Hver er refsingin fyrir að nota sama dömubindið tvisvar?

Mynd: Einnota merking dömubinda kemur í veg fyrir óseðjandi dansfíkn íslenskra kvenna sem margnota vissa gerð dömubinda sem innlegg í skó sem breytast þá í maraþon dansskó.

Er það vegna allra karla umhverfis-, orku- loftslagsráðuneytisins - og allra annarra mikilvægra ráðuneyta, sem fara andlega á Evrópusambandstúr að minnsta kosti einu sinni í mánuði, sem nauðsynlegt er talið að merkja sérstaklega dömubindi sem einnota? Hvað á að gera við öll herrabindin?

Umhyggja ráðuneytisins væri skiljanleg ef fjöldi kvenna létist fyrir aldur fram vegna misnotkunar dömubinda í einfeldni sinni að endurnota mætti sama dömubindið mörgum sinnum. Kannski lumar Jóhann Páll Jóhannsson umhverfisráðherra á slíkum dánartölum sem óbirtar eru almenningi en verða birtar í ESB-biblíu ríkisstjórnarinnar áður en Ísland kemst inn í himnaríkið í Brussel en þar eru öll ský skreytt gylltum skálum með ónotuðum dömubindum. Í himnaríki ESB eru allir karlar konur og allar konur karlar og enginn greinarmunur gerður á herra- og dömubindum. Bindi er bindi segja fróðir menn í Brussel án þess þó að þau bindi menn til að fara í herra- eða dömubindabindindi.

Þjóðin lýtur einnota höfði sínu fyrir þessari visku ESB-greindarinnar. Illa launaðir starfsmenn umhverfisráðuneytisins eiga allir skilið að fá bæði mánaðarlega launahækkun og Nóbelsverðlaun fyrir slíka frelsandi reglugerð um auðkenningu einnota dömubinda. Stærsti sigur femínismans er í höfn.

Jóhanni Páli verður eflaust boðin staða sem kvenréttindakonu Sameinuðu þjóðanna fyrir vikið og fær kannski mynd af sér í skrautsölum SÞ og ESB við hliðina á myndum af Þorgerði, Kristrúnu, Katrínu og Reykdals. Án þessara alþjóðlegu stórmenna myndi heimurinn farast í endalausri hringrás ómerktra dömubinda og rauðra herrabinda.

 

Dömubindi verði merkt sem „einnota“