Allt á Ingu-bókina lært

Inga Sæland hvæsir á blaðamenn fyrir að spyrja um sniðgöngu hennar og Flokk fólksins við lögin. Hún afgreiðir gagnrýnar spurningar með fyrsta flokks hroka og ritskoðunartilburðum: „Óvandaðir falsfréttamiðlar í eigu auðmanna og ákveðinna stjórnmálaafla koma fram við fólk eins og fífl." Krafa um að Inga Sæland sem núna er ráðherra fari að lögum eins og aðrir landsmenn er ekki til umræðu. Í staðinn eru þeir sem gagnrýna ásakaðir um falsfréttir og sagðir óvandaðir, auðmenn í heild dæmdir sem eitthvað óskilgreint og slæmt og rætt um „ákveðin stjórnmálaöfl" sem annarlegt fyrirbæri. Stalínískur andi einræðis- og ritskoðunar svífur yfir vötnum.

Inga Sæland og Flokkur fólksins eiga alla afkomu sína að þakka skattgreiðendum sem sumir hverjir eru auðmenn. Flestir auðmenn eru heiðarlegir frumkvöðlar sem með eigin dugnaði hefur tekist að skapa arðbær viðskipti, stofna og stækka fyrirtæki, ráða til sín starfsfólk og skapa þau verðmæti sem á ríkismáli heitir skattstofn. Sannleikurinn er sá að án auðmanna og ákveðinna stjórnmálaafla sem virða einkaeignarréttinn, þá kæmust Inga Sæland og stöllur hennar í ríkisstjórninni ekki af. 

Stjórnmálamenn skapa engin verðmæti – þeir lifa á skattgreiðendum

Stjórnmálamenn skapa engin verðmæti sem hægt er að selja og skattleggja eins og ríkið gerir við auðmenn og starfsfólk fyrirtækja þeirra sem Inga fyrirlítur greinilega. Stjórnmálamenn fá greidd laun af þeim verðmætum sem aðrir skapa. Þegar stjórnmálamenn greiða skatt eru þeir aðeins að skila til baka litlum hlut af verðmætum landsmanna sem þeir fengu í byrjun. Hlutverk stjórnmálamanna á meðal annars að vera að skapa fyrirtækjum einfalt og skýrt regluverk sem auðveldar þeim að framleiða þær vörur sem skapa meira virði og verðmæti í samfélaginu. 

Fjármálasvindl Ingu Sælands í upphafi nýrrar ríkisstjórnar er ávísun á nýja vinstri hrunstjórn. Hættan er að ríkisstjórnin muni þrengja svo að hálsi gullgæsa Íslands í sjávarútvegi og ferðaiðnaði, að hætta er á að þær kæfist. Ekki mun þessi ríkisstjórn verpa neinum gulleggjum fyrir landsmenn. Þjóðin lagði niður störf Vinstri grænna og Pírata á Alþingi í kosningunum. Dettur einhverjum í hug að þær muni skera niður báknið eins og Trump er að gera í Bandaríkjunum? Stefna nýju stjórnarinnar er ekki sú stefna sem landsmenn kusu sér enda sögðu valkyrjurnar eitt fyrir kosningar og gera annað eftir þær.

Innleiðir ríkisstjórnin ritskoðun í stíl ESB?

Mikil heift og bræði ríkir innan ESB gagnvart frjálsum skoðanaskiptum. Reynt er með öllum ráðum að losna við X, sem byrjaði að virða málfrelsið eftir að Musk tók yfir. ESB hefur komið upp stafrænu eftirliti með öllu skrifuðu og töluðu máli á öllum tækjum á Internet. Ein skoðun ríkir og það er skoðun framkvæmdastjórnarinnar. Lög um hatursumræðu eru notuð til að fangelsa stjórnarandstæðinga eins og í Bretlandi og í Þýskalandi er reynt að banna „ákveðin stjórnmálaöfl" með lögum. 

Inga ræðst ekki á garðinn þar sem hann er lægstur með því að kalla Morgunblaðið, einn elsta og vandaðasta fjölmiðil landsmanna „óvandaðan falsfréttamiðil." Ef Inga Sæland fær að komast upp með allt sitt svindl má búast við að Kristrún fylgi boði Alþjóðasambands sósíalista um ritskoðun á Íslandi. Inga getur þá bætt við sig titlinum „hatursmálaráðherra." Þá munum við sjá sömu þróun og í Bretlandi að þeir sem gagnrýna ríkisstjórnina frá hægri verður stungið í steininn. Það lítur ekki betur út en að það sé einnig meining nýju ríkisstjórnarinnar.

Ísland í ESB og upptaka evru aðalmál ríkisstjórnarinnar

Þjóðin verður á endanum að rísa upp eins og í Icesave deilunni og koma í veg fyrir að þessari ríkisstjórn takist að svíkja þjóðina í ESB, afnema stjórnarskrá lýðveldisins og leggja niður fjárhagslegt sjálfstæði Íslands með upptöku evru. Fyrir kosningar sögðu valkyrjurnar að mál ESB yrði ekki sett á dagskrá! Samt eru kosningar um aðild að ESB ár 2027 það fyrsta sem sést í upphafi ríkisstjórnarsamstarfsins auk fjármálahneykslis Ingu Sælands.

Af hverju flytja valkyrjurnar ekki bara til Brussel og leyfa landsmönnum að vera í friði á klakanum?

„Þarf að minna valdamenn á í umboði hvers þeir starfa“