Pútín tekur gífurlega áhættu til að styrkja al-Assad

Enginn þarf að taka trúanlegar yfirlýsingar forseta Rússlands Vladimir Pútíns um að hernaðarleg uppbygging Rússa í Sýrlandi sé til þess að stöðva framgang IS eða eins og Pútín sjálfur sagði: "Það verður að stöðva hryðjuverkamennina annars koma þeir til Rússlands." Þessi orð Pútíns eru ætluð til heimabrúks enda koma nú fréttir um, að hann hafi sjálfur sagt í samtölum m.a. er það haft eftir Stoltenberg framkvæmdastjóra NATO, að markmið Rússa sé að styrkja stöðu al-Assad ríkisstjórnar Sýrlands. Pentagon óttast nú, að stjórnarher al-Assad fái beinan aðgang að öllum hertólum Rússa, sem breytt geti gangi mála í stríðsátökunum í Sýrlandi.

Loftárásum Rússa í gær var fyrst og fremst beint gegn Frelsisher Sýrlendinga, sem berst gegn al-Assad. Flugárásir voru ekki gerðar á bækistöðvar IS eða yfirráðasvæði þeirra, þvert á gefin loforð Pútíns og fagurgala um "hernaðarbandalag gegn hryðjuverkasveitum IS". Rússar gáfu út yfirlýsingu um að þeir hefðu skotið á birgðarstöðvar IS í Sýrlandi en myndir og frásagnir vitna í Sýrlandi sýna annan veruleika. 37 manns létu lífið í árásunum, þar á meðal konur og börn. Sveitir studdir af Bandaríkjamönnum sögðu, að rússneskar herþotur hafi gert árásir á sig en opinberlega hefur það ekki verið staðfest.

Bandaríkjamenn hafa verið slegnir út af borðinu vegna lyga Pútíns. Pútín og Rússar hafa tekið frumkvæmðið með nýju "hernaðarbandalagi" Rússlands, Kína, Sýrlands og Írans. Í dag eru því tvö hernaðarbandalög í Sýrlandi, sem bæði segjast berjast gegn hryðjuverkasveitum ÍS en með andstæð markmið varðandi lausn stríðsins: Bandaríkjamenn, Saudi-Arabar og bandamenn þeirra vilja fá al-Assad stjórnina burt en Rússar, Kínverjar, Íranir og bandamenn þeirra líta á al-Assad sem sinn fremsta bandamann og vilja tryggja völd hans í Sýrlandi. 

Samtals taka nú þrettán þjóðir þátt í flugárásum í Sýrlandsstríðinu: USA, Ástralía, Barain, Kanada, Frakkland, Sameinaða Arabaemíratið, Jórdanía, Qatar, Saudi-Arabía, Bretland, Tyrkland, Sýrland og núna Rússland. Á jörðu niðri berjast margir hópar studdir af umheiminum gegn eða fyrir ríkisstjórn Sýrlands eins og t.d. IS, stjórnarher Sýrlendinga, Hizbollah frá Líbanon sem styður al-Assad, Kúrdar gegn al-Assad og fjöldi hópa stjórnarandstöðunnar eins og Frelsisher Sýrlands sem var skotmark Rússa í gær. Skv. sænska Aftonbladet taka allt að eitt þúsund mismunandi hópar þátt í stríðinu í Sýrlandi.

Í fréttatíma sænska sjónvarpsins í gærkvöldi kom fram í viðtali við Gudrun Persson, Rússlandssérfræðing hjá rannsóknarstofnun sænska hersins, FOI, að Rússar hefðu undirbúið árásina vel og lengi og væri hún hátindur í ferli, þar sem Rússar þvinguðu fram pólitískar lausnir í skjóli hervalds: "Enginn hefði trúað því fyrir nokkrum vikum, að Pútín og Obama héldu sameiginlegan fund en það hefur gerst. Núna notfæra Rússar sér, að bandalag Bandaríkjamanna gegn IS hefur ekki verið sérlega árangursríkt." Gudrun sagði, að Pútín tæki gífurlega áhættu með aðgerðum sínum, þar sem minnsti misskilningur eða slys gæti hleypt öllu í bál og brand. "Markmið Rússa er að sýna, að Rússland er aðili að reikna með í heimsmálunum og hér beita þeir hernaðarmætti til að ná fram betri samningastöðu fyrir al-Assad." Gudrun taldi það afar hættulegt, þegar tvö hernaðarbandalög berjast á afmörkuðu svæði, sem gæti leitt til ófyrirsjánlegra atburða, sem hleyptu öllu í loft upp: "Við höfum áður heyrt Rússa tala um "takmarkaðar" aðgerðir í Afganistan en stríðsástand lifir eigin lífi og óútreiknanlegir atburðir gerast allt í einu, sem breyta ástandinu og gera það verra." 

Hvað eru Rússar að gera í Sýrlandi?

Athugasemdir

[Snorri Hansson, 1.10.2015 kl. 01:44]

Hér er nokkuð ítarleg grein um Sýrlandsmálið. Auðvitað lituð.

 En undir þessari grein er áhugaverð athugasemd

eftir Robert Haines sem eins gæti átt við hér.  

http://uk.businessinsider.com/john-kerry-and-syria-refugee-crisis-2015-9?r=US&IR=T

 

 

 

Robert Haines on Sep 22, 1:38 PM said:

Perhaps the author would like to comment on the Wikileaks documents of US diplomatic cables showing that the US deliberately fomented the Civil War in Syria in an attempt to affect regime change in Syria. I wonder how the US would treat internal civil unrest which had been funded by say Russia?

[Gústaf Adolf Skúlason, 1.10.2015 kl. 07:37]

Þakka þér Snorri fyrir þessar upplýsingar sem eru vandaðar. Á meðan IS hefur orðið ágengt að nota vörumerki dauðans vegna hrottafenginna morða, þá er það stjórnarher al-Assad sem er afkastamestur í framleiðslu dauðans á eigin borgurum og stærsti orsakavaldur flóttafólks frá Sýrlandi eins og kemur fram í þessarri ágætis grein. Ég hef heyrt í sænskum fjölmiðlum, að Sýrlandsstjórnin beri ábyrgð á yfir 90% dauða þeirra rúmlega fjórðungs miljóna Sýrlendinga, sem týnt hafa lífinu í átökunum. Tunnusprengjur þeirra á venjulega Sýrlendinga, heimili þeirra, sjúkrahús, skóla og markaði hefur gefið árangur. Pútín hefur notfært sér veikleikamerki Obama til að taka frumkvæðið í málefnum Miðausturlanda með ófyrirsjáanlegum afleiðingum.

[Tómas Ibsen Halldórsson, 1.10.2015 kl. 11:26]

Mér sýnist Pútín hér vera að notfæra sér veikleika Obama.  Pútín veit sem er að Obama er búinn að eyðileggja Bandaríska herinn og er hann nú að ögra Obama til að sjá hversu langt hann getur gengið án afskipta BNA.

Ég held líka að Pútín sé að sýna vígtennurnar til að sanna að þeir, Rússar, séu nú BNA fremri í hernaðarmætti.  Enn fremur held ég að Pútín myndi ekki sýta það þó að Rússar og BNA myndu kljást á vígvellinum. 

Þetta er allt ein stór leiksýning þar sem menn eru að reyna að sanna sig fyrir umheiminum þar sem hver hrópar að öðrum: "Ég er sterkastur".

[Gústaf Adolf Skúlason, 1.10.2015 kl. 16:31]

Sæll Tómas, takk fyrir innlegg. Með áframhaldandi árásum í dag á stjórnarandsöðuhópa sem studdir eru af Bandaríkjamönnum sýna Rússar, að þeir munu leiða stórfellda sókn sýrlenska hersins ásamt hermönnum Hezbollah og íranska hersins til að auka völd al-Assads. Að berjast gegn IS var bara yfirskyn til að blekkja heiminn. Spurningin er, hvað Bandaríkjamenn gera, hvort þeir dragi sig úr eða auki stuðning við bandamenn sína og eiga á hættu að lenda í beinu stríði við Rússa. Þáttaka Rússa í stríðinu kyndir undir mögnun þess með skelfilegum afleiðingum. 

[Bjarni Jónsson, 1.10.2015 kl. 22:06]

Sýrland, þetta forna menningarríki, er sprengt aftur til Steinaldar í þessu dæmalausa borgarastríði með erlendri þátttöku.  Ef fer sem horfir, mun Sýrland lenda á áhrifasvæði Persa, sem er mikil ógn við Ísrael og vestræn ítök í Austurlöndum nær.  Þessa þróun má skrifa á reikning BNA, eins og fram kemur hér að ofan.  Rússar ganga á lagið, þegar stjórnin í Washington sýnir veikleikamerki.  Þetta getur orðið upphafið að miklu "drama".

[Gústaf Adolf Skúlason, 1.10.2015 kl. 22:29]

Sæll Bjarni og þakka þér athugasemd, er þér hjartanlega sammála. Rússneski öryggissérfræðingurinn Pavel Felgenhauer segir í viðtali við Sænska Dagblaðið að Pútín viti, hvaða staði ráðist er á: "Það eru engin mistök að sprengjum er varpað á staði, sem ekki tilheyra IS. Rússland sprengir þá staði sem al-Assad bendir á." Ljóst er að djúpur ágreiningur ræður milli USA og Rússlands um skotmörk Rússa. Rússar munu einnig ná fram hernaðarmarkmiðum al-Assad með landher al-Assads, Hizbollah og Íran, sem fylgja munu eftir flugárásum Rússa.