Vonandi tæmast þuru gervitárin í "sorginni stóru."

Megi sorg þeirra, sem vilja kasta út stjórnarskrá lýðveldisins fyrir nýja Samfylkingar-VinstriGræna-ESB-stjórnarskrá, yfir því að ótækt frumvarp þeirra nái ekki fram að ganga, verða nægilega mikil til að birgðir þuru gervitáranna klárist og a.m.k. eitt pínulítuð, - svona agga, agga, aggalítið krókódílstár - nái að kíkja fram.

Það er ekki hátt risið á þingmönnum ríkisstjórnarinnar og leppum þeirra, sem hver á fætur öðrum koma upp í pontu Alþingis og reyna að telja fólki trú um, "að formannsklíka þingflokkanna" hafi gert "hallarbyltingu" til að tryggja að frumvarpið nái ekki fram að ganga.

Frumvarpið nær ekki fram að ganga, einfaldlega vegna þess að það er enginn þingmeirihluti fyrir frumvarpinu. Og er það vel eftir alla þá ömurlegu vegferð, sem þetta mál allt hefur fengið og alla þá gagnrýni frá fjölda fólks úr öllum stéttum samfélagsins, bæði lærðra og lögfróðra sem venjulegs fólks. Jafnvel forsetinn sjálfur hefur þurft að leggja sig í málin til að benda á grundvallargalla hugmynda Stjórnlagaráðs. Bara sú staðreynd að helmingur þjóðarinnar sat heima þegar skoðanakönnunin var gerð sýnir, að þetta er ekki mál, sem þjóðin vill forgangsraða eins og ríkisstjórnin gerir. 

Ef mig misminnir ekki voru minna en 2% þjóðarinnar því fylgjandi eftir hrun að breyting stjórnarskrárinnar væri mikilvægasta verkefnið.

Tillaga ríkisstjórnarinnar og leppa þeirra er þeirra eigin stjórnarskrá til að mæta kröfum ESB um afsal fullveldis Íslands. Til að ESB komist yfir stjórn Íslands, auðlindir okkar og fjármálakerfi.

Það er vel að málið falli. Það er vel að ríkisstjórnin falli. Megi þjóðin komast sem fyrst frá þessu leiðindamáli, sem kostað hefur ógrynni fjárs, sem betur hefði verið nýtt til þarfari mála t.d. innan heilbrigðisgeirans. 

Sorg í hjarta yfir stjórnarskránni

Athugasemdir

[Jón Valur Jensson, 6.3.2013 kl. 21:11]

Vel mælt, Gústaf. Og til viðbótar við lokaorð þín í pistlinum má benda á, að í frétt í helgarblaði DV 22.-24. febrúar sl., bls. 14, kom þetta fram: "Gert er ráð fyrir um 950 milljóna heildarkostnaði við ESB-viðræður." Ennfremur: "Mikill kostnaður. Um það verður ekki deilt að viðræðurnar hafa kostað sitt. Gert er ráð fyrir að kostnaður fari í tæpan milljarð króna." Einnig: Alþingi hefur úthlutað í fjárlögum samtals 490 milljónum króna til að standa straum af beinum kostnaði vegna aðildarviðræðna á árunum 2010 til 2013 og samtals 590 milljónum króna vegna þýðingarverkefna fyrir árin 2009 til 2013. Samkvæmt skýrslu utanríkisráðherra sem var lögð fyrir Alþingi í maí 2011 er áætlaður kostnaður nú 953 milljónir króna að teknu tilliti til niðurskurðar á framlögum til þýðinga."

Já, það hefði sannarlega munað um minna til heilbrigðiskerfisins! En þessi ríkisstjórn þykist kunna að forgangsraða rétt -- og kýs eitt umfram annað!

[Gústaf Adolf Skúlason, 6.3.2013 kl. 23:21]

Sæll vertu Jón Valur og þakkir fyrir vinaorð. Mikil er skömm þessarra einstaklinga, sem hafa misnotað valdastöður til að tæma sjóði landsmanna í ESB vegferð sinni. Það verður fróðlegt þegar allir reikningar verða lagðir saman að sjá heildartjónið af þessu brölti öllu. Ég var í stuttri heimsókn um daginn, tengdamamma var á Landspítalanum og þá gafst mér tækifæri að ræða við nokkrar af harðduglegum hjúkrunarkonum og læknum spítalans. Þar kæmu peningarnir svo sannarlega að notum!

[Jón Valur Jensson, 7.3.2013 kl. 01:16]

Heiður þeim sem heiður ber, vinur.

[Jón Ragnarsson, 7.3.2013 kl. 11:10]

http://blog.pressan.is/larahanna/2013/03/06/aminning-til-althingismanna/