20 skriðdrekar og 10 flugskeytapallar frá Rússlandi í dag til nágrennis Mariopol

Rússar sendu a.m.k. 20 skriðdreka og 10 færanlega flugskeytapalla yfir landamærin til nágrennis hafnarborgarinnar Maríopól í Austur-Úkraínu í dag. Einnig hefur sést til rútulestar fullri af rússneskum hermönnum fara yfir landamærin á leiðinni þangað. 

ESB-nefnd efri deildar brezka þingsins lýsti yfir í dag, að ESB hefði gengið í svefni, þegar kreppan í Úkraínu hófst og gróflega mistúlkað stemninguna í Kreml í aðdraganda innrásar Rússa í Úkraínu, er þeir hernámu Krím-skagann.

Vopnahléið er varla vikugamalt, þegar Úkraína og USA ásaka aðskilnaðarsinna um að hafa rofið það a.m.k. 250 sinnum. 

Sænska sjónvarpið sýndi beint frá því, þegar hermenn komu heim eftir að hafa verið hraktir á flótta frá Debaltseve. Nokkrir hermenn mótmæltu því harðlega, að um skipulagt fráhvarf hafi verið að ræða og kröfðust þess við heimkomuna, að Porósjenkó Úkraínuforseti bæðist þjóðina afsökunar á röngum upplýsingum um flóttann. Jafnframt sögðu þeir að langtum fleiri hermenn hefðu dáið en ríkisstjórnin hefði gefið upp.

Það var þéttstaðið á brautarstöðinni, ættingjar og vinir tóku á móti hermönnum og hylltu þá fyrir að vilja fórna lífum sínum fyrir Úkraínu. Eitt ár er liðið frá átökunum á Sjálfstæðistorginu í Kíev, þegar fyrrum Rússahollur forseti Úkraínu hrökklaðist frá völdum.

Þýzkaland mun fleygja kústsköftunum og hefja vopnaframleiðslu fyrir þýzka herinn, þegar öllum má ljóst vera, að Pútín meinar alvöru með að endurreisa gömul landamæri Sovétríkisins. Margir í baltísku löndunum búast við svipuðu ástandi meðal rússneskt mælandi eins og gerðist í Austur Úkraínu í aðdraganda hernáms Krímskagans. Pútín virðist halda að hann komist upp með hvað sem er og allur átakaferillinn stefnir því miður í blóðug stórátök milli Natóríkja og Rússlands.

Fer fram sem vindur getur pandóruaskja helvítis opnast enn á ný í Evrópu: Styrjöld með öfgaöflum múslíma er kenna sig við kalífatið IS í suðri með árásum inni í Evrópu og Vesturveldin með Bandaríkin, Breta og Þýzkaland sem fremstu bandamenn í stórstyrjöld gegn heimsyfirráðum Rússa.  

Með kústsköft í stað vélbyssa

Athugasemdir

[Bjarni Jónsson, 20.2.2015 kl. 20:58]

Það er eitt mjög öflugt kústskapt í fórum NATO, sem heitir Leopard 2A7. Þrjátíu slíkir mundu hreinsa til í Austur-Úkraínu á 2 vikum. Síðan þarf að aðstoða Kænugarð við að loka landamærunum að Rússlandi.  Til þess þarf meiri mannskap og búnað.  Ætlun Pútíns er að sundra NATO.  Það gerir hann með því að láta reyna á 5. grein stofnsamnings NATO með því að ráðast á eitt Eystrasaltsríkið. Er þá ekki betra að koma honum á óvart í Úkraínu áður en hann ræðst á NATO-ríki ?

[Gústaf Adolf Skúlason, 20.2.2015 kl. 23:47]

Þakkir Bjarni fyrir innlitið. Pútín mun ekki bakka að landamærum sem hann er þegar búinn að breyta. Það verða mikil læti þegar skáparnir með kjarnorkuvopnunum verða opnaðir. Þetta sagði yfirhershöfðingi Rússa, Nikólaj Makaróv, í viðtali við útvarpið í Moskvu nýlega: "Við ætlum að sjálfsögðu ekki að berjast gegn öllu NATÓ en ef landfræðilegu sjálfstæði Rússlands verður ógnað, þá höfum við réttinn að beita kjarnorkuvopnum - og það munum við einnig gera!" Í upphafi árs 2012 kynnti Pútín 10 ára áætlun um hervæðingu Rússa fyrir 770 miljarði dollara. Herskip, kafbátar, 600 nýar orustuflugvélar, þúsundir herbíla/skriðdreka og leynilegt "smart" varnarkerfi. Formálinn er bara rétt byrjaður.....

[Bjarni Jónsson, 21.2.2015 kl. 13:02]

Sæll, Gústaf Adolf;

Staða Rússa er gjörbreytt til hins verra frá 2012.  Þeir hafa ekki lengur ráð á vígvæðingunni, sem kynnt var til sögunnar þá.  Viðskiptabannið gerir þeim ókleift að tæknivæða herinn, eins og þeir ætluðu, og helmingun útflutningstekna gerir að verkum, að þeir gætu lent í greiðsluerfiðleikum með afborganir og vexti þegar á þessu ári, og staða þjóðarbúskapar þeirra hríðversnar. 

Orð rússneska hershöfðingjans eru mannalæti. Rússum hefur enn ekki unnizt tími til að efla herinn að nokkru marki.  Hann er veikur.  Það eru herir Vesturveldanna líka, nema BNA, en þeir búa þó enn að tæknilegu forskoti.  Hvert er mat sænskra sérfræðinga á herstyrk Rússa í samanburði við NATO ?

[Gústaf Adolf Skúlason, 21.2.2015 kl. 13:52]

Sæll aftur Bjarni, það er rétt að viðskiptabannið hefur áhrif en Rússar hafa þegar náð forskoti sbr. orð Tomas Ries sérfræðings í öryggis- og varnarmálum Norðurlanda og Evrópu fyrir ári síðan: "Vesturlöndin sváfu á verðinum á meðan Pútín byggði upp hernaðarmátt sinn. Pútín hefur algjörlega yfirburðastöðu kjarnorkuvopna í Evrópu, Evrópa er næstum ekki með neitt og Rússland er með geysilegt magn nútíma kjarnorkuvopna, sem aðeins er hægt að nota í Evrópu og ekki bundin Bandaríkjunum." Málið er að meðan Vesturveldin hafa skorið niður framlög til varnarmála hafa m.a. Rússar og Kínverjar stóraukið fjárfestingar. Síðan 2008 hafa Rússar aukið hernaðarútgjöld með yfir 31% og voru þriðji stærsti kaupandi hergagna á eftir USA og Kína. Skv. áætlun átti að auka innkaupin með 44% næstu þrjú árin. USA minnkaði hernaðarútgjöld með 9% síðan 2008 (en er áfram langstærst). Mikil umræða í Svíþjóð um að niðurskurður til hermála hefur gengið svo langt síðustu ár, að það tekur allt að 8 ár að byggja upp visst grundvallarstarf aftur. Kem síðar að spurningu þinni um samanburð á hermætti Rússa og NATÓ. kkv Gústaf