Sigmundur Davíð Gunnlaugsson - sannur þjóðarleiðtogi Íslands

Í ítarlegri grein í Morgunblaðinu fer fyrrverandi forsætisráðherra Íslands, Sigmundur Davíð Gunnlaugsson, fram á afsökunarbeiðni RÚV vegna framkomu gagnvart sér og eiginkonunni í Panamaskjalamálinu. Rekur hann svikaráð ríkisútvarpsins sem notað var í samfelldri árás á réttkjörna lýðræðislega fulltrúa fólksins með það að marki að koma ríkisstjórninni frá völdum. 

Sigmundur skrifar, að hann geti "ekki annað en gert athugasemdir við að Ríkisútvarpið skuli á árinu 2016 hafa stigið það skref að leita samráðs við utanaðkomandi og erlenda aðila um að steypa ríkisstjórn Íslands af stóli."

Eins og kunnugt er ákvað Sigmundur Davíð Gunnlaugsson að stíga til hliðar á meðan versti stormurinn gekk yfir. M.a. var erlendum fjölmiðlum smalað til Íslands til að taka þátt í ljótum leik RÚV og sænska sjónvarpsins að rægja þáverandi forsætisráðherra, eyðileggja mannorð hans og koma honum frá völdum. 

En einmitt með því að stíga til hliðar varði Sigmundur Davíð Gunnlaugsson ríkisstjórnina falli. Þeir sem eftir sátu í ríkisstjórninni kolféllu hins vegar undan álagi fjölmiðla ásamt múgæsingarhópi stjórnað af klappstýrum fyrrverandi útrásarvíkinga á Austurvelli. Ákvað ríkisstjórnin í trássi við stjórnarskrána og vilja landsmanna að skera þingtíma og valdatíma sinn um fjórðung. Uppi situr þjóðin stjórnlaus og mörgum af efnahagslegum markmiðum ríkisstjórnar Sigmundar Davíðs Gunnlaugssonar hefur verið ýtt út af borðinu.

Það verður að taka undir með Sigmundi Davíð, að það sé "sjálfsögð krafa að stofnunin (RÚV) fari að lögum. Það getur varla talist ásættanlegt að pólitískir aktívistar fái gagnrýnilaust að nota slíka ríkisstofnun til að reka eigin áróður."

Ásakanir fyrrverandi forsætisráðherra á núverandi starfsmenn ríkisútvarpsins eru réttlætanlegar en krafan um afsökunarbeiðni útvarpsstjórans langt í frá nein "refsing" fyrir athæfi RÚV-manna að mínu mati. Enda er Sigmundur Davíð Gunnlaugsson hvorki "ákærandi, rannsakandi, saksóknari, dómari og böðull" eins og hann lýsir RÚV í grein sinni. 

Þjóðin hefur hafnað Samfylkingunni og vinstri mönnum sem hafa fengið stærsta fylgishrun lýðveldistímans. Engu að síður hafa valdasjúkir einstaklingar í þeirra röðum RÚV á valdi sínu og beita því í pólitískum tilgangi gegn lýðræðislega, réttkjörnum fulltrúum Íslendinga. 

Fyrr eða síðar verða landsmenn að taka á þessu kýli og hleypa óþverranum út. Þetta klapplið dæmdra bankaræningja hefur engan rétt á að þvinga skoðunum sínum á landsmenn gegnum miðil sem er greiddur með sköttuðu fé landsmanna. Ég hef áður bent á að ein leið er að leggja niður RÚV í núverandi mynd og opna litla stöð í staðinn sem sinnir öryggismálum landsins. Fréttamennska og auglýsingamarkaður fer best í höndum einkaaðila en ekki sem opinber einokunarstarfsemi. 

Sporin hræða eða eins og Sigmundur Davíð Gunnlaugsson skrifar sjálfur: 

"Það er sitt hvað réttlæti og RÚVlæti."

Það er ekki síður mikilvægt fyrir þjóðina að fá Sigmund Davíð Gunnlaugsson aftur að stafni þjóðarskútunnar en að hafa unnið Icesave-sigurnn. Sigmundur Davíð Gunnlaugsson er einn af bestu sonum þjóðarinnar sem fram hafa stigið á undanförnum árum og hefur staðið fremstur í eldlínunni gegn fjármálasvindlurunum.

Með því að blása byr undir vængi Sigmundar Davíðs Gunnlaugssonar getur þjóðin haldið ótrauð áfram veginn gegn fjármálaspillingunni og hningnun fjölmiðla og stjórnmála á Íslandi.

Og ekki er vanþörf á því, þegar hrægammasjóðir eru allt að drepa með okurvöxtum og verðtryggingu. 

Fer fram á afsökunarbeiðni

Athugasemdir

[Sigurður M Grétarsson, 29.12.2016 kl. 09:59]

NeRúv mun örugglega ekki biðja SDG afsökunar enda hfa þeir ekki gert neitt rangt gagnvart honum og skulda honum því enga afsökunarbeiðni. Það er SDG sem þarf að biðja þjóðina afsöpkunar á þeirri spilligu sem hann gerðist sekur um með að hafa þrétt fyrir að vera forsætisráðherra veið með fé í skattakjóli og logið til um það bæði gagnvatr þjóðinni og samstarfsmönnum sínum. Við höfum bara orð hans fyrir því að hann hafi staðið skil á öllum sköttum sem honum bar því ein af megin ástæðum þess að vera með fé í skattskjóli er sú að þannig getur maður leynt upplýsingum fyrir skattayfirvöldum og þar með er auðvelt að stinga fé undan sköttum án þess að hægt sé að sanna það á viðkomandi. 

Í þessu efn má geta þess að það kostar um hálfa milljón á ári að vera með fé í eignarhaldsfélagi í skattaskjóli og fá lögfræðifyrirtæki í Panama til að skaffa leppa í stjórn þess. Einu mögulegu ávinningarnir fyrir þann kostnað eru að leyna tekjum fyrir skattayfirvöldum eða leyna eignarhaldinu á peningunum. Það er engin annar mögulegur ávinningur af slíku fyrirkomulagi til að réttlæta þennan kostnað.

Það að ráðherrar í ríkisstjórn Íslands ættu fé í skattaskjóli er þvílík spilling að þær upplýsingar átti fullt erindi til almennings. RÚV hefði því burgðist hlutverki sínu ef ekki hefði verið fjallað um þetta mál. 

Það voru þessir þrír spilltu ráðherrar ríkisstjórnarinnar sem áttu fé í skattaskjólum sem felldu ríkisstjórnina með spillingu sinni og lygum um eignir sínar. 

Það er einfalelga lygi að RÚV sé hlutdrægur fréttamiðill. Þetta er faglegasti og hlutlausasti fréttamiðillinn á Íslandi þó vissulega sé hann ekki fullkomin frekar en önnur mannana verk.

[Tómas Ibsen Halldórsson, 29.12.2016 kl. 10:27]

Það er athyglisvert að sjá að alveg eins og helstu fjölmiðlar í Bandaríkjunum reyndu allt sem þeir gátu til að níða skóinn af Donald Trump þannig hafa íslenskir fjölmiðlar, með RUV í broddi fylkingar lagt sig alla fram við að níða skóinn af Sigmundi Davíð Gunnlaugssyni.  Svo erum við nauðbeygð til að halda þessu lélega apparati gangandi með peningum okkar.  Þvílík skömm, þvílík niðurlæging og virðingarleysi gagnvart því fólki sem vill hlutlausar og réttan fréttaflutning að þurfa að hlusta á persónulegan áróður einstakra fréttamanna sem nota aðstöðu sína sér og sínum skoðunum til framdráttar, en SDG er ekki eina fréttaefnið sem þessir einstaklingar beita sér gegn.

[Þorsteinn H. Gunnarsson, 29.12.2016 kl. 10:30]

Sannur þjóðarleiðtogi Íslands segir færsluritari. Í hverju skyldi það felast. Ef til vill í leiðréttingunni?

Hún fór þannig fram að eitthvert verðbólguskot á skuldir var leiðrétt og ríkið mingraði peningum í það dæmi. Fólk sem var flutt frá landinu og námsmenn sem voru ekki í skattasambandi við landið en fengu leiðréttingu þar sem þeir voru með skuldir á viðmununarárunum, fengu hana ekki greidda út. Hvert fór sá peningur?

Eins og títt er um verðbólguskot þá hækkuðu innistæður líka, Var það leiðrétt? Eða fengu innistæðueigendur að halda þeirr ábót sem fékkst á spariféð. Það hefði verið karlmannlegt af Sigmundi Davíð að leiðrétta í báðar áttir. Nei hann er foringi þeirra ríku auðvita verða þeir að eiga sér málsvara. Ef hann hefði leiðrétt í báðar áttir  hefði verið hægt að segja að þann hefði verið efni í þjóðarleiðtoga. Leiðréttingin var atkvæðaveiðitæki.

Nú er Sigmundur með skipulagða áætlun um að reyna að reisa sig við úr bælinu og nýtur til þessa aðstoðar vildarvina. Þetta er allt saman mjög skipulagt hjá honum.

Það er von að hann megi ekki vera að því að mæta í þinginu og vinna að fjárlagafrumvarpinu, enda hafa Austfirðingar gert athugasemdir við það árangursleysi hans. En þjóðarleiðtogi ja hérna. Jónas frá Hriflu, Ólfur Jóhannesson Steingrímur Hermannsson, Hermann Jónasson og Eysteinn Jónsson allt voru þetta leiðtogar, en menn verða nú að vera eldri en tvævetur til að fá þann titill.

[rhansen, 29.12.2016 kl. 11:08]

Þakka þer góðann pistil Gustaf Adolf  ...Það verður blettur á RÚV og Islenskri þjóð hvernig komið hefur verið við okkar stærsta leiðtoga stjornmálanna siðari ára og sannarlega komið að þvi að allir biðji afsökunar þó slikt se litilfenglegt miðað við skaðan sem skeð hefur STÆRRI ERU ÞÓ ÁHYGGJUR MINAR AF SIÐBLINDU  fólki sem ekki vilar fyrir ser að ganga undan   ungufólki og hafa fyrir þvi einelti og ókurteysi og fremst i flokki  gangi RIKISFJÖLMIÐILL ALLARA LANDSMANNA .!..Eg tel mig þekkja það vel til i heiminum að margt sem hefur verið gert á hlut SDG af leikum og lærðum hefði aldrei verið látið afskiptalaust meðall annara lyðræðislanda og það hefðu forsvarsmenn ,,(M.a. Rikisstjórnar og forsætisráðherra her auðvitað átt að sja til að slikt yrði ekki látið viðgangast og sist af öllu leggjast á sveif með "ÓMERKILEGUM" ! ) ...EN SVO BREGÐAST KROSSTE SEM ÖNNUR ....og siðferði her synist ekki i hávegum haft enda Landin ansi slappur i sliku gegnum ár og aldir    það hefur siðasta ár sannað bæði i þessum máli og fl sem upp hafa komið ,að ekki virðist breyting þar á ...Sorglegt  !....... Gleðilegt nyár !

[Gústaf Adolf Skúlason, 29.12.2016 kl. 14:29]

Þakka innlit og inlegg. Skil sárnað Samfylkingarmannsins en þótt allir litir heims séu notaðir nægir það ekki til að dylja sannleikann. Á meðan það er stefna Samfylkingarinnar að það sé "ekki bannað að eiga peninga í útlöndum" (svar fyrrverandi formanns Samfylkingarinnar í viðtali við RÚV vegna ásakana um að gjaldkeri Samfylkingarinnar ætti aflandsfélög í skattaskjólum), þá getur Samfylkingin ekkert sagt um eigur eiginkonu fyrrverandi forsætisráðherra. Guli liturinn fellur því um sjálfan sig eins og "gula" pressan.

Góð athugasemd Tómas, það er sama sagan alls staðar enda um sameiginlegan óvin að ræða sem rænt hefur heilum samfélögum af þegnum sínum (sbr. ESB og Grikkland). Þetta atriði ætti að ræða sérstaklega til að skilja hlutina betur í alþjóðlegu samhengi.

Þakka góð orð þín rhansen og er þér fyllilega sammála, að aðför RÚV að forsætisráðherra hefði ekki verið liðin í öðrum lýðræðisríkjum. Það hljóta að verða afleiðingar af fyrirsátri RÚV gegn lýðræðislega kjörnum forsætisráðherra þjóðarinnar. Eftir þetta getur t.d. enginn kjörinn forsætisráðherra Íslands hleypt fjölmiðlum inn á gafl með sama trausti og opnum anda og Sigmundur Davíð Gunnlaugsson fyrrverandi forsætisráðherra sýndi.

RÚV gengur erinda alþjóðlegra afla sem vilja afnema þjóðir heims og steypa öllum heiminum í einn bankamarkað, þar sem almenningur verður látinn þræla fyrir fjármálasvindlurum og bönkum sem "eru of stórir til að fara á hausinn". 

[halkatla, 29.12.2016 kl. 16:36]

Jamm það má færa rök fyrir því að þessi klikkhaus sé sæmandi þjóðarleiðtogi Íslendinga.

[Sigfús Ómar Höskuldsson, 29.12.2016 kl. 16:53]

Vonandi lærir höfundur ekki það siðferði sem SDG sýndi hér á árunum 2009 til 2012 í stóra Volvoríkinu sem hann kýs að búa í en gagnrýnir í hinu orðinu.

Eins er merkilegt með höfund og aðra adáendur SDG, um leið og e-r gagnrýnir leiðtoga lífs þeirra þá er hinn sami orðinn Samfylkingarsinni. E-ð myndi heyrast er þeir sem styðja þjóðernisflokkanna á Íslandi og leiðtoga þeirra væru kallaðir fasistar í hvert sinnið sem þeir opnuðu túllann. Höfundur góður, hafðu yfirlýsingarnar í lágmarki, það gæti aukið markgildi orða þinna. 

SDG sýndi þjóð sinni þann ómerking að klifa stanslaust á meðan hann sat í stjórnarandstöðu um hverjir væru kröfuhafar á meðan konan hans var einn af þeim. Eins kaus hann að gera sýndargjörnin nokkrum klukkustundum áður en lög sem gerðu SDG þá lögbrjót tók gildi.

Kannski tíðkast það nú í Svíaríki að reyna fara eins mikið á svig við lög og anda þeirra sem mest hann má, en það á ekki að samþykkja hér á landi. 

Er ekki höfundur stöðugt að tala um að það þurfi að gera hlutina öðruvísi hér á landi en í vonda, vonda Volvolandinu ? Þetta hlýtur þá að vera eitt af því.

Ekki satt ?

[Gústaf Adolf Skúlason, 29.12.2016 kl. 17:58]

Sigfús, þú verður að kynna þér málin: SMG er að eigin sögn "viðskiptafræðingur, Kópavogsbúi og mikill jafnaðarmaður enda flokksbundinn í Samfylkingunni."

Ef þér líkar það ekki verður þú að eiga það við SMG (guli textinn) hér að ofan. Og svo má vitna í bloggið þitt: "Samfylkingin hamast við að fremja fjöldamorð á sjálfum sér." Það hefur mér lengi fundist en ekki getað orðað svo vel.

[Sigfús Ómar Höskuldsson, 29.12.2016 kl. 20:39]

 Áægti höfundur, líklega er sterkt surströmming að fara með þig. Það skiptir mig litlu máli í hvaða flokki hver er hér, ég veiti því hinsvegar athygli, að þú og hjá skoðanasystkini þurfa alltaf að merkja allt með flokkum um leið búið er gera þarfir yfir þann sem er ykkur ósammála.

Hvert þú ert svo að fara með vísun í"bloggið mitt" verður e-r annar að reyna skija en sem fyrr, þú og þín skoðunasyskin geta svo aldrei svarað beint sem að ykkur er beint að, frekar með undarlegum svörum sem fáir skilja, líkt og leiðtogi lífs ykkar gerir alltaf. Eins og núna, þá sitja allir starfsmenn frétta RÚV undir þegar hann talar enn og aftur meintar samsæriskenningar.Hann hefur ekki getu til að nefna nöfn og standa undir orðum sínuim, frekar en höfundur gerir oft hér.

[Jósef Smári Ásmundsson, 29.12.2016 kl. 20:49]

Tómas Ipsen. Kanntu ekki boðorðin?

[Jón Valur Jensson, 29.12.2016 kl. 23:16]

Hvað ertu að rövla hér út í Tómas Ibsen, Jósef Smári? Hann fór þarna með rétt mál, en þeir sem taka þátt í aðförinni að Sigmundi Davíð munu hafa skömm fyrir.

Það á vitaskuld við um þennan fyrsta hér, SMG, sífellt afsakandi Samfylkinguna og takandi þátt í öllum hennar herferðum, hvort heldur í þágu sjálfrar sín, Breta og Hollendinga og ESB í Icesave-málinu, Evrópusambandinu sjálfu í sama máli og í makrílsmálinu eða hverju öðru sem honum hentar, m.a. sérvizku hans í "Gyðingavandamáli" hinna landmiklu olíuaraba í Miðjarðarhafsbotnum.

Þátttaka nokkurra hér í róginum gegn Sigmundi Davíð kemur manni sízt á óvart. Gústaf sló raunar SMG út í einu höggi, vel af sér vikið. Og Samfylkingin er raunar eini flokkurinn sem lætur sér lynda að hírast í flokksskrifstofum á hálfgerðu framfæri aflandssjóða. Öðrum þeirra virðist jafnvel fylgja bæði í bak og fyrir vafasamar fjármála-tengingar, lengi undir grun um að hafa þegið Rússafé, meðan Þjóðviljinn og félög kommúnista voru beintengd við Moskvu.

[Jón Valur Jensson, 29.12.2016 kl. 23:21]

Halkatla norðfirzka, ég hefði ekki búizt við þessu feilskoti af þér. 

[Gústaf Adolf Skúlason, 29.12.2016 kl. 23:39]

Þakka góð orð þín Jón og skrif þín um málið, sem ég hef lesið með athygli. Árásin á fyrrum lýðræðislega kjörinn forsætisráðherra okkar er árás á íslenska lýðveldið og verður erfitt fyrir misgáfuð nettröll að reyna að fela það.

Það er mikill munur á venjulegri fréttamennsku og að undirbúa fyrirsátur mánuðum saman. RÚV kemst aldrei fram hjá því að "fréttamennskan" þoldi ekki dagsins ljós, - aðal "fréttamaðurinn" Jóhannes Kristjánsson þakti glugga heimilisins með svörtum plastpokum á meðan hann vann við "fréttina" og samstarfsaðilar RÚV hjá sænska sjónvarpinum töluðu um kúpp (valdarán) gegn forsætisráðherranum. Sönnunargögnin gegn RÚV eru yfirgnæfandi en "fréttastofan" hefur ekki lagt fram nein gögn sem sýna að fyrrverandi forsætisráðherra hafi verið að svíkja fé undan skatti í skattaskjólum. 

[Jón Valur Jensson, 30.12.2016 kl. 01:06]

Einmitt. Frábært, þú dregur hér þræðina saman í eitt. Þvílík málefnafátækt þessara einbeittu ásækjenda Sigmundar Davíðs og Önnu Sigurlaugar!

Kær kveðja. 

[Jósef Smári Ásmundsson, 30.12.2016 kl. 06:26]

Sigmundur Davíð laug að þjóðinni Jón Valur. Það á ekki að bera blak af slíkum mönnum. Kannski má ljúga í kristindóminum?