Alþingi betur sett án Ásthildar Lóu Þórsdóttur

Það hefur verið margvísleg reynsla að verða vitni að umræðunum um samræði menntamálaráðherrans fyrir meira en 30 árum síðan við dreng sem hún hóf samband við, þegar hann var 15 ára gamall og hún 22 ára gömul. Málið hefur orðið stórpólitískt vegna framkomu menntamálaráðherrans sjálfs sem dengir yfir þjóðina sinni hlið í þessu gamla einkamáli. Svo virðist sem glæpur RÚV hafi verið að ræða við barnsföður hennar að henni forspurðri og hún kennir fjölmiðlum um að hafa neytt hana til að segja af sér. Harður aðgangur hefur verið gerður að RÚV sem fór út fyrir ramma pólitíska rétttrúnaðarins. RÚV hefur birt „leiðréttingu“ og beðist velvirðingar á að hafa haldið því fram að ástarsambandið hafi hafist þegar drengurinn var 15 ára gamall og tekur núna undir útskýringu Ásthildar Lóu sem segist hafa verið hrein mey þar til eftir að drengurinn varð 16 ára gamall sem þá kom og barði á glugga hennar og að því er virðist hafa hrætt hana til samræðis.

Femínistar rétttrúnaðarins ásamt valkyrjunum hrína í einum kór hvað RÚV er vont, hvað Morgunblaðið er vont, hvað Sjálfstæðisflokkurinn er vondur, hvað Framsóknarflokkurinn sé vondur, hvað bókstaflega allir sem sporðrenna ekki gagnrýnislaust einhliða afsökunum fv. menntamálaráðherra séu vondir að ræða þetta „erfiða mál.“ Eiginlega gengur kenningin út á að verið sé að koma pólitísku höggi á Flokk fólksins sem greinilega á að vera bannað, þótt Flokkur fólksins ásamt öðrum valkyrjum hafi fullt leyfi til að koma pólitísku höggi á andstæðinga sína sem í dag er bókstaflega öll þjóðin vegna inngöngunnar í ESB en útgerðareigendur sérstaklega sem græða peninga á fisknum „okkar.“ Heiðar Örn Sigurfinnsson, fréttastjóri RÚV kom síðan úr RÚV-skápnum með rennandi krókódílatár yfir því, hvað það er erfitt að vera blaðamaður á RÚV og fá yfir sig gagnrýni úr þessari óvæntu átt. 

Af hverju allt þetta offors?
 

Hvers vegna er þessi hópur að verja Ásthildi Lóu Þórsdóttur? Bara af því að hún er kona? Af því að hún var ráðherra Flokks fólksins? Já, einmitt og aðallega þess vegna. Jafnaðarmennskan á Íslandi sem núna gerir endurkomu eftir hrakfarirnar í Icesave, þolir enga gagnrýni eða neikvæða umfjöllun sem getur skaðað vald þeirra yfir bókstaflega öllu því sem gerist á Íslandi. Í heimi RÚV gildir einokun á fjölmiðlamarkaði. Í heimi jafnaðarmanna verður málefnaleg umræða sem inniheldur gagnrýni að ójöfnuði sem tafarlaust verður að laga. Það er náttúrulega leiðinlegt fyrir sakborninga Efstaleitis að fá þessa gusu yfir sig úr þessari vitlausu átt en RÚV sem er hluti jafnaðarmannaspillingarinnar á Íslandi verður eflaust fljótt að jafna sig og halda áfram varðveislu rétttrúnaðarins og einokun skoðana á Íslandi.

Það sem allir tipla á tánum í kringum er spurningin um barnaníð. Er einhver ástæða til að ræða það ekki í þessu máli bara af því að ráðherrann er framákona í Flokki fólksins? Að málið sé fyrnt vegna aldurs? Alla vega er ekkert vandamál að minnast á það erlendis. Bæði í Svíþjóð, Bretlandi og eflaust fleiri löndum er bent á að „íslenski barnamálaráðherrann átti barn með barni.“ BBC vitnar meira að segja í íslensk hegningarlög grein 201 sem er svo hljóðandi:

„Hver sem hefur samræði eða önnur kynferðismök við barn á aldrinum 15, 16 eða 17 ára sem er kjörbarn hans, stjúpbarn, fósturbarn, sambúðarbarn eða barn sem er tengt honum þannig fjölskylduböndum í beinan legg, eða barn sem honum hefur verið trúað fyrir til kennslu eða uppeldis, skal sæta fangelsi allt að 12 árum.“

Tíðarandinn hefur breyst og sífellt fleiri gera sér grein fyrir ábyrgð fullorðinna gagnvart börnum. Hegningarlögin eru mjög skýr með afstöðu til barnaníðs samanber 202 gr.:

„Hver sem með blekkingum, gjöfum eða á annan hátt tælir barn yngra en 18 ára til samræðis eða annarra kynferðismaka skal sæta fangelsi allt að 4 árum.“

Það er skiljanlegt að ríkisstjórnin vilji ekki ganga með þennan myllustein um hálsinn og því varð útkoman sú að Ásthildur Lóa var látin fara. Hún er núna í launuðu starfsleyfi frá Alþingi. Það besta fyrir Alþingi er að hún komi aldrei aftur þangað inn fyrir dyr. Miðað við dómgreindarleysi hennar að glenna einkamálið framan í þjóðina hefur hún fyrirgert öllu trausti til þess að gegna embættisstörfum fyrir þjóðina.

RÚV leiðréttir sig

Athugasemdir

[Ásgrímur Hartmannsson, 29.3.2025 kl. 16:50]

Það er þetta með "tíðarandann" sem mig hryllir við.

Svo margir sem eru fæddir fyrir 1960 eru að ýja að því sterklega, að hér áður, þegar það var ekkert sjónvarp á fimmtudögum, þá bara fóru menn út á róló og nauðguðu einhverjum krakka af handahófi.

Uggvænlegt.

[Gústaf Adolf Skúlason, 29.3.2025 kl. 23:37]

Já þannig má kannski orða ofsafengna réttlætingu á umgengni Ásthildar við barn á þeim tíma. Sannleikurinn er samt sá og ég held að flestir landsmenn séu því sammála, bæði þá og nú, að það er siðferðilega kolrangt að fullorðnir hafi samræði við börn. Á þessum aldri er mikill þroskamunur á 22 ára og 15 ára. Sá fullorðni ber alltaf ábyrgðina á að setja mörkin. Þá ábyrgð er ekki hægt að leggja á barnið.