Færsluflokkur: Dægurmál

Fýll Pípunefur heldur upp á páskana á fjórðu hæð

FylFýll Pípunefur sér eftir því að hafa ekki fengið sér íbúð á fimmtu hæðinni, því brimið í ham hafði næstum skolað honum út af svölum fjórðu hæðar að sögn Morgunblaðsins. Það er alltaf hægt að vera gáfaður eftirá en ef brimið æsir sig svo mikið gæti vinur okkar Pípunefur þurft að fara enn þá hærra og óvíst hvort til dygði ef Klettahlíðin væri ekki jafnhá. Og sögur eru um kletta sem hverfa í sæ og þá verður Fýll Pípunefur að leita sér að nýjum.

Alltaf er hollt að rísa upp frá vanvizku og slíkt ættu systkyni okkar í Sjálfstæðisflokknum að gera sem þykjast vita betur hvað aðrir segja en sögumenn sjálfir, hvort heldur þeir eru sérfræðinger á frjálsu flugi eða sérfræðingar horfnir í djúpan sæ ESB.

Batnandi manni er best að lifa og með þeim orðum óska ég öllum Gleðilegra Páska og góðrar upprisuhátíðar þennan Páskadag sem allra annarra.


Lýðræðið fótum troðið

efling-og-400x250"Aðeins 769 af 7.950 studdu verkfallið, flestir kusu ekki, aðrir greiddu atkvæði gegn verkfalli" (Staksteinar Mbl. 2. mars).

Sé það rétt að 20% kosningaþáttöku er krafist skv. lögum, þá er þetta í fyrsta lagi ólögleg ákvörðun. Í öðru lagi er þetta ekkert annað en valdníðsla á lýðræði meðlimanna að 9% þeirra ákveði bindandi aðgerðir fyrir félagið. 20% er að auki allt of lág tala til að tryggja að lýðræði ráði. Það eina sem tryggir lýðræði er að meirihluti félagasmanna eða 3.976 þeirra styðji aðgerðirnar. Þess vegna ætti að breyta lögum og krefjast yfir 50% virks stuðnings félagsmanna til að ákvörðun sé bindandi.

Höfundur Reykjavíkurbréfs víkur að því, að lögbundið er á Íslandi að vera meðlimur í verkalýðsfélagi: "Fyrir löngu er orðið tímabært að nútímavæða þessa skipan mála eins og aðra þætti þjóðfélagsins." (Reykjavíkurbréf 2. mars 2019)

Vinur minn Torgny Gustafsson eigandi farandheimilis á Gotlandi, Svíþjóð, stóð í rammri deilu við sænsku verkalýðshreyfinguna fyrir mörgun árum síðan sem reyndi að þvinga hann til að fylgja skilmálum sameiginlegu samninganna (kollektivavtalet). Deilan varð hatröm og lágu verkalýðsforkólfar m.a. að næturlagi með sjónauka í kringum kaffistofu hans til að reyna að komast að því, hver henti ruslinu á nóttinni en félagið hafði bannað meðlimum á ruslabílum bæjarins að sækja ruslið. Átti að sanna verkfallsbrot sem enn yku á sekt Torgnys og "glæp" hans gegn starfsmönnunum. Málið vakti gríðarlega athygli í Svíþjóð og snérist þjóðin á eitt með Torgny gegn verkalýðshreyfinni. Flykktust Svíar til Gotlands til að fá sér kaffi og tóku sinn skerf af ruslinu með sér þegar þeir yfirgáfu staðinn. Gustafsson var ekki meðlimur atvinnurekendasamtaka og allir nema einn starfsmanna hans án aðildar að verkalýðsfélagi. Ekki tókst verkalýðshreyfingunni að sýna fram að að hann borgaði minni laun en þau sem greiða átti skv. almennum kjarasamningum. Málið endaði hjá Mannréttindadómstól Evrópu sem ítrekaði rétt einstaklingsins til að velja að standa utan við félagssamtök. 

Í Svíþjóð ríkir félagafrelsi, bæði til að stofna hagsmunasamtök en einnig frelsi einstaklingsins til að velja - eða hafna - að vera með. Sænska verkalýðshreyfingin var frá upphafi hluti Verkalýðsflokks Sósíaldemókrata og svo seint sem í fyrra mánuði tilkynnti Félag opinberra starfsmanna að það hætti fjárgreiðslum til krataflokksins. Margir Íslendingar sem gengu með í sænsk verkalýðsfélög áður fyrr urðu hissa, þegar þeir fengu flokksskírteini Sósíaldemókrataflokksins sent í pósti ásamt félagsskírteini verkalýðsfélagsins. Þessu sambandi hefur í orði verið slitið til að sporna við sífellt minni þáttöku verkafólks í verkalýðsfélögum. Margar eru sögur um óheftaða mafíustæla verkalýðsforingja sem miskunnarlaust níðast á ófélagsbundnum og brjóta öll heilög markmið verkalýðshreyfingarinnar. Við í fjölskyldunni höfum margsinnis orðið vitni að því, hvernig verkalýðsfélög brjóta mannréttindi á starfsmönnum sem standa utan félaganna. Því miður eru verkalýðsfélög í pólitískri valdabaráttu einungis til fyrir forkólfana sjálfa sem vilja glansa "með þeim stóru" eitt augnablik á þjóðfélagssenunni.

Íslenska leiðin með lögboðna þáttöku í verkalýðsfélögum er brot á mannréttindum einstaklingsins. Rétturinn að velja sjálfur að vera með í félagi tekur líka yfir réttinn að hafna að vera með í félagi. Sú hlið mannréttinda eru þverbrotin á Íslandi og furðu sætir að það skuli hafa gengið í svo langa tíð. Á Norðurlöndum er þáttaka í verkalýðsfélögum yfir 60%, í Bretlandi um 25%, Í Þýzkalandi og Japan undir 20% og í Bandaríkjunum um 11% og 8% í Frakklandi. Velferð almennra borgara er því ekki í beinu hlutfalli við aðild í verkalýðsfélögum.

Að ekki náist nema í 11% starfsmanna til að tjá sig um verkfallsaðgerðir sýnir hversu langt frá lýðræði hægt er að komast með valdboði.

Fyrirtæki sem verða fyrir tjóni á vegum Eflingar ættu að kæra félagið fyrir ólöglegar aðgerðir og krefjast skaðabóta. Það á ekki að geta gengið að forkólfar verkalýðsfélaga geti níðst á mannréttindum félagsmanna og notað saklausa einstaklinga fyrir eigin valdabaráttu vegna þvingaðrar félagsþáttöku.

 


mbl.is Efling boðar frekari verkföll
Tilkynna um óviðeigandi tengingu við frétt

Gleðilega páska!

GladPaskÍslensku páskaeggin eru á Íslandi í ár. Búðin á Folkungagatan í Suður Stokkhólmi var tæmd og öll eggin rifin út. Skýringin var sú að of miklar birgðir voru keyptar inn í fyrra og innkaupin minnkuð um helming í ár. Þá tæmdist allt löngu fyrir páska.

Sama sagan er um Íslandslambið góða. Er á Íslandi en tómt í sænskum delíkatessbúðum. Í ár verða því nýsjálenskar lambakótilettur á borðum. 

Svíar sjóða og mála og borða egg eins og þeir fengju borgað fyrir um páskana. 

Reiknað er með að þeir renni niður um 64 milljónum soðinna eggja þessa páskahelgi. Það er 2 - 3 sinnum meira en venjulegar vikur. 

Meirihluti Svía - rétt eins og meirihluti Íslendinga - vilja hafa eggin laussoðin, fasta hvítu með lausri gulu. 

Það eru afskaplega góðar sannar fréttir þessa páskahelgi og þarf hvorki að reka prest né kóng fyrir það.

Ég óska öllum nær og fjær gleðilegra páska!

 

 


Á byrjunarreit borgarstjórnar

slobbajabba

1 Eftir hrikalegar niðurstöður Gallups, sem sýndu að Reykjavíkurborg er með lélegustu þjónustu allra bæjarfélaga á Íslandi, ætlar borgin sjálf að sjá um skoðanakannanir í framtíðinni. Tryggt verður að enginn taki mark á þeim með því að birta niðurstöðurnar 1. apríl árlega.

2 Tillaga hefur komið fram um að spara upphitunarkostnað Reykjavíkurborgar vegna slæms fjármálaástands.  Eiga starfsmenn borgarinnar með hita á milli 38-42 gráður að vera frammi á gangi á meðan aðrir með hærri hita verða lagðir í gluggakistur.

Ákveðið hefur verið að flytja innkaupastjóra Reykjavíkur yfir í hestadeild borgarinnar. Það hefur nefnilega komið í ljós, að í hvert skipti sem hann fer út í búð til að kaupa þvottavél þá kemur hann alltaf tilbaka með hest.

4 Meirihluti borgarstjórnar vinnur við að leysa erfitt reiknidæmi. Verið er að reikna út hversu mörg Instagröm eru í hverju kílói.

5 Píratar segjast hafa fundið lausn á neikvæðri fjármálastöðu borgarinnar. Þeir ætla að hala niður jákvæðu efnahagslífi.

6 Samfylkingarmenn segist hafa fundið lausn á neikvæðri fjármálastöðu borgarinnar. Þeir ætla að halda niðri jákvæðu efnahagslífi.

7 Starfsfólki við afgreiðslu matarpakka til aldraðra hefur verið ráðlagt að segja við kvartandi gamalmenni, að það geti ekki komið til greina að fiskurinn bragðist ekki eins vel og í síðustu viku, þetta sé nefnilega sami fiskurinn.

8 Ef maturinn bragðast eins og hundamatur, þá er það vegna þess að kattamaturinn er búinn.

9 Til að koma í veg fyrir að bæjarbúar geti rýnt í tölur borgarinnar á að setja gardínur á allar tölvur með windows.

10 Holuherferð borgarstjórnar er til að færa allt gatnakerfið á byrjunarreit þ.e.a.s. borg án vega. 

 


mbl.is Komið á byrjunarreit aftur
Tilkynna um óviðeigandi tengingu við frétt

Fasismi Evrópusambandsins

Útkoma kosninganna í Danmörku fylgir þeirri þjóðarvakningu, sem á sér stað í flestum ef ekki öllum löndum Evrópusambandsins. Þjóðarvakningu sem fyrst og fremst hefur verið ræst í gang af sjálfu ESB, vegna markmiðs ESB að stofna alríki Evrópu. Á þeirri vegferð verður að eyða sjálfstæði aðildarríkja og breyta þjóðareinkennum þeirra í aukasnúru aftan við skriffinnskubáknið í Bryssel.  

ESB hefur sjálft skapað eigin auðkenni alríkisins: "þjóð"hátíðardag ESB 9. maí, "þjóð"söng ESB, þar sem ESB hefur eignað sér síðasta hluta níundu symfóníu Beethovens og "þjóð"fána ESB með tólf gulum stjörnum á bláum bakgrunni. Þá hefur hinn sameiginlegi gjaldmiðill evran verið verkfæri til að þvinga fram samruna alríkisins með skelfilegum afleiðingum fyrir suðurríki ESB á sama tíma og Þýzkaland hefur endurheimt leiðandi drottnunarstöðu álfunnar allrar. 

Í þessu ferli hafa harkalegir árekstrar orðið við almenningsvitund í einstökum aðildarríkjum, sem m.a. lýsir sér í þverrandi þáttöku almennings í kosningum til ESB - nú síðast með um 42% kosningaþáttöku (lægst 13% í Slóvakíu). Öll vegferð ESB verður sífellt ólýðræðislegri í tímans rás og ESB búið að missa tökin á samrunaferlinu. 

Skärmavbild 2015-04-08 kl. 23.49.51Til að réttlæta þennan lýðræðisskort og til að hræða kjósendur frá því að styðja flokka, sem vilja viðhalda sjálfsákvörðunarrétti þjóða sinna, hafa valdamenn ESB lagt út í stjórnmálabaráttu sem útmálar gagnrýnendur alríkishugmyndar ESB sem "öfgasinnuðum hægri popúlistum" í stíl við nazista Adólf Hitlers.

Þetta hafa ESB-sinnar í aðildarríkjunum apað eftir og gengið svo langt eins og t.d. í Svíþjóð að mynda bandalag gegn ESB skeptískum flokkum til að reyna að útiloka þáttöku þeirra í ríkisstjórn. Afleiðingarnar verða þveröfugar og fjölgar þeim "skeptísku" jafnt og þétt.

Á Íslandi hefur ESB-umræðan m.a. verið fólgin í árásum á Sjálfstæðisflokkinn og Framsóknarflokkinn, sem báðir telja vegferð Íslands best borgið utan við Evrópusambandið og ríkissamrunaferli þess. Hrun bankageirans fyrir tilstuðlan fjármagnstyrktarþega aðildarsinna á Íslandi hefur markað ESB umræðuna á Íslandi og almenningur ólíkt annars staðar haft möguleikann í tveimur þjóðaratkvæðagreiðslum að tjá skoðun sína. 

Fram undan eru tímar stjórnmálaupplausnar í Evrópu með vaxandi átökum, þar sem margt bendir til að ESB klofni í fasískt alríki ESB og sjálfstæð lýðræðisríki. Íslendingar hafa sem betur fer valið lýðræðið og sjálfstæðið. 

Mótmælin á Austurvelli 17. júní

Af virðingu við hinn landskunna skemmtikraft Ómar Ragnarsson svara ég mótmælum hans við mótmælum mínum vegna fyrirhugaðra mótmæla 17. júní. Ég er hjartanlega sammála Ómari um að rétt er að láta þjóðhátíðina í friði 17. júní, nóg er af öðrum tækifærum til að tjá sig um stefnu stjórnvalda. Ég samgleðst með Ómari, að fólk vill frekar sjá íslenska fánann en ESB-fánann, þótt sumir hafi áður veifað þeim fána í mótmælum á Austurvelli. Ómar hefur líka rétt fyrir sér, að fleiri stjórnmálaflokkar en Samfylkingin áttu fylgjendur í röðum mótmælenda á Austurvelli 17. júní 2015. Hann nefnir enga en Píratar hafa verið bendlaðir við mótmælin, sem er alveg í anda þess anarkíska flokks, að yfirleitt vera á móti sitjandi ríkisstjórn burtséð frá stefnumálum hennar.

Þegar Birgitta Jónsdóttir greiddi atkvæði gegn Icesave á alþingi 2011 lenti hún réttu megin við línuna en í dag er hún stöðugt vitlausu megin. Núverandi ríkisstjórn framfylgir vilja þjóðarinnar sem fram kom í þjóðaratkvæðagreiðslum um Icesave. Ekki má gleyma Vinstri grænum og öðrum flokksbrotum en kjarninn varðandi mótmælin á Austurvelli er að verið er að eyðileggja þjóðhátíð landsmanna í nafni gagnrýni á ríkisstjórnina. Mótmæli Jóns Sigurðssonar gegn stjórnarskrá Danakonungs um að gera Ísland að amti í Danmörku eiga ekkert skylt með "mótmælum" gegn núverandi ríkisstjórn. Þvert á móti vinnur ríkisstjórnin í anda Jóns Sigurðssonar fyrir framgangi landsmanna.

Ýmsir stjórnarskrártillögumenn eiga um sárt að binda, að þjóðin hefur hafnað tilraunum þeirra til að afnema núverandi stjórnarskrá. Þar er fremstur ESB-sinninn og 3% prófessorinn Þorvaldur Gylfason en hann telur það landráð að farið sér eftir stjórnarskrá lýðveldisins frá 17. júní 1944. 

 


mbl.is Uppgangur þjóðernishyggju áhyggjuefni
Tilkynna um óviðeigandi tengingu við frétt

Gleðilega þjóðhátíð 17. júní 2015!

Einhver ágreiningur virðist vera um lýðræðið, þar sem tapsárir og athyglissjúkir Samfylkingarmenn, að því er mér virðist, vilja sundra fylkingu á Austurvelli og eyðileggja þá áratuga hátíðarhefð, að forseti Íslands leggur krans frá þjóðinni að styttu Jóns Sigurðssonar og fjallkonan ásamt forsætisráðherra flytja ávörp. 

Skelfilegt, hvað það hlýtur að vera erfitt að sjá íslenska fánann að húni en ekki einn einasta ESB-fána í augnsýn svo langt sem augað nær. Kannski fjölmenna "mótmælendur" á Austurvöll með ESB-fánann til að þvinga uppgjöf þessarrar hræðilegu ríkisstjórnar sem þjóðin veitti tryggan stuðning í síðustu alþingiskosningum? Kannski birtist Juncker sjálfur eða hálffullur andi hans og reynir að fella Jón Sigurðsson af stalli með andremmunni einni saman? Eða þá Karmenu Vella valti yfir Austurvöll og berji dauðum makríl í höfuðið á Jóni til að koma vitinu fyrir þessa fádæmis þjóð sem engum vill hlýða og lætur fjallkonu flytja ávarp till jafnfætis forsetanum og forsætisráðherranum? Eða þá Gordan Brown komi með Kristínu Lagarde og máli AlKaída, evru eða ÍSÍS ásýnd á bæði Jón og alþingishúsið? 

Draumur Samfylkingarinnar er að fá styttu af öðrum Jóni, sjálfu bankatrölli Íslands Jóni Ásgeir Jóhannessyni á Austurvöll. En eftir Icesave-ósigurinn og fall bankaskjaldborgarinnar er ekkert annað eftir en að hengja sig í saklausa þjóðlega athöfn í von um að ná athygli fjölmiðla. 

 

Ég elska mína þjóð og hvet alla til að halda hressilega upp á Íslands farsældarblóm, Frónið okkar allra, hvort sem við erum heima eða heiman.

Ung sem gömul, frísk sem veik, fátæk sem efnameiri, lituð sem hvít, konur sem menn: TIL HAMINGJU MEÐ 17. JÚNÍ!

Höldum öll upp á 17. júní 2015 og gleðjumst yfir því, sem við eigum sameiginlegt. 

Gleðilega þjóðhátíð! 

 


mbl.is Fyrstu mótmælin á 17. júní?
Tilkynna um óviðeigandi tengingu við frétt

Kergjaður kverúlanti menntaklíku Ríkisútvarpsins dregur fallna stofnun neðar í botnlaust dýið

dreamstime_xs_17861347

Ég horfði á viðtal nýstjörnu sjónvarpsins við forsætisráðherra Íslands og verð að játa, að nýstirnið Gísli Marteinn Baldursson kom mér fyrir sjónir sem verjandi stjórnenda Ríkisútvarpsins gagnvart ríkisstjórn, sem draga vill úr þenslu stofnunarinnar og gerir hærri kröfur um fréttaflutning en ríkisútvarpið getur með núvarandi mannskap innt af hendi.

Engu er líkar en Gísli Marteinn vilji vera HE-MAN starfsfélaga á sökkvandi fréttaskútu sem búin er að vera í Prövduhlutverki frá því, að þjóðin stöðvaði Icesave og ólmugang heilaþveginna ESBara, sem vart geta sagt neitt annað en Hallelúja ESB og evra.

Gremjan hjá ríkisútvarpsstjórnendum hefur breyst í þvingandi biturleika og það hefur því verið auðvelt fyrir hinn unga krossfara að fá sérstöðu til að bjarga rúvurum í aðþrengdri stöðu. Blinda stjórnenda RÚV er í þvílíkri hróplegri andstöðu við grunnstaðreyndir daglegs lífs venjulegra meðborgara, að hafi það áður verið rætt í alvöru, að stofnunin þyrfti á endurskipulagningu að halda, þá hefur Gísla nú tekist að opna fyrir það að leggja megi Ríkisútvarpið niður. Gísli Baldursson sýnir ekki að honum hafi tekist að læra almenna mannasiði þrátt fyrir áralanga skólsetu, jafnvel 7 ára gömul börn kunna meiri kurteisi en Gísli sýndi í viðtalinu við forsætisráðherrann.

Mér eru minnistæðar árásir sjónvarpsins á forseta Íslands í síðasta forsetaframboði, þar sem búin var til áróðursmynd sem sýndi forsetann sem gamaldags og gleyminn mann, sem ekki skildi nútímann og svo átti sjónvarpsstjarna í forsetaframboði bara að brosa og fá atkvæðin í staðinn. Árás Gísla Marteins Baldurssonar í dag á Sigmund Davíð Gunnlaugsson er í sama stíl, enginn áhugi að heyra, hvað þá hlusta á orð forsætisráðherrans, eini tilgangurinn var að rakka forsætisráðherrann niður og niðurlægja í ríkisfjölmiðli með orðaskylmingum. Gísli Marteinn Baldursson hefur sjálfsagt æft sig mikið en er gikkfastur í eigin skoðunum og því óhæfur í því starfi, sem skattgreiðendur borga honum laun fyrir. Þar skilur mjög á þeim verðmætum sem fást fyrir krónurnar milli hans annars vegar og forsætisráðherrans hins vegar.

Hverslags sjónvarp er almenningur að greiða fé fyrir?!

Ríkisútvarp sem aðallega er notað sem tæki fyrir stjórnmálapotara Samfylkingarinnar er fullkomin tímaskekkja. Betra væri að landsmenn héldu eftir útvarpskrónum sínum og gætu sjálfir valið hvaða stöð þeir vilja gerast áskrifendur að. 


mbl.is „Vá. Þetta var furðulegt“
Tilkynna um óviðeigandi tengingu við frétt

Besta stjórnmálapar landsins

bjarnihannabirna

Bjarni Benediktsson nýkjörinn formaður Sjálfstæðisflokksins og Hanna Birna Kristjánsdóttir nýkjörinn varaformaður Sjálfstæðisflokksins.

Sameinaður styrkur Sjálfstæðismanna að baki leiðtogum sínum gerir Sjálfstæðisflokkinn sterkari í því að takast á við landsmálin. Sá samhugur sem ríkt hefur á Landsfundi Sjálfstæðsimanna mun duga langt fram yfir næstu alþingiskosningar. Sjálfstæðisflokkurinn er að ná fyrri samheldni og stefnufestu, sem einkennt hefur flokkinn alla tíð.

Undir leiðsögn Bjarna Benediktssonar og Hönnu Birnu Kristjánsdóttur mun flokkurinn leiða Ísland farsællega á örlagatímum. Staðfesta flokksins í Evrópumálum, atvinnumálum, peningamálum og hagsmunamálefnum heimilanna er grundvöllur sjálfstæðistefnu nútímans, sem lýsa mun landsmönnum veginn fram á við.

Ég óska myndarlegasta stjórnmálapari landsins til hamingju með kjörið! 


Landsfundur Sjálfstæðismanna lofar góðu

f81a76761b27889a

 

 

 

 

 

 

 

 

 

 

 

Engir aðrir stjórnmálaflokkar geta státað af sama styrk og Landsfundur Sjálfstæðisflokksins gerir. Kemst Framsóknarflokkurinn næst Sjálfstæðisflokknum í vegsemd og virðingu og enginn flokkur fram að þessu jafn heill í afstöðu sinni til Evrópumála og Framsóknarflokkurinn hefur verið. Það fór því afar vel í upphafi Landsfundar Sjálfstæðisflokksins, að formaður flokksins Bjarni Benediktsson tók af allan vafa um grundvöll flokksins í þeim málum með yfirlýsingu um að Sjálfstæðisflokkurinn telji hagsmunum þjóðarinnar best borgið utan ESB. Þar með eru tveir þýðingarmestu stjórnmálaflokkarnir í íslenskum stjórnmálum samhentir í forsvari kjósenda sinna og landsmanna allra að marka nýja framsókn Íslands á sjálfstæðum grundvelli lýðveldisins, sem stofnað var og grundvöllur lagður að með núverandi stjórnarskrá á Þingvöllum 17. júní 1944.

Bjarni Benediktsson tók einnig af allan vafa um, að Sjálfstæðisflokkurinn hugsi um annað en íslensku krónuna sem gjaldmiðil okkar í nánustu framtíð. Þetta eru afar mikilvæg skilaboð frá stærsta flokki þjóðarinnar og ættu að lægja áróðursöldur frá aðildarsinnum og yfirborðskenndum og veruleikafirrtum áróðri þeirra um að evran "leysi" efnahagsmál Íslendinga. Það er bæði þökkunarefni og ánægjuefni, að stærstu stjórnmálaöfl landsins stilli saman strengi sína til að takast á við komandi verkefni að rífa landið upp úr volæðiseymd vinstri vofunnar, sem hótað hefur allt að því "heimsendi" á eyju okkar, ef landsmenn krjúpi ekki á hnjánum inn fyrir dyr ESB sem með réttu ætti að heita Eilífa SkuldaBandalagið.

Sjómenn, bændur og annað harðduglegt verðmætaskapandi fólk er kjarni þjóðarinnar og mjög svo treystandi fyrir málefnum okkar eins og ítrekað hefur komið í ljós s.l. fjögur ár. Skessutímabili Samfylkingar gegn Íslandi fer nú að ljúka og þjóðin mun endurheimta sjálfstraust og trú á eigin mátt og framtíð eins og fyrr. Verður gott að fylgjast með Landsfundi Sjálfstæðismanna þessa helgi, stjórnmálaákvörðunum fundarins og kjöri foringja flokksins.

Ég óska Sjálfstæðismönnum alls heilla í þýðingarmiklu starfi fyrir Ísland og betra kjörorð hefði ekki verið hægt að velja í núverandi ástandi en kjörorðið: Í þágu heimilanna. Tek undir ósk ýmissa fundargesta að hafa íslenska fánann á sviðinu svo fallegi fáninn okkar megi minna á hagsmuni þjóðarinnar á örlagatímum. Sjálfstæðisflokkurinn er flokkur allra landsmanna sem vinna saman hlið við hlið úr öllum stéttum samfélagsins og marka sameiginlegum málum okkar brautargengi.

 

 


mbl.is Best borgið utan Evrópusambandsins
Tilkynna um óviðeigandi tengingu við frétt

Þolir ríkisstjórnin ekki endurskoðun? Reynir að "kúppa" út endurskoðenda ríkisins, svo hann geti ekki unnið lögbundið starf sitt.

Skärmavbild 2012-10-31 kl. 20.38.57Í Kastljósi 30. október ræddu Vigdís Hauksdóttir, Framsóknarflokknum og Björn Valur Gíslason, Vinstri grænum, um þann "trúnaðarbrest", sem Björn Valur hefur fullyrt að ríki milli Alþingis og ríkisendurskoðenda. 

Valgerður Bjarnadóttir, formaður stjórnskipunar- og eftirlitsstofnunar Alþingis hefur krafist þess, að Sveinn Arason ríkisendurskoðandi "dragi sig til hliðar" á meðan Alþingi ræði málið.

Ljóst er, að stjórnarmeirihlutinn vill losna við núverandi ríkisendurskoðenda fyrir næstu Alþingiskosningar og setja sinn mann í embættið í staðinn. 

Hvaða mál eru svona viðkvæm fyrir Samfylkinguna og Vinstri græna, að þau eru að reyna að "kúppa" burtu endurskoðanda ríkisins fyrir næstu kosningar?Hvað veit ríkisendurskoðandi um, sem ríkisstjórnin vill ekki að komi fram?

Sveinn Arason sagði í bréfi til Alþingis, að hann væri „ákaflega hugsi yfir atburðarrásinni í tengslum við birtingu Kastljóss á vinnugögnum og trúnaðarskýrslum Ríkisendurskoðunar.“ Þessi drög hafi verið tekin ófrjálsri hendi úr gagnasafni stofnunarinnar. (Mbl.16.okt.)

Vigdís Hauksdóttir sagði í Kastljósi 30. okt. að hún skyldi ekki af hverju stjórnaflokkarnir væru að lýsa þessu stríði yfir við þetta embætti "en ég vil minna á, að ríkisendurskoðandi hefur verið grimmur í gagnrýni á sérstaklega ráðherra Vinstri grænna. Ég minni hér á tannlæknamálið varðandi Álfheiði Ingadóttir, Árbótamálið hjá Steingrími J. Sigfússyni, dvalarheimilistryggingarmálið, sem ekki átti að gjaldfærast hjá ríkissjóði heldur átti að fara með það grísku leiðina. Ég held að það sé hin raunverulega ástæða fyrir þessum árásum á embættið frekar en nokkuð annað."

Sumir muna eftir "gámamálinu", þegar búslóð Skafta Jónssonar og Kristínar Þorsteinsdótturs skemmdist í flutningi til USA og greiddi ríkið þeim tífalda þá upphæð, sem búslóðin var tryggð fyrir eða 75 milljónir kr. í stað 7,5 milljóna kr. Mætti halda, að lúxuseinbýlishús hefði verið með í gámnum í stað venjulegrar búslóðar.

Skafti og Kristín hafa fyrrum tengsl við Baugsveldið og Jón Ásgeirs og þar kann að vera komin skýringin á öllum þeim "dýru" listaverkum, sem áttu að hafa skemmst í gámnum og skattgreiðendur fengu að borga. Þrátt fyrir að sjónvarpið hafi beðið Steingrím J. Sigfússon um skýringar á þessari greiðslu, hafa svör ekki borist í næstum heilt ár. Virðist ríkissjóður vera galopinn fyrir vini og vandamenn ráðherra en almenningi gert að greiða sífellt stærri hluta af tekjum sínum til ríkissjóðs.

Hér sést ljótur maðkur í mysunni. Stöðva verður áætlun ríkisstjórnarinnar að bola burtu Sveini Arasyni ríkisendurskoðenda til að koma sínum manni að fyrir næstu kosningar. Geinilega veit Sveinn Arason eitthvað upp á ráðherra, sem ekki þolir dagsins ljós!


mbl.is Ríkisendurskoðun þarf að fækka fólki
Tilkynna um óviðeigandi tengingu við frétt

Innskráning

Ath. Vinsamlegast kveikið á Javascript til að hefja innskráningu.

Hafðu samband