti yfir: ”það er tími kominn til að yfirgefa þjóðlega hugmynd ríkisvaldsins.” Kreppan í ESB er því notuð til að að koma á auknu miðstýrðu afli innan ESB. Þetta eru ástæðurnar fyrir því hvers vegna ESB er svo óhreyfanlegt, sýnir enga miskunn og er hjartalaust gagnvart ríkisstjórn eins meðlima sinna. Verið er að festa í gildi, að bankar eru ekki lengur ábyrgir á útlánamistökum sínum og skuldug lönd stjórna ekki lengur peningastefnu sinni. Þetta eru hinar raunverulegu ástæður kreppunnar en þær eru aldrei ræddar á þennan hátt.

Við höfðum tvær þjóðaratkvæðagreiðslur á Íslandi gegn þeirri óáran, að skattgreiðendur yrðu látnir greiða fyrir skuldir óreiðumanna. Þáverandi ríkisstjórn reyndi að troða þessu upp á fólkið sem veitti andspyrnu og forsetinn neitaði í tvígang að skrifa undir lögin. Núverandi forsætisráðherra hefur lýst því yfir að vera landsins fyrir utan ESB hafi hjálpað landinu að ná sér aftur á strik og að krónan hafi, þrátt fyrir smæð þjóðarinnar, bjargað landinu í fjármálakreppunni. Hvað viltu segja um þetta?

Já, það er augljóst. Ef Ísland hefði verið meðlimur ESB, hefði verið farið með landið eins og Grikkland, sem er ESB meðlimur. Þannig, að vera óháður ESB þýðir, að þið komust hjá að mæta sama pólitíska valdi og beitt var gegn Grikklandi og mun einnig verða beitt gegn Spáni, Ítalíu og Portúgal og þegar hefur einnig verið beitt gegn Írlandi.

Já, að vera ekki með í ESB var afar vitur ákvörðun. Einnig skiptir máli, að íslenskur almenningur gerði sér grein fyrir því, að mörg af þessum lánum voru svik og að bankarnir sjálfir voru viðriðnir svikin.

Á Íslandi höfum við handtekið nokkra helstu bankastjórana, sem núna afplána dóm í fangelsi.

Sem er rétti staðurinn fyrir þá! Svo það sem ég get hugsað núna er, að Ísland er líklega eini staðurinn, þar sem lýðræðið virkar. Fólkinu var kleyft að láta ríkisstjórnina gjalda gjörða sinna við sig í stað erlendra banka eða erlendra ríkisstjórna.

Er það ekki einkennilegt í vöggu lýðræðisins Grikklandi, að fyrst er haldin þjóðaratkvæðagreiðsla, þar sem fólkið segir NEI og síðan snýr ríkisstjórnin sér í hring og gerir akkúrat hið gagnstæða?

Það er afskaplega vel skýrt sem svik, að ríkisstjórnin sveik þjóðaratkvæðagreiðsluna, sem eru svik við lýðræðið. Þetta er þó í mínum huga of hart. Ég held að ríkisstjórnin hafi hugsað, að efnahagsleg rök hennar myndu hafa áhrif á Þýzkaland, á framkvæmdastjórn ESB, Seðlabanka Evrópu og Alþjóða Gjaldeyrissjóðsins. Gríska ríkisstjórnin treysti á styrkinn í röksemdafærslu sinni til þess að tekið yrði skynsamlega á málunum. Ríkisstjórnin áttaði sig ekki á því, að markmið ESB var að taka yfir stjórn peningamála í landinu og innleiða þá reglu, að bankarnir eru ekki ábyrgir lána sinna. Gríska ríkisstjórnin var ekki undir það búin að hafa varaáætlun - plan B, svo þegar þeir voru skyndilega settir í þá stöðu að horfast í augun við að fara út úr ESB eða samþykkja skilmála ESB, þá höfðu þeir enga aðferð til að yfirgefa ESB. Þeir vissu ekki hvernig átti að opna bankana aftur, þeir voru ekki með áætlun um að taka upp eigin gjaldmiðil sem yrði verðsettur og varinn gegn árásum. Þeir voru ekki að undirbúa sig, því þeir áttu ekki von á þessu miskunnarleysi sem þeim var sýnt. Þeir voru ekki viðbúnir eða með öðrum orðum þeir gerðu þau afgerandi mistök að treysta ESB fyrir að koma með góðan ásetning gagnvart Grikkjum. Það var hins vegar enginn góður vilji til staðar gagnvart Grikklandi og þess vegna hafði ríkisstjórnin enga valkosti. Ef þeim hefði skilist við hvaða öfl þeir væru að eiga og hefðu gert starfsáætlun: þetta er það sem við þurfum að gera ef við förum úr ESB, til þess að viðhalda bankakerfi og gjaldmiðli, þá þurfum við að taka þessi og þessi skref, við verðum að vita hvað við þurfum að gera, ef við förum út úr ESB. En þeir voru algjörlega óundirbúnir fyrir þetta. Þess vegna samþykkti ríkisstjórnin skilmála ESB, þrátt fyrir þjóðaratkvæðagreiðsluna. Þeir héldu að þjóðaratkvæðagreiðslan myndi gefa þeim aukinn styrkleika í samningunum við ESB og að ESB hefði einhvern góðan ásetning gagnvart Grikklandi og myndi samþykkja rök Grikkja.

Þú sérð, - allir lifandi hagfræðingar vita það, að niðurskurðaraðgerðirnar sem Grikkir hafa verið beittir, geta engan veginn gengið upp. Þær stríða gegn allri þekkingu efnahagsmála síðan 1836, þegar John Maynard Keynes skrifaði hina almennu kenningu.

Við sjáum það núna, að sjálfur Alþjóðagjaldeyrissjóðurinn tekur eftir þessu og hefur skrifað skýrslu, þar sem segir að niðurskurðarstefnan gagnvart Grikklandi sé röng og hefði aldrei átt að framfylgja. Það verður að sjá málin í þessu ljósi, gríska ríkisstjórnin hélt að ástæður og vitnisburður um efnahaginn myndi ná árangri gagnvart góðum vilja. En það var enginn góður vilji til staðar.

Nú segja Þjóðverjar, Angela Merkel og Dr. Schauble að þau munu aldrei samþykkja neinar skuldaafskrifter sem AGS boðar. Heldur þú að það verði nokkur þriðji neyðarpakki?

Þeir fá þá alla vega einhvern tíma til undirbúnings. Þú sérð, Grikkir fá ekkert af peningunum, þeir fara til eigenda grísku skuldanna. Og í mörgum tilvikum eru það ekki lengur lánardrottnarnir, vegna þess að stór hluti skuldanna var keyptur á lágu verði af hrægammasjóðum í New York sem veðjuðu á úrslit mála og héldu að með því að kaupa skuldirnar á hálfvirði mundu þeir samt fá þær að fullu greiddar. Þannig að mikill hluti skuldanna er ekki lengur í eigu lánardrottnanna. Annar hluti skuldanna hefur verið keyptur af Seðlabanka Evrópu. Bankinn prentar núna 60 miljarði evra í hverjum mánuði og peningarnir eru notaðir til að kaupa skuldir af lánardrottnum grískra skulda. Þannig er áhætta lánardrottnanna horfin, þar sem þeir eiga ekki lengur skuldir Grikkja, sem í dag er í eigu Seðlabanka Evrópu og hrægammasjóða. Þetta eru allt saman svik.

Þetta er þriðja umferðin í niðurskurðaraðgerðum. Hvað höfum við séð frá fyrri tveimur niðurskurðaraðgerðum? Við höfum séð að skuldakreppan hefur versnað vegna þess að niðurskurðaraðgerðirnar hafa dregið efnahaginn niður um 27%. Þetta er kreppuástand komið að hruni og þegar efnahagurinn skreppur saman verður hlutfall skulda hærra sem prósentutala af þjóðarframleiðslunni. Niðurskurðaraðgerðirnar hafa verið í gangi síðan 2010 og hafa gert ástandið verra, það vita allir. Niðurskurðaraðgerðirnar hafa ekki virkað og geta ekki virkað, allir vita um það. Svo burtséð frá því hvort Grikkir fái þriðja pakkann til að greiða af skuldum sínum eða ekki, þá verður ástandið bara verra. Svo allt málið er á byrjandareit vandamálsins eða með öðrum orðum: þriðji neyðarpakkinn leysir ekki vandann frekar en fyrsti eða annar neyðarpakkinn og mun bara gera vandmálið stærra og þess vegna ættu Grikkir að vera að undirbúa sig fyrir að yfirgefa ESB.

Heldur þú að þetta sé allt saman þáttur í áætlun ESB að búa til risaríki á meginlandinu?

Já. Það er einmitt það sem ég sagði. Þetta er miðstýringarvaldið, stjórnmálavaldið saman safnað í Brussel. Þessu var sérstaklega lýst af fyrri seðlabankastjóra Seðlabanka Evrópu sem útskýrði markmiðið með gríska ástandinu. Við förum í átt að enn frekari pólitískri miðstýringu, vegna þess að verið er að fjarlægja peningastefnuna frá aðildarríkjunum.

Þú ert í Bandaríkjunum en í Evrópu segja ýmsir að Grikkir séu bara 2% af íbúum Evrópu og þar af leiðandi sé vandamálið hverfandi. En augljóslega er það stórt, þar sem fjármálaráðherra ykkar Jack Lew tekur sér ferð til Evrópu til að ræða við ráðamenn ESB og seðlabankastjórann. Af hverju er staðan í Evrópu svona þýðingarmikil fyrir Bandaríkin?

Ástæðan fyrir því, að fjármálaráðherran Jack Lew fór til Evrópu, var að kynna algjöra andstöðu Washington gagnvart því, að Grikkir yrðu neyddir til að fara út úr ESB. Hættan sem Washington sér hér er, að ef Grikkland fer úr ESB, sérstaklega ef Grikkland endar uppi með stuðning frá Rússlandi og Kína, þá munu Ítalía, Spánn og Portúgal gera slíkt hið sama líka. Og ef ESB leysist upp mun NATO einnig leysast upp en NATO er mekanismi Washington til að eiga í útistöðum við Rússland. Markmið Washington er Rússland, það verður að einangra Rússland frá Evrópu, það þarf að ógna Rússlandi með herstöðvum til að Rússland verði meðfærilegra Washington. Þess vegna er litla Grikkland svo mikilvægt. Ef Grikkland yfirgefur ESB munu önnur lönd í svipaðri stöðu sjá að hér er fundin útgönguleið. Þess vegna er Jack Lew í Evrópu, hann setti hinum ósveigjanlegu Þjóðverjum úrslitakosti og sagði: ”Undir engum kringumstæðum munu Bandaríkin láta það viðgangast, að þið gerið Grikkland að fórnarlambi". Með öðrum orðum, þá hótaði hann Þjóðverjum og Bandaríkin eru tilbúin til að framfylgja hótun sinni. Afstaða ESB var: Hafið engar áhyggjur, Grikkir hafa enga valkosti. Þeir geta ekki yfirgefið ESB, þeir verða að samþykkja tillögur okkar burtséð frá því hversu ósveigjanleg við erum, vegna þess að þeir hafa ekkert að koma með í staðinn fyrir evruna og geta ekki opnað bankana. Þess vegna höfnuðu þeir tillögu Bandaríkjanna um að létta á álaginu á Grikklandi. Bandaríkjamenn töldu, að það þyrfti að létta um fyrir Grikkjum svo þeir færu ekki úr evrunni. Þjóðverjar vissu hins vegar, að Grikkir gátu ekki farið úr evrunni, vegna þess að þeir höfðu enga varaáætlun.

Hefur þetta eitthvað með stöðuna í Úkraínu að gera? Er Úkraína hernaðarleg áhætta sem getur eyðilagt stöðu mála í heiminum?

Ef Bandaríkjamenn koma Úkraínu inn í NATO – já, vegna þess að Rússarnir geta ekki þolað það. Ef Bandaríkjamenn koma upp herstöðvum í Úkraínu – já og ef Bandaríkin halda áfram að vopna og þjálfa Úkraínubúa sem draga áfram úr áhrifum Minsk samninganna og halda áfram ofbeldi gegn þeim sem hafa brotist út úr Úkraínu, þá kemur að því fyrr en síðar, að Rússland bregðist við. Flestir af íbúum svæðisins eru Rússar og til þess að viðhalda stuðningi í Rússlandi, þá verður Pútín að verja þetta fólk. Svo ég held að það sé mjög sterkur möguleiki á því, að Bandaríkjamenn dragi ástandið í átt að styrjöld og mér finnst afar heimskulegt af Evrópumönnum að hlýðast Washington á þennan hátt. Þeir hafa hlustað á allan áróðurinn og leyft sjálfum sér að undirgangast viðskiptaþvinganir sem skaða Evrópu miklu meira en þær skaða Rússland. Þeir hafa leyft Bandaríkjamönnum að hætta við efnahagsleg og stjórnmálaleg tengsl við Rússland, svo í mínum huga eru það Evrópubúar sem þá verða orsakavaldurinn að þriðju heimsstyrjöldinni. Þeir hegða sér svo heimskulega og eru svo miklar skræfur, að þeir leyfa Bandaríkjamönnum að búa til deilu milli Rússlands og Evrópu. Þetta þjónar hagsmunum Washington en ekki Evrópu. Á meðan Evrópubúar halda áfram að horfa fram hjá þessu eykst styrjaldaráhættan.

 

Varoufakis svarar fyrir „plan B“

Vinstri menn ryðja veginn fyrir nýfasisma og nazisma

Í janúar dönsuðu fylgismenn vinstriflokksins Syriza sigurdans á Syntagma torginu í Aþenu eftir stórsigur flokksins í þingkosningunum, þegar flokkinn vantaði herslumun á að fá hreinan meirihluta. Fyrir tveimur vikum dönsuðu Grikkir yfir stórsigri NEI við afarkostum Þríeykisins eftir augnabliks lýðræði.  Fyrir tveimur dögum ruddi óeirðalögreglan Syntagma torgið með táragassprengjum vegna þess að verið var að umbreyta NEI fólksins í JÁ þingsins."Íslenska leiðin" var myrt í gríska þinginu. 

Tsipras fer til sögunnar sem svikarinn sem fórnaði þjóð sinni á altari Þríeykisins og skrifaði undir uppgjöf ríkisins. Þríeykið fékk löggjafarvaldið í Grikklandi og verður uppboðshaldari sem setur eigur gríska ríkisins á brunaútsölu.

Neyðarpakki nr. 3 (miðað við 88,5 miljarði evra): 

Um 52% fer í afborganir af lánum til AGS, SE m.fl. og í vaxtagreiðslur

Um 43% fer í endurfjármögnun grísku bankanna, bætingu lausafjárstöðu bankakerfisins og fjármálafyrirtækja 

Um 5% fer til gríska ríkisins.

JÁ þingmennirnir hafa fórnað þjóðinni án nokkurrar tryggingar fyrir að fá neyðarlán til banka "í neyð". Trúlega fá Grikkir ekkert neyðarlán (þrátt fyrir að Bundestag hafi þvegið hendur sínar í dag, AGS getur neitað á lagatæknilegum forsendum) og útkoman verður GREXIT Spánverjum, Portúgölum, Írlandi og Ítalíu til varnaðar. Seðlabanki Evrópu og evran eru notuð til að loka bönkum þeirra sem malda í móinn.

Áætlun Dr. Schauble er að þvinga ríki til að játast vilja Þýzkalands og stofna 4. ríkið með eigin skattheimtu og fjárlögum. 

ESB splundrast og vinstri menn ryðja veginn fyrir nýfasisma og nazisma með eyðileggingu eigin þjóða í staðinn fyrir að snúa bökum saman með almenningi í baráttunni gegn þeirri ófreskju sem ESB er orðið. 

 

Trúa á árangursríka niðurstöðu

Sýningin um Grikkland liður í þróun alríkisins

Leyniskýrsla Alþjóðagjaldeyrissjóðsins sem Reuters greinir frá í dag, sem leiðtogum ESB var kunnugt um s.l. laugardag áður en þeir fóru á "samninga" fund með Grikkjum, er enn eitt dæmið sem varpar ljósi á, að markmiðið með "samningnum" við Grikki er eitthvað allt annað en lausn á efnahagsvanda Grikklands. Þótt margt megi skýra með hatri dugir ekki sú skýring ein og sér til að skilja, hvað raunverulega er að gerast. 

Skýrslan segir að Grikkir þurfi a.m.k. 30 ára hlé á afborgunum, lengingu lánatímabils eða beina árlega styrki frá ESB eða mikla skuldaniðurfellingu til að lifa af efnahagsörðugleikana. Skýrslan bendir einnig á þann skaða, sem lokun bankanna hefur haft í för með sér á efnahagslíf Grikkja og leiðir til að endurreikna verði allar tölur upp á nýtt, sem þýðir nýja neyðaraðstoð. Þá segir, að leiðtogar ESB hafi árangurslaust reynt að stöðva skýrslu AGS þann 2. júlí þremur dögum fyrir þjóðaratkvæðagreiðsluna. Reiknar AGS með að skuldir Grikkja fari yfir 200% á næstu tveimur árum og verði 170% í stað 142% ár 2022. Núverandi "samkomulag" þýðir mikinn efnahagslegan afturkipp, sem leiðir til enn frekari þörf á fjárhagsaðstoð frá ríkjum evrusvæðisins. Fái Grikkland ekki lán á kjörum AAA ríkis muni landið vera í óhaldbærum skuldum næstu áratugina.

Ákvörðun um lokun bankanna í Grikklandi var ekki tekin af Seðlabanka Evrópu heldur af evruhópnum en sú ákvörðun hefur skapað mikinn usla og skaðað efnahagslíf Grikkja. Með þeirri ákvörðun var grískt efnahagslíf tekið í gíslingu. Sú ákvörðun sýnir að mati margra, að ESB er pólitískur valdaarmur lánardrottna, sem brýtur gegn yfirlýstum grunngildum ESB.

Í "samningnum" er skýrt ákvæði um, að lýðræðislegur réttur gríska þingsins til eigin löggjafar er tekinn af þinginu. Hefur áður þurft innrás með herliði og uppgjöf viðkomandi ríkis til að fá slíkar heimildir. 

Rétt er hjá þeim Grikkjum sem lýsa skilmálunum, sem þingið á að greiða atkvæði um á morgun, sem valdaráni. 

ESB notar Grikkland til að skapa skoðun til stuðnings yfirtöku ESB á fjárlögum aðildaríkjanna, a.m.k. evrusvæðisins. Kaflaskil eru orðin í þróun alríkisins.

 

Vill ekki að breskt skattfé renni til Grikkja

Vöggu lýðræðisins hent í hyldýpið

Úr samkomulagi leiðtoga evruríkjanna aðfaranótt 13. júlí í lauslegri þýðingu: "Ríkisstjórnin verður að ráðfæra sig við og fá samþykki Stofnananna (=Þríeykisins/GS) fyrir öllum lagatillögum á viðkomandi sviðum í góðan tíma áður en þær verða opinberlega sýndar eða lagðar fyrir þingið." ( Á ensku: "Government needs to consult and agree with the Institutions on all draft legislation in relevant areas with adequate time febore submitting it for public consultation or to Parliament.")

Þetta er nú eitt af lítilræðunum sem forsætisráðherra Grikkja, Alexis Tsipras, fer með heim til Aþenu í dag. Maðurinn sem lagði í þjóðaratkvæðagreiðslu til að leyfa lýðræðinu að virka eitt andartak og hvatti þjóð sína til að kjósa NEI við tillögu sem ekki kemst með tærnar þar sem samkomulag næturinnar hefur hælana.

Ef Alexis Tsipras vinnur ESB-verk sitt vel verður honum sjálfsagt ríkulega launað af óreiðumönnum sem vilja éta afganginn af eigum Grikklands og útrýma lýðræðinu.

Samtímis er rætt um nýjan neyðarpakka upp á 82-86 miljarði evra til Grikklands, sem ekki getur borgað af rúmlega 300 miljarða evruskuld sinni í dag. Rétt eins og hagur landsins batni þá fyrst, þegar Grikkland fær að skulda tæplega 400 miljarða evra í staðinn.

Ekki furða að hagfræðingar heimsins skiptist í tvo hluti: Venjulega heiðarlega og svo hina sem eru ráðnir af bönkum. Þeir fyrrnefndu segja eins og t.d. Paul Krugman: "Að kalla þetta valdarán á algjörlega fullan rétt á sér." Þeir síðarnefndu segja það sem bankarnir borga þeim að segja, sem er: "Á meðan bankarnir fara ekki á höfuðið er allt í lagi."

Það eru kaflaskipti að lýðræðið er gjaldþrota.

Hjólastólahelreiðin er hafin. 

 

 

Samkomulag í höfn í Brussel

Grikkir á krossinn - ESB undirbýr neyðarhjálparsendingar við Grexit

Grikkir fá tíma til kl. 8.30 föstudag til að koma með "samþykkjanlegar tillögur" ....annars verða þeir sendir í Grexit. Mikilvægt fyrir Brusselhirðina að sýna heiminum, að enginn kemst upp með að tuska stórveldið. Allra síst barbararnir frá Hellas. 

Á blaðamannafundi þriðjudagskvöld 7. júlí lögðu bæði Jean-Claude Juncker forseti framkvæmdarstjórnar ESB og Donald Tusk, forseti Evrópuráðsins, áherslu á, að ESB hefði í fórum sínum "áætlun í smáatriðum" við Grexit. Vegna alvarleika málsins verður leiðtogafundur allra aðildarríkja ESB haldinn á sunnudaginn 12. júlí, svo ESB geti tekið ákvörðun um "stórslysahjálp" til Grikklands. Þ.e.a.s. mat, læknisaðstoð m.fl. eins og hjálparsendingar SÞ til þróunarríkja og ríkja við stríð, þurrka, náttúruhamfarir, hungursneyð og aðrar plágur. Seðlabanki Evrópu mun endanlega loka fyrir síðasta evrudropann til innikróaðra banka Grikklands á sunnudaginn sem munu falla og Grikkland með þeim, nema Tsipras lýsi uppgöf og skrifi á samninginn, sem þjóðin felldi.

"Vanhæfni okkar að ná samkomulagi getur leitt til gjaldþrots Grikklands og hrun bankakerfisins. Og það mun sannarlega vera versta útkoman fyrir Grikki. Ég er ekki í nokkrum vafa um að þetta mun hafa áhrif um alla Evrópu og einnig í heimspólitískum skilningi. Ef einhverjir eru haldnir þeirri blekkingu, að þetta geti ekki gerst, þá eru þeir barnalegir." Donald Tusk, forseti Evrópuráðsins.

ESB telur þjóðaratkvæðagreiðslu Grikkja ómarktæka. Hún er nefnilega hvorki "lagalega né bókstaflega rétt".

Aðildarríki ESB fá á sunnudag að velja milli lánardrottna og Grikklands líkt og þegar spurt var forðum: "Hvorn þeirra tveggja viljið þér, að ég gefi yður lausan, Barrabas eða Jesús?"

Juncker mun í sporum Pílatusar þvo hendur sínar á sunnudag.

Engar nýjar tillögur frá Grikkjum

Yfirburðasigur lýðræðisins í Greecesave - íslenska leiðin borgar sig

Núna er bara að sjá hvort hinir átti sig á málunum og snúi við áður en það verður um seinan...Stórglæsileg niðurstaða kosninganna, þar sem Grikkir höfnuðu fjárkúgunarsamning um áframhaldandi niðurskurð og vosbúð. Mikilvægasta atriðið var að taka frumkvæðið til baka til þjóðarinnar. Grikkir eiga langa sögu þjóðarstolts og að taka örlögin í eigin hendur. 

Greecesave. 61,31% NEI. 38,69% JÁ.

Heldur betur en í Icesave I á Íslandi. Já-fjölmiðlar og fyrirtæki, sem reyndu að múta fólki til að kjósa Já, sköpuðu stærra NEI.

Það hefur alldeilis bætst olía á kyndil frelsis og lýðræðis á meginlandinu. En framundan eru mikil átök milli leiðtoga ESB og skjólstæðinga þeirra (óreiðumanna fjármálafyrirtækjanna) annars vegar og þjóðlegrar frelsisbaráttu almennings hins vegar.

Komandi barátta Tsipras forsætisráðherra Grikklands verður prófsteinn fyrir David Cameron í Bretlandi sem berst fyrir lýðræði á sama grundvelli.

ESB er steindautt. Evran hefur framið sjálfsmorð. Það hafa orðið kaflaskipti í byggingu alríkisins og lýðræðið hefur verið jarðað. Hvorki Grikkland né Bretland breyta því.

Þjóðverjar stjórna öllu hvort eð er. Þeir munu mynda 4. ríkið undir mantli ESB. Það mun kljúfa alla Evrópu í fylgissveina eða sjálfstæðissinna og sagan endurtakur sig á ný. 

Evrópusambandið „virðir niðurstöðuna“