70% mjólkurbænda Svíþjóðar hafa neyðst til að hætta búskap eftir aðild Svía að ESB

 

 

 

 

 

Á síðustu 10 árum hafa yfir 5 þúsund mjólkurbændur hætt búskap í Svíþjóð. Árið 2003 voru um 10 þúsund starfandi mjólkurbændur í Svíþjóð. Þegar litið er á tímabilið frá inngöngu Svía í ESB 1994, þá voru mjólkurbændur Svía um 17 þúsund en eru í dag einungis 5 þúsund eða tæplega 30% þess fjölda sem framfleytti sér við mjólkurbúskap, þegar Svíar gengu með ESB.

Þróunin hefur verið sú, að kostnaður við tækniþróun samfara lækkandi mjólkurverði hefur slegið út lítil og meðalstór bú og býlin, sem lifað hafa af, hafa stækkað og gengið saman. Í sjónvarpsviðtali fyrir nokkru sagði einn kúabóndi, sem hafði lánað og fjárfest í nýjustu tækni þar sem mannshöndin kemur varla nálægt mjólkun, að það skipti engu máli, hversu mikla tækni hann keypti eða hversu mikil afköstin yrðu, því hann næði samt ekki að framleiða mjólk án tapreksturs.

Lækkandi mjólkurverð, aukinn innflutningur landbúnaðarafurða frá m.a. Danmörku, Frakklandi og Finnlandi, hefur leitt til þess að verslanir ICA í vissum landshlutum Svíþjóðar hafa hækkað mjólkurlíterinn um eina sænska krónu, sem gengur beint til mjólkurbóndans. Svíar vilja ekki að landbúnaðurinn leggist niður og vilja því borga dýrari mjólk, til að halda lífi í sænska bóndanum.

Í viðtali við sænska sjónvarpið 22. maí sagði landbúnaðarráðherra Svíþjóðar Eskil Erlandsson, að hann ætli að styrkja stöðu kýrinnar með því að ríkið greiði 1.500 sænskar krónur árlega fyrir hverja mjólkurkú til bænda.

Athugasemdir

[Diddi, 23.5.2013 kl. 19:55]

Þessa tilhneygingu má því miður sjá í flestum eða öllum geirum landbúnaðar, orku- og framleiðslu hérlendis. Mishröð þróun, en á mínum líftíma hafa Bandaríkin og Evrópa smátt og smátt (stundum í risaskömmtum) verið flutt inn; vörur, þjónusta, tækni... menning, markaðsleg meðvirkni... bankakerfi, stjórnsýsluhættir, lög...
Við höfum fengið flest það vonda með hinu "góða" í þessum díl... þverrandi sjálfstæði og fullveldi er þar ofarlega á borði.