Þakkir til Morgunblaðsins fyrir að segja hlutina eins og þeir eru

Það er alltaf gott að finna til stuðnings frá samherjum og greinilega finna margir fyrir einsleitni fréttastofu rétttrúnaðarútvarpsins. Virðist sem rétttrúnaðurinn speglist meira og minna í öllu litrófi daglegra frétta og því ástæða til grundvallar rannsóknar og endurskoðunar á starfseminni. Ég er alla vega ekki einn á báti með „sænskar draugasögur" t.d. skrifaði Sigurður Már Jónsson góðan pistil með lýsingu á sænsku skálmöldinni og vitnaði bæði til bókar Jóhönnu Bäckström Lerneby „Familjen" um Ali Khan glæpaklanið í Gautaborg og heimdarmynda um stríð glæpahópanna í Gautaborg sem hann bendir á, að RÚV ætti að sýna. Er hér með tekið undir þá ábendingu af heilum hug og skal Sigurður Már Jónsson hafa þakkir fyrir greinaragóð, sönn og rétt skrif í einstökum atriðum um hið þrungna ástand sem glæpahóparnir hafa skapað í Svíþjóð. 

Björn Bjarnason skrifar prýðilega grein 12. júlí um stjórnmálaástandið í Svíþjóð og sjálfskaparvíti Svía og segir að sjá megi merki á Íslandi, að þagað er um tengsl milli ofbeldisverka og innflytjenda. Meira að segja er þess krafist, að útlendingastofnun sé aflögð, fari hún ekki að kröfu öfgamanna. Segir Björn réttilega að betra sé að læra af reynslu annarra en að glíma við sjálfskaparvítið sem landsmenn geta verið sammála um. Vitnar Björn í skrif Jyllands-Posten um Svíþjóð sem  „víti til varnaðar." Danir eru skarpir og snöggir í hugsun og framkvæmd varðandi ofbeldis- og innflytjendamálin og er það ein af þverstæðum norrænnar „jafnaðarstefnu" að danskir kratar leiða þróun, sem gengur þvert gegn stefnu sænskra krata. Þannig gera Danir kröfur núna um samsetningu íbúðarhverfa, að aldrei verði meira en 30% hámark íbúa frá „ekki vestrænum löndum". 11% af 5,8 milljónum Dana eru af erlendu bergi og 58% þeirra frá ekki vestrænum löndum. Ráða á niðurlögum hliðarsamfélaga í síðasta lagi ár 2030 en í dag eru a.m.k. 15 slík í gangi og 25 til viðbótar á leiðinni. 

Leiðari Morgunblaðsins tekur upp vandann í Svíþjóð í dag og sýnir mér heiðurinn að vitna til greinarinnar um rétttrúnaðarútvarp vinstrimanna í blaðinu s.l. mánudag. Er það afskaplega gott að vita og vermir hjartaræturnar að finna stuðninginn við það sjálfsagða atriði, að mikilvægt er að segja hlutina eins og þeir eru, hvort sem um er að ræða innflytjendur eða ekki. Þetta hefur verið eitt af stóru bitbeinunum í sænskum stjórnmálum undanfarin ár, þar sem þeir sem hafa viljað ræða vandann, hafa sett sig í þá hættu að á þá sé ráðist með offorsi og rasistastimplum frá vinstri. Sænskir sósíaldemókratar virðast ætla að beita þeim brögðum í ríkari mæli og af meiri hörku í komandi kosningabaráttu, sem de facto er hafin, samanber yfirlýsingu Monu Sahlin f.v. formanns sósíaldemókrata í grein í Aftonbladet nýlega. Skrifar hún, að athugasemd Ulf Kristersson formanns Móderata um „íþyngjandi" fólksinnflutninga „séu sögulaus og djöfulleg orð." Segir Sahlin að „glæpamennska sé vandamál karla en konur komist áfram í lífinu, því þær mennti sig." Spyr Mona Sahlin hvort það séu ekki „karlmenn sem eru íþyngjandi og konur möguleikinn?"

Það er góðs viti á Íslandi að til er heilbrigð skynsamleg afstaða til umræðna og málefna og óhætt að ítreka enn og aftur það, sem ætti að vera svo sjálfsagt á okkar tímum en er því miður ekki alltaf: Að segja hlutina eins og þeir eru. Þá setningu ættu starfsmenn fréttastofu rétttrúnaðarútvarpsins að skrifa út í stórum bókstöfum og hengja á sýnilegum borðum út um alla stofnun bæði að innanverðu og utanverðu.

Athugasemdir

[Heimir Lárusson Fjeldsted, 14.7.2021 kl. 20:28]

Góður pistill.

[Gústaf Adolf Skúlason, 15.7.2021 kl. 00:06]

Takk Heimir fyrir góð orð þín. Kveðjur