Austurríkismenn vilja út úr sælu ESB

Í nýrri skoðanakönnun í Austurríki vill í fyrsta sinn stærri hluti aðspurðra að Austurríki gangi úr ESB en þeir sem vilja vera þar áfram. 46% aðspurðra vildu fara úr ESB en 44% vera áfram. Andstaðan við ESB vex stöðugt, þrátt fyrir að framkvæmdarstjórnin vísi gagnrýni á bug sem öfgaskoðunum. Leiðtogum ESB tekst ekki að galdra kreppuna burt, sem dýpkar með degi hverjum.

Til marks um efnahagsstöðnun evrulands, þá þurfa bankar að borga fyrir innistæður hjá Seðlabanka Evrópu. Styttist óðum í stuðningskaup SE á ríkisskuldabréfum til styrktar evrunni til að sanna í eitt skipti fyrir öll, að evran sé eini rétti gjaldmiðillinn. 

ESB hefur valið aðra leið en Íslendingar og heldur fjölmörgum bönkum á lífi í öndunarvél. Í Þýzkalandi telja margir að ekki sé hægt að þvinga Þjóðverja að greiða skuldir banka, sem ekki heyra beint undir fjármálaeftirlit Þýzkalands. Málaferli eru í gangi og falli dómur Þjóðverjum í vil er óvíst með áframhaldandi greiðslur þeirra til fallinna banka í öðrum evrulöndum.

Allur heimurinn rambar á barmi skuldahengiflugs. Seðlabanki Bandaríkjanna hefur dælt þúsundum miljörðum dollara inn í hagkerfið undir merkjum QE. Lítið sem ekkert af peningunum fer til venjulega efnahagskerfisins heldur til að halda uppi tölum verðbréfamarkaða. Á meðan hagvöxtur stendur í stað eða minnkar, þá hækka hlutabréf upp úr öllu valdi. Flestallir skilja, að þessi þróun getur ekki endað öðruvísi en alltaf áður: með stórum hvelli.

Fyrir utan Argentínu, sem er í höndum hrægammasjóða standa tíu lönd á barmi greiðsluþrots: Ekvador, Egyptaland, Pakistan, Venúsúela, Grikkland, Belize, Kúba, Kýpur, Jamaíka og Úkraína. 

Með auknum stríðsrekstri á víð og dreif um heiminn, auknum samfélagsóróleika þjóða, sem eru að kyrkjast í hengingaról ríkisskulda, má lítið út af bera til að málin fari ekki úr böndunum. Heilagt stríð í Sýrlandi, Írak og Ísrael, svæðabundin óöld í Afríku, yfirtaka Pútíns á Krímskaga og stríð í Úkraínu, hótanir N-Kóreu að beita kjarnorkuflaugum, deilur Kína og Tæwan, - allt þetta sýnir vaxandi viðkvæmni og þverrrandi getu til að leysa vandamálin á friðsamlegan hátt.

Óveðursskýin hrannast upp á mannkynshimninum.

Stýrivextir óbreyttir á evrusvæðinu

Athugasemdir

[Eggert Sigurbergsson, 8.8.2014 kl. 18:53]

Náttúrulega geta þjóðir bara haldið eina atkvæðagreiðslu um ESB og hún verður að vera á hárréttum tíma svo að inngöngu JÁ-ið fáist. Síðan má alls ekki kjósa um hvort þjóðir vilji ganga úr ESB enda er það öfga eitthvað að láta sér detta það í hug.

[Helga Kristjánsdóttir, 9.8.2014 kl. 00:52]

Mér stendur stuggur af þessari ótætis-umsókn Össurar & c/oí esb., vil hana út úr heiminum. Ég er sem ég sjái utanrikisráðherra manna sig upp í að fylgja eftir óskum þeirra sem kusu flokkinn hans,með þvílíkum mun. Þetta er aðkallandi.

[Jón Valur Jensson, 9.8.2014 kl. 04:01]

Gagnleg grein og góðar ábendingar um alvöru mála.

Fréttirnar góðar af afstöðu Austurríkismanna!

[Gústaf Adolf Skúlason, 9.8.2014 kl. 07:32]

Kærar þakkir fyrir athugasemdir, Eggert: og ef kosið er Nei er kosið aftur þar til Jáið kemur, Helga, í ESB-málum stendur Óskar blindi í stafni ríkisstjórnarskútunnar og starir á umheim, þing og þjóð og Óskar mállausi kallar skipanir í brúnni á báti Óskar nafnleyndar... Takk Jón, ég les þín góðu skrif eins oft og ég get...kkv

[Bjarne Örn Hansen (IP-tala skráð) 9.8.2014 kl. 07:44]

Vandamálið er austantjaldsþjóðirnar, og sunnan Evrópu.  "Central Europe", var ekki búinn að setja efnahag sinn á "styrkan" kjöl, áður en þeir fóru að hafa afskipti af erlendum ríkjum og breiða úr sér, eins og Heimsveldi.

Á meðan þetta "Carl Bildt" hugarfar ríkir innan ESB, er enginn framtið fyrir Evrópubandalagið, annað en Gjaldþrot.